कानूनयायात ध्यानय् मतयेवं बालेनया डोजरय् ब्रेक
लहनान्युज | यंलागा दशमी ११४२, असोज ४ मंगलवाः
येँ महानगरपालिकाया मेयर बालेन्द्र शाह लिपांगु इलय् वया डोजर अभियानया कारणं तसकं चर्चाय् वःगु खः । फोहरया समस्यायात कया अलमल जुया छगू कथं लिचिलेत बाध्य जुयादीम्ह मेयर शाह लिपांगु इलय् वया डोजरया कारणं चर्चाय् वःगु खः। डोजर चलेयायेगु अभियान कथं न्हापां ब्यापारितयत थिइगु यानादीगु खः । ब्यापारया नितिं भवन निर्माणया झ्वलय् पार्किङ यायेगु धकाः नक्सा पासा यानातःगु जूसां उकियात लागू मयात धकाः आक्रमक रुपं सक्रिय जुयादीम्ह मेयर बालेनं बँपसः तक थिउगु अवस्थाय् नं चर्चाय् हे वयाच्वंगु खः ।
तर जब जनताया निजी सम्पत्तिइ ल्हाः तायेगु ज्या यानादिल अनंनिसें विवाद शुरु जुया टुकुचा खुसि तक थ्यंगु अवस्थाय् ला बालेनया डोजरयात तकं ब्रेक तया बिउगु दु । कानुनया रित पूवंकेगु मयासे अले माःगु क्षतिपूर्ति मबिउसे जनताया निजी छेँ थुनेगु अभियानय् तक वंगु अवस्थाय् अदालतं उकियात पना बिउगु दु ।
उच्च अदालत पाटनपाखें टुकुचा खुसिया भूमिगत सुरुङच्वय् दयेकातःगु छेँ स्यंकेगु ज्या यायेमत्य धकाः अल्पकालिन आदेश तकं बिउगु दु ।
आइतवाः न्यायाधीश दिपेन्द्र बहादुर बमया इजलासं अथे आदेश बिउगु खः ।
जेनेक्स इन्भेस्टेमन्ट, उत्तरमान लामा व प्रेसिडेन्ट ट्राभल्स एन्ड टुर्सया नामय् दुगु येँ महानगरपालिका वडा नं। ७ य् दयेकातःगु भवनयात कानुनी रित पुरा मयासे व उचित क्षतिपूति मबिउसे स्यंकेगु ज्या योमत्य धकाः अल्पकालिन अन्तरिम आदेश बिउगु खः ।
अल्पकालीन अन्तिरिम आदेश निगू हे पक्षया बसह न्यने धुंकाः मेगु आदेश मजूतलसेया नितिं लागू जुइगु आदेश खः ।
बँपसः तइपिनिगु पक्षय् एमाले
येँय् बँपसः तयाच्वंपिं मनूतयगु पक्षय् एमाले वंगु दु । एमालेया मजदुर संगठन जिफन्टं ला सतकय् क्वहां वया प्रदर्शन तकं याःगु दु । इमिसं ससक्त कथं आन्दोलन यायेगु धकाः तकं ख्याच्वः बिउगु दु । एमाले प्रमुख प्रतिपक्ष दल जूगु अले चुनाव न्ह्यःने वयाच्वंगु अवस्थाय् थःपिनिगु शक्ति निर्माणया झ्वलय् बँपसः तइपिन्त नं संगठित याना न्ह्याः वंगु खने दु । बँपसः तइपिन्त चीकेमाः धकाः स्वनिगःवासी नापं नेवाःतयसं धायेगु याना वयाच्वंगु जूसां नं एमालें धाःसा बँपसः तइपिन्त साथ बियाच्वंगु दु । उकिं येँ महानगरपालिकाया मेयर बालेनया अभियानय् एमाले नं छगू कथं हाथ्या जुया बिउगु दु । कन्हय् वना मेमेगु पक्ष नं हाथ्या जुया बिइगु संभावना दु ।
टुकुचाया सरुङय् थप क्षति मयायेत पुरातत्व विभागया पहल
थ्व हे दथुइ पुरात्त्व विभागं टुकुचा जमिनय तःलय् लानाच्वंगु सच्छि व स्वीदँ पुलांगु राणा प्रधानमन्त्री वीर शम्शेरया इलय् दयेकातःगु भूमिगत सुरुङ ऐतिहासिक महत्वया जूगुलिं उकियात थप क्षति मजुइकेत पहल याःगु दु । उकिया नितिं महानगरपालिकालिसे सहलह ब्याकेगु नितिं पुचः हे तयार याःगु दु । आवश्यकता कथं पौ नं तयार याःगु दु । टुकुचा खुसियात गुम्बज शैलीं सुरुङ दयेका यंकातःगु खः । अप्पां दयेकातःगु थुगु कथंया सुरुङ स्वतः हे पुरातात्विक सम्पदा जुइगु जुया डोजर चलेयाना सम्पदाय् क्षति मयायेत महानगरपालिकया ध्यानाकर्षण यानागु खः धकाः पुरातत्व विभागं धाःगु दु ।
सडक विस्तार पीडितत नं सतकय् क्वहां वयेग तयारी
येँ महानगरपालिकाया मेयर बालेन्द्र शाह नं जनताया निजी सम्पत्तिइ तकं डोजर चलेयाना जनतायात सुकुम्वासी यायेत त्यंगु ठहरयासें सर्वोच्च अदालतया आदेश पालना यायेत, जनताया आवस सम्वन्धि हक, आदिवासीतयगु सवालय् आइएलओ १६९निसें संविधानं बियातःगु थीथी अधिकारयात सुनिश्चित यायेमाः धकाः सः थ्वयेका सडक विस्तार पीडित संघर्ष समिति सतकय् क्वहां वयेगु तयारी याःगु दु । स्वनिगलय् कयौं नेवाःतयसं स्ववासीया पुर्जा तकं काये मफयाच्वंगु अवस्थाय् बालेनया डोजर अभियानं नेवाःतयत तःधंगु लिच्वः लाइगु ठहरयासें स्वासीया तकं मुद्दा ज्वना आ सतकय् वयेगु तयारी याःगु खः ।
सडक विभाग, सरकारनिसें उपत्यका विकास प्राधिकरण तकं जनताया माग खना ग्याना च्वंगु अवस्थाय् आः वया बालेनं डोजर चले यायेत कानुनयात ध्यानय् मतःगु अले जनताया अधिकारयात बेवास्ता याःगु तायेका आः उपत्यकाव्यापी सडक विस्तार पीडित संघर्ष समिति जनताया अधिकारया नितिं सतकय् क्वहां वयेगु तयारी याःगु खः धकाः संघर्ष समितिया छम्हेस्यां जानकारी बियादीगु दु । याः याकनं हे पीडिततयत मुंकाः माःगु कथंया गतविधि यायेगु, थःपिनिगु धापू सहितया विज्ञप्ति जारी यायेगु नाप नापं सतकय् तकं प्रदर्शन यायेगु योजना दयेकाच्वंगु दु । बालेनया डोजर अभियानया नितिं आः तकया दुने दक्ले तःधंगु हाथ्या थ्व हे जुइगु अवस्था दु धकाः तकं धायेगु याना हःगु दु ।
थुगु कथं छगू छगू याना बालेनया डोजर अभियानयात पनेगु नितिं थीथी कथंया ज्या न्ह्यानाच्वंगु अवस्था दु । उकिं बालेनया डोजर अभियान उलि अःपुक संचालन जुइगु अवस्था मदु धकाः तकं मनूतयसं धायेगु यानाहःगु दु । डोजर अभियान संचालन यायेगु हे खःसा कानुननिसें अदालतया आदेशयात तकं ध्यानय् तया वनेमाःगु अवस्था वःगु दु । मखुसा थुकिं कन्हय् तःधंगु लिच्वः लाकेफु धकाः तकं धायेगु यानाहःगु दु ।
Categorized in राष्ट्रिय
