२०७९ आश्विन २०, बिहिबार

नेवाः भाय्, नेवाः तजिलजि, साहित्य, बुखँनापं यक्व बिधा कःघाना पिदनाच्वंगु खनेदु

बिद्यासुन्दर शाक्य, पुलांम्ह मेयर–येँ महानगरपालिका | यंलाथ्व एकादशी ११४२, भाद्र २१ मंगलवाः

लहना वाःपौ थ्यंल्याः प्यसः थ्यंगुया लसताय् थुकी आवद्ध जुयाच्वनादीपिं सकल पत्रकार व ज्याकःमितय्त भिंतुना नापं सुभाय् ! 
 
लहना वाःपौ लोकंह्वाःगु वाःपौ खः । रंगीन व चुलूगु भ्वँतय् पिदनीगुलिं यानाः थुकी बिस्कं आकर्षण दु । थ्व पत्रिका नेवाः भाय्, नेवाः तजिलजि, साहित्य, बुखँनापं यक्व बिधा कःघाना पिदनाच्वंगु खनेदु । सम्पदा संरक्षण व नेवाः गतिबिधियात नं तःधगु महत्व बिया वयाच्वंगु दु, गुगु तसकं च्वछाय्बहःजू ।
 
थ्वहे झ्वलय् थुगु पत्रिकां म्हिगः येँ महानगरपालिकां नेवाः भाय्, नेवाः तजिलजि, सम्पदा संरक्षणया निंतिं ल्ह्वंगु पलाःलिसें नेवाः भाषाया माध्यमं येँ देय्यात म्हसीकेत स्कूल स्तरया पाठ्यक्रम दय्काः न्ह्याकूगु पलाःयात उतिकं महत्व बियाः च्वसु व बुखँया माध्यमं गुकथं प्रचार प्रसार यानाः ग्वहालि यात, उकीयात ल्वःमंके मज्यू । उबलय् येँ महानगरपालिका व थुगु लहना वाःपौया दथुइ क्वातूगु सहकार्य नं जूगु खः । पुलांम्ह मेयरया ल्याखं थुगु खँयात कयाः जि लय्ताः अले ग्वहालिया निंतिं सुभाय् नं देछाना च्वना ।
 
पत्रकारिता छगू हाथ्यां जाःगु पेशा खः । थुकिया धर्म धइगु सत्यतथ्य पिब्वय्गु खः । तर झीथाय् पत्रकारिताय् अझं यक्व कमि, कमजोरी दनि । पत्रिका यक्व मीगु व अनलाइन चले याय्गु नामय् सत्यतथ्ययात बेक्वय्केगु, बुखँया शिर्षकय् ध्वं लाय्गु ज्या आपालं यानावःगु खनेदु, गुगु पत्रकारिताया धर्म स्वयां अःखः खः । छुं मखुसां नेवाः पत्रकारतय्सं पिथनावःगु नेवाः पत्रिकात थज्याःगु विसंगतिइ मलाः धैगु जिगु मान्यता खः । थ्व ल्याखं झी सकलें लय्ताय्माः ।
]
पत्रकारिताया धर्मयात क्वबियाः थुगु वाःपौ सदां न्ह्याःवने फय्मा धइगु मनंतुसे हाकनं छक्वः भिंतुना व सुभाय् देछाना च्वना । सुभाय् – भितुना ! भिंतुना !