नेपाल संवत् न्हूदँ राष्ट्रिय समारोह समिति ११४३ या ग्वसालय् म्हिगः बिहिवाः जूगुु पत्रकार सम्मेलनय् थुगु दँय् जनस्तरं ल्ह्वंगु न्हूदँया थीथी माग सरकारपाखें पूवंकेगु नितिं निरन्तर न्ह्याकेगु विचाः समारोह समितिं प्वंकूगु दु।

समारोह समितिया नायः प्रा.डा. नरेशमान बज्राचार्यं म्हिगः बिहिवाः जूगु पत्रकार सम्मेलनय् पत्रकारपिंलिसें खँल्हासें उगु विचाः प्वंकादीगु खः। नायः बज्राचार्यं प्रधानमन्त्री शेरबहादुर देउवायात नापलानाः नेपाल संवतयात सरकारं राष्ट्रिय संवत् धकाः घोषणा यायेधुंकाः सरकारपाखें यायेमाःगु थीथी च्यागू बुँदे ध्यानाकर्षण पौ लःल्हायेधुनागु जानकारी बिसें थथे लःल्हाःगु ध्यानाकर्षण पौ कार्यान्वयन याकेगु नितिं दच्छियंकं कुतः यायेगु विचाः प्वंकादीगु खः।

वय्कलं न्हूदँ समारोह समितिं पितब्यूगु प्रेस विज्ञप्ति ब्वनाः न्यंकादीगु खः । समितिपाखें पितब्यूगु प्रेस विज्ञप्तिइ न्हूदँ सकलसिनं तःजिक न्यायेकेत इनाप यानातःगु दुसा अथेहे, न्हूदँ थीथी ज्याझ्वः यानाः दच्छियंकं हनेगु ज्याय् क्रियाशील जुइगु प्रतिबद्धता नं प्वंकातःगु दु।

सार्वजनिक जूगु विज्ञप्तिइ धयातःगु दु, ‘नेपाल संवतयात व्यवहारय् छ्यलाबुला याकेगु नितिं येँ महानगरपालिकाया राजश्व रसिदय् रंजना लिपि व नेपाल संवत् छ्यलेधुंकूगु, शंखधर उद्यान नामाकरण यानाः उगु उद्यानय् शंखधर साख्वाःया पूर्णकदया झ्वाता तयेधुंकूगु व नेपाल सरकारपाखें शंखधरयात राष्ट्रिय विभूति घोषणा यायेगु लिसें नेपाल संवत् राष्ट्रिय संवत् धकाः सरकारं घोषणा यायेधुंकूगुलिं थुगु संवतया सम्मान व नेपाःया संवत् जूगुलिं ब्यवहारय् छ्यलेत माग यानाच्वना ।’

अथेहे, विज्ञप्तिइ न्ह्यःने वयाच्वंगु प्रदेश व प्रतिनिधिसभाया निर्वाचनय् दनाच्वंपिं उम्मेदवारपिन्सं नं नेपाल संवतयात कयाः समारोह समितिं सरकारयात यानावयाच्वंगु ध्यानाकर्षणया विषययात चुनावी मुद्दा कथं दयेकेत नं इनाप यानातःगु दु।

उगु पत्रकार सम्मेलनय् प्रचारप्रसार उपसमितिया कजि नृपेन्द्रलाल श्रेष्ठं सकलसित न्हूदँया प्रचारप्रसार जनस्तरय् थ्यंकेत इनाप यानादीगु खः।

Categorized in राष्ट्रिय