थँहितिइ तःजिक भिंतुना कालबिल ज्याझ्वःयात
लहनान्युज | कौलागा एकादशी ११४२, कार्तिक ४ शुक्रवाः
येँँया थँहिति चुकय् न्हूदँ ११४३ या लसताय् तःजिक भिंतुना कालबिल तुच्चा ज्याझ्वः जूगु दु।
नेपाल संवतया न्हूदँ दकले न्हापां सभा जूगु थँहिति चुकय् थौं शुक्रवाः नेपाल संवत् न्हूदँ राष्ट्रिय समारोह समिति ११४३ पाखें न्हूदँया लसताय् भिंतुना कालबिल व तुच्चा ज्याझ्वःया ग्वसाः ग्वःगु खः।
येँ महानगरपालिकाया उपप्रमुख सुनिता डंगोललिसें थीथी पार्टीया पुलांपिं सांसदपिं, वडा नायःपिं व नेवाः न्ह्यलुवाःपिं उपस्थित जूगु उगु भिंतुना कालबिल व तुच्चा ज्याझ्वलय् सकलसित न्हूदँया भिंतुना देछासें कछलाथ्व पारु (कार्तिक ९ गते) बुधवाः येँया बसन्तपुरं जुइगु भिंतुना ¥याली व भिंतुना सभाय् ब्वति कायेत समितिया नायः प्रा.डा. नरेशमान बज्राचार्यं इनाप यानादीगु खः।
थथे भिंतुना कालबिल ज्याझ्वलय् न्हूदँ ११४२ समारोह समितिं दच्छियंकं न्ह्याकूगु ज्याझ्वःया जानकारी सफू सल्लाहकार समितिया कजि तीर्थराम डंगोल व नायः बज्राचार्यं पितब्वज्या यानादीगु खः।
Categorized in राष्ट्रिय