२०७९ आश्विन २०, बिहिबार

कासायात महत्व ब्यूगुलिं लय्ताः

प्रजित शाक्य | यंलाथ्व एकादशी ११४२, भाद्र २१ मंगलवाः

नेपाःया पत्रकारिताय् कासायात थौँकन्हय् माक्व हे प्राथमिकता ब्यू । कोभिड ई न्ह्यःया खँ ल्हाय्गु खःसा अप्व धैथेँ ब्रोडसिट पेपरय् कासा बुखँया नितिं निगु पृष्ठ छुटे यानातःगु दु । रेडियो, टेलिभिजनय् नं कासाया अलग्ग हे बुखँ बीगु याः । अथेखःसां नेपालभाषाया पत्रकारिताय् कासाया च्वसु, बुखँयात उलि प्राथमिकता ब्यूगु खनेमदु । 
 
नेपाल भाषा ख्यलय् विशिष्टीवृmत जुइधुंकूगु पत्रिका लहनाय् नं कासा बुखँ उलि खनेमदु । वाःपौ जूगुलिं नं लहनां कासा बुखँ बासी जुइगु ल्याखं प्राथमिकताय् मतःगु जुइफु । लहनां उकिया पलेसा पुलेत कासा ख्यःया च्वसुयात धाःसा प्राथमिकता ब्यूगु दु । उकिं याना जि यक्व लय्ताः । छाय्धाःसा जि छम्ह कासायात कयाः विधागत पत्रकारिता यानाच्वनाम्ह पत्रकार खः । जिगु थःगु बिचाः कथं नेपाल भाषाया पत्रकारिता नेवाः तजिलजि, नेवाः संकिपा, भाषा आन्दोलन, नेवाः साहित्यय् जक तक्यना च्वंगु थें च्वं । नेपालभाषा पत्रकारिताय् कासायात उलि थाय् बियाच्वंगु मदु । नेपाल भाषाया पत्रिका जक मखु रेडियो, टिभीं नं उलि थाय् ब्यूगु खनेमदु । कासा ख्यलय् यक्व हस्ती नेवाः कासामित दु ।
 
तर नेवाः सञ्चारमाध्यमं उमित खास हे हःपाः, थाय् मब्यू । सागय् दकले न्हापांगु स्वर्ण पदक त्याकूम्ह व स्वर्ण पदकया ह्याट्रिक याःम्ह बैकुण्ठ मानन्धर, एसियाली खेलकुदय् दकले न्हापां नेपालयात रजत पदक ब्यूम्ह सविता राजभण्डारी नं नेवाः हे खः । अन्तराष्ट्रिय ख्यलय् नेपाःया नां तय्गुलिइ नेवाः कासामित सुं स्वयां म्ह्वः मजू । तर उमिसं इलय्ब्यलय् खस भाषां, अङ्ग्रेजी भाषां यक्व अन्तर्वार्ता बिया तर थःगु हे नेपाल भाषाया सञ्चारमाध्यमं उलि वास्ता मयाः धैगु दुःख प्वंका च्वनेगु याः ।
थज्यागु पक्षय् लहना यक्व हे उदार खनेदु । कासाया छुं महत्वपूर्ण धेंधें बल्लाः जुलकि अथवा सुं नेवाः कासामिं बांलाःगु कासा म्हिताm क्यनकि च्वसुया निंति लहनाया प्रधान सम्पादक व
 
प्रकाशक नृपेन्द्र लाल श्रेष्ठया फोन वय्धुंकीगु । उकिं यानाः लहनाय् नेपाः व अन्तर्राष्ट्रिय कासाया छुं नं महत्वपूर्ण घटना त्वःमफ्यू धाःसां पाइमखु । थःगु खँ ंंल्हाय्गु खःसा लहनां जिगु मातृभाषां कासा पत्रकारिता याय्गु इच्छा पूवंका ब्यूगु दु ।
 
थुलि धासें लहना परिवारयात ४०० अङ्क पूवंकेत ताःलाःगुलिं दुनुगलंनिसें भिन्तुना बियाच्वना । नेपाल भाषाया पत्रकारिताय् लहनाया पलाः न्ह्यागु अकुन्हु तिनि थें च्वं । लहनाया उलेज्या ज्याझ्वः जूगु म्हिगः थें च्वं । तर लहनां पत्रिका पिहांवःगु ल्याखं प्यंगु शतकीय पालि म्हितेधुंकल खनी । हाकनं छकः लहना मदिक्क न्ह्याःवनेफय्मा, थ्व हे कामना याना ।