राष्ट्रपति भण्डारीं संवैधानिक व्यवस्थाय् प्रहार याःगु सत्तारुढ गठबन्धनया ठहर
लहनान्युज | यंलागा एकादशी ११४२, असोज ५ बुधवाः
सत्तारुढ गठबन्धनया प्यंगू राजनीतिक दलं नागरिकता विधेयक प्रमाणीकरण मयाउगुलि राष्ट्रपति विद्यादेवी भण्डारीया पलाः संवैधानिक व्यवस्थाय् हे प्रहार याःगु ठहर धका धाःगु दु।
नेपाली कांग्रेस, नेकपा माओवादी केन्द्र, नेकपा एकीकृत समाजवादी व जनता समाजवादी पार्टीपिनिगु मंकाः विज्ञप्ति जारी यासे राष्ट्रपतिं संविधानया पालना यायेमाःगु कर्तव्यया संवैधानिक व्यवस्थाय् हे प्रहार याःगु ठहर याःगु खः।
‘राष्ट्रपतिया थुगु गैर संवैधानिक पलाःपाखे जनतां निर्वाचित याःगु संघीय संसदया घोर अपमान व अवमूल्यन याःगु दु’ प्रधानमन्त्री नाप कांग्रेस सभापति शेरबहादुर देउवा, माओवादी अध्यक्ष पुष्पकमल दाहाल प्रचण्ड, एकीकृत समाजवादीया अध्यक्ष माधवकुमार नेपाल व जसपा अध्यक्ष उपेन्द्र यादवं जारी याःगु विज्ञप्तिइ धाःगु दु।
सत्तारुढ गठबन्धनय् दुगु राष्ट्रिय जनमोर्चा न धाःसा थुगु विज्ञप्तिइ ल्हाःचिं तःगु मदु।
