२०७९ आश्विन २०, बिहिबार

मन्त्री जीवनराम श्रेष्ठ थौं सत्यमोहन जोशीया स्वास्थ्यस्थिति जानकारी कयादील

नृपेन्दलाल श्रेष्ठ | यंलागा त्रयोदशी ११४२, असोज ७ शुक्रवाः

संस्कृति, पर्यटन नाप नागरिक उड्डयनमन्त्री जीवनराम श्रेष्ठ थौं शुक्रवाः शताब्दीपुरुष सत्यमोहन जोशीया नापलायेगु निति वयकःया छेँ वंगु दु

हलि नेवाः दबू न समन्वय याना मन्त्री श्रेष्ठयात शताब्दीपुरुष जोशी स्वास्थ्य अवस्थायात कया वयकःया छेँ वंगु खः। थौं शताब्दीपुरुष जोशी थःगु थौं कन्ह्यः स्वास्थ्य अवस्था कमजोर जुयावःगुलि स्वास्थ्य हेरचाह यायेत सरकारपाखे स्वास्थकःमिया ब्यवस्था याना बिउसा ज्यु धका धयादीगु खः।

मन्त्री श्रेष्ठं शताब्दीपुरुष सत्यमोहन जोशी नेपाःया धरोहर खः। वयकःया स्वास्थ्ययात कया सरकार गम्भीर जुगु दु। वयकःया माग कथं सरकारं २४ हे घण्टाय् स्वास्थ्यकःमिया ब्यवस्था याये। वयकः इच्छा कथं नेपाःया इतिहासय् चक्रसवंतया चित्रया कया बागमती प्रदेशया सरकार नाप खँल्हा थुगु ज्या पूरा यायेगु थःम्हेसिया बचं बियादीगु दु।

अथेहे हलि नेवाः दबुया अध्यक्ष सुरेन्द्रभत्त श्रेष्ठं शताब्दीपुरुष जोशीया स्वास्थ्य स्थितिया जानकारी सरकारयात बिउगु कथं नेपाल सरकारया प्रतिनिधि कथं संस्कृति, पर्यटन नाप नागरिक उड्डयनमन्त्री जीवनराम श्रेष्ठयात थःपिन्स समन्वययानागु खँ धका लहनान्युजयात धयादीगु खः।

अथेहे थौं च्वंगु मन्त्रीपरिषदया बैठकं शताब्दीपुरुष सत्यमोहन जोशीयात स्वम्ह स्वास्थ्यकःपिन्स हेरबिचाः यायेगु कथं ब्यवस्था जूगु दु धका मन्त्री श्रेष्ठं लहनान्युजयात जानकारी बियादीगु दु।

Categorized in राष्ट्रिय