२०७९ आश्विन २०, बिहिबार

सः मदुपिनि सः जुइ फय्मा

उदेन न्हुसाय्मि | यंलाथ्व एकादशी ११४२, भाद्र २१ मंगलवाः

नेपालभाषा पत्रकारिता ख्यलय् ताःई न्ह्यःनिसें चिन्तन, बहस व सहलहया विषय जुयाः नं न्ह्याः वने मफयाच्वंगु धइगु व्यावसायिक पत्रकारिता खः । देशय् राजनीतिक हिउपाः वय्धुंकाः मेमेगु ख्यः थें पत्रकारिता ख्यःया नं व्यापक विकास जूगु दु । पत्रकारिता ख्यःया विकासलिसें आपालं नेपालभाषा ह्यमित नं थ्व ख्यलय् थःत समर्पित यानाः दुहांवःगु खनेदत । थ्व झ्वलय् आपालं संचारमाध्यमत नेपाःया आकासय् पिलूवल । छापा, रेडियो, टेलिभिजन, अनलाइनलिसें थौंकन्हय् सामाजिक संजालया व्यापकता नं उतिकं अप्वया वनाच्वंगु दु । थ्व क्रम दिपाः मकाःसे न्ह्यानाच्वंगु दु । थुकिया अन्त नं खनेमदु । 
 
संचारया थ्व हे व्यापकता दुने नेपालभाषा पत्रकारिताय ख्यःया नं विकास जूगु खनेदु । पत्रकारिता ख्यःया विकासलिसें मेमेगु भाय् विशेष यानाः खस नेपाली भाय्या पत्रकारिता ख्यः चकना वनाच्वंगु दु । तर नेपालभाषा पत्रकारिता ख्यः अले नेपालभाषाय् पत्रकारिता यानाच्वंपिनिगु अवस्था म्हिगः गथे खः थौं नं वहे ।
 
खनेदय्क वा खः धाय्छिंक छुं हिउपाः वःगु मदुनि । धाय्गु हे खःसा भाषिक पत्रकारिता ख्यलय् व्यावसायिकता अझं दुहां वय् फुगु मदुनि । थ्व ख्यलय् दुहां वयाच्वंपिं व थौंतक थःत थ्व हे ख्यलय् पानाच्वंपिं धइपिं नं मात्र भाषाप्रतिया अनुरागया कारणं खः । अले भाषा ख्यःया पत्रकारिता छगूकथंया नशा नं खः ।
 
नेपालभाषा पत्रकारिता ख्यलय् खने दयाच्वंगु व्यावसायिक पत्रकारिताया अभावयात पूर्ति याय्माःगु दु । थ्व छगू गहन चिन्तनया विषय खः । थ्व हे अभाव व चिन्तनया दथुइ नेपालभाषा पत्रकारिता ख्यलय् छगू आशा ज्वनाः छगू दशक न्ह्यः पिलूवःगु खः ‘लहना वाःपौ’ । थुगु वाःपौ प्रकाशनं शुरुया इलंनिसें व्यावसायिक पत्रकारितायात बः बिया वयाच्वंगु दु । थुकी वाःपौ गुलि सफल जुल वा मजुल व थःगु हे थासय् दु । तर छगू निगू पत्रिकाया जक कुतलं अभावया पूर्ति जुइमखु । उकिया निंतिं प्रकाशन व प्रशारणय् दुगु दक्वं संचारमाध्यमं कुतः न्ह्याकेमाःगु खनेदु । 
न्ह्यागु न्ह्याथे हे जूसां लहना वाःपतिं गुगुकथंया नेपालभाषा पत्रिकारिता ख्यलय् छगू रंगीन वाःपौया रुपय् थःगु म्हसीका बीत ताःलाःगु दु । थुकिं न्ह्याथेंज्याःगु पंगः वःसां दिपाः मकासे मदिक्क खुसिबाः थें न्ह्यानाच्वने फय्मा । आःतक मदिक्क ४०० अंक तक वाःपौ पिथनेत ताःलाःगुलिं प्रकाशन परिवार सकलयात दुनुगलंनिसें भिंतुना देछाना । नेवाः ख्यलय् सः मदुपिनि सः जुयाः न्ह्याः वनाच्वने फय्मा । थ्व हे मनंतुना । हाकनं छक्वः भिंतुना ।