नेपालभाषा साहित्यय् मिसा स्रष्टातय् योगदान बिषययात कयाः जुगु विचार गोष्ठिया उलेज्या नेपाल प्रज्ञा प्रतिष्ठान कुलपति गंगाप्रसाद उपे्रतीं यानादीगु दु।

नेपाल प्रज्ञा प्रतिष्ठान मातृभाषा विभागया ग्वसालय् गुञ्जनलिसेया सहकार्ययय् उगु विचार गोष्ठि जूगु खः । गोष्ठिया उलेज्यायासें उपे्रतीं राष्ट्रिय अन्तर्राष्ट्रिय संघसंस्थालिसे सहकार्य यानाः थुकथंया ज्याझ्वः याना वनेगु उद्देश्यकथं मिसा साहित्यकारतय् संस्था गुञ्जनलिसेया सहकार्य थुगु विचार गोष्ठि यानागु खः धयादिल । लिसें वय्कलं प्रतिष्ठानपाखें पिथनेत्यनागु नेपालभाषाया सर्वमान्य खँग्वःधुकू याकनं पिथनेगुकथं तयारी जुयाच्वंगु नं जानकारी बियादिल ।

विभागया प्रमुख लक्ष्मी मालीया सभाबध्यक्षताय् जूगु उगु ज्याझ्वलय् नेपालभाषाया स्रष्टा गजल च्वमि ईश्वरीमैँया श्रेष्ठं ‘नेपालभाषा साहित्य नारी स्रष्टातय् योगदान’ विषयय् ज्यापौ न्ह्यब्वयादीगु खःसा कवयित्री प्रतिसरा साय्मिं टिप्पणी यानादीगु खः ।

गुञ्जनया अध्यक्ष साहित्यकार जलेश्वरी श्रेष्ठं लसकुस यासें नेपालभाषा मिसा स्रष्टातय् योगदान व भावी योजना न्ह्यब्वयादीगु ज्याझ्वलय् प्रेमहिरा तुलाधर, बद्री बेदना, सुमा श्रेष्ठ, कृष्ण प्रजापतिपिंसं मिसा स्रष्टा व साहित्यया थीथी पक्षयात कयाः न्ह्यसः तयादीगु खः ।

Categorized in राष्ट्रिय