येँ महानगरपालिका सम्पदा तथा पर्यटन विभागं विश्व पर्यटन दिवस–२०२२या लसताय् वसन्तपुलिइ ग्वसाः ग्वःगु ‘कला ह्याण्डिक्राफ्ट एक्जिविसन–२०२२’ उलेज्याझ्वलय् येँ महानगरया उपप्रमुख सुनिता डंगोलं लोप जुया वनेधुंकूगु दबू संस्कृतियात हाकनं पुनःजीवित यायेगु धका धयादीगु दु ।

वय्कलं अमूर्त संस्कृति विस्तार यायेगु थाय् दबू जूगुलिं थज्याःगु थासय् जुइगु कला ब्वज्यां सहरयात जीवन्त याना तइगु जक मखसे विश्वन्यंकं परिचित यायेत नं ग्वाहालि जुइ धासें दबू पुनःस्थापनाया सोचयात पर्यटनलिसे नं स्वाकाः दछियंकं ज्याझ्वः याना वनेगु जुइ धयादिल ।

विभागया संयोजकलिसें ८ वडाध्यक्ष आशामान संगतं थनया जीवन्त संस्कृतिया पहिचान जुयाच्वंगु सांस्कृतिक सहरयात प्रवद्र्धन यानाः पर्यटन विस्तार यायेमाः धयादिल । विश्व पर्यटन दिवसया लसताय् लाकाः विभागं वसन्तपुलिइ कला महोत्सवया ग्वसाः ग्वःगु खः ।

महोत्सवय् येँया संस्कार, संस्कृति, जीवनलिसे स्वनाच्वंगु थीथी पक्षलिसें काष्ठ, धातु, ल्वहं व चाया थीथी हलंज्वलंया नं ब्वज्या याःगु खः । दबू संस्कृतियात पुनःस्थापना यायेगु ल्याखं लक्ष्मीनारायणया दबुलिइ सछि स्वयां अप्वः कलाकारं अर्केष्ट्रा नं ब्वज्या याःगु खः ।

Categorized in राष्ट्रिय