२०८० चैत्र १५, बिहिबार

वागमती प्रदेशया नितिं नेवाः मंकाः मुद्दा

नृपेन्दलाल श्रेष्ठ | कछलाथ्व दशमी ११४३, कार्तिक १७ बिहीवाः

वइगु मंसीर ४ गते जूवनाच्वंगु आम निर्वाचन अन्तर्गत वाग्मती प्रदेश सभा सदस्यया नितिं जुइत्यःगु निर्वाचनयात ध्यानय् तया आदिवासी नेवाः समुदायया मंकाः मुद्दा तयार यायेमाःगु ठहरयासें नेवाःतयगु राष्ट्रिय संगठन नेवाः देय् दबू स्वनिगः विशेष प्रदेश समिति व वाग्मती प्रदेश समितिपाखें छगु पत्रकार मँज्यायाना जानकारी बिःगु खः।
 
नेपाःया संविधासभापाखें दयेकूगु न्हूगु संविधान, आदिवासी जनजाति सम्वन्धी अन्तर्राष्ट्रिय श्रम संगठन महासन्धि नं १६९९ आइएलओ १६९०, आदिवासी जनजाति अधिकार सम्वन्धि संयुक्त राष्ट्रसंघीय घोषणा पौ (युएनड्रिप), आदिवासी सम्वन्धित थीथी सन्धियात नाला न्ह्याः वनेमाःगु तायेका वाग्मती प्रदेश संसद व सरकारपाखें यायेमाःगु ज्यायात कया नेवाः मुद्दाया रुपय् तयार यायेगु ज्या जूगु खः धका नेवाः देय् दबू स्वनिगः विशेष प्रदेशया अध्यक्ष श्रीकृष्ण महर्जन जानकारी बिःगु खः । 
 
थुगु मुद्दा वाग्मती प्रदेशसभा सदस्य सांसदया उम्मेदवारजुपिं सकसित नापं सम्वन्धित राजनीतिक दलयात लःल्हायेगु नापं कन्हयया दिनय् कार्यान्वयन यायेत व याकेत नेवाः समुदायपाखें लःल्हायेत तयार यायेगु ज्यायानिति थीथी संगठनया प्रतिनिधि, कानुन व्यवसायी नापं नेवाः न्ह्यलुवातलिसे सहलह ब्याका तयार याःगु खः । थुगु कथंया मुद्दा वाग्मती प्रदेशपाखें कार्यान्वयन यायेमाः धकाः नेवाःतयगु मंकाः मुद्दायात रुपय् सार्वजनिक यायेगु ज्या जूगु खः । सार्वजनिक जुइवं थुकयात कार्यान्वयनया नितिं मदिक्क भूमिका म्हितेगु जुइ धका अध्यक्ष स्वनिगः विशेष प्रदेशया महर्जन धाःगु खः । 
 
वाग्मती प्रदेशया नितिं नेवाः मंकाः मुद्दा धकाः सार्वजनिक याःगु पतिइ थुगु कथं उल्लेख यानातःगु दुः
 
१) भाषा आयोगया सिफारिस कथं प्रदेशया कामाजि भाषा नेपालभाषा कथं नाला लागू यायेमाःगु ।
२) नेपाःया संविधानया धारा ५६ या ५ सं व्यवस्था जुयाच्वंगु कथं नेवाः बाहुल्यता दुगु लागाय् स्वायत्त क्षेत्र, संरक्षित क्षेत्र व विशेष क्षेत्रत घोषणा यायेमाःगु ।
३) प्रदेश प्रज्ञा प्रतिष्ठान गठन यायेमाःगु ।
४) नेपाल संवतयात वाग्मती प्रदेशय् कार्यान्वयन यायेमाःगु ।
५) १२ कक्षा तक ऐछिक विषय नेपालभाषा वा तामाङभाषा याना अनिवार्य यायेमाःगु ।
६) भु उपयोग नीति लागू यायेमाःगु ।
७) प्रदेशय् विकशित लिपियात प्रदेशय् लागू यायेगु नितिं कानुन दयेकेमाःगु  ।
८) प्रदेश दुनेया संचार माध्यमय् प्रदेशया भाषायात विशेष थाये बिइकेगु कथं भाषिक समावेशीता नीति लागू यायेमाःगु ।
९) नेवाःतयगु प्रथाजन्य संस्था गुथियात कानुनी मान्यता बिइमाःगु ।
१०) आदिवासी नेवाःतयगु परम्परागत ज्ञान पुस्तान्तरण व हस्तान्तरणया नितिं विशेष योजना हायेमाः।
११) आदिवासी नेवाःतगु परम्परागत लजगाः, प्रविधि, कला लगायतयात विशेष स्थान बिइगु कथंया नीति निर्माण यायेमाःगु ।
१२) समुदायया सरोकार  दइगु व प्रभावित जुगु न्ह्यागु ज्याखँया निर्णय यात कया नं समुदायया अग्रिम जानकारी सहितया मन्जुरी (एफपिक) कया यायेमाःगु।
१३) नेपालं अनुमोदन यानातःगु अन्तर्राष्ट्रिय कानुन आइएलओ १६९, आदिवासी जनजाति अधिकार सम्वनिध संयुक्त राष्ट्रसंघीय घोषणा पौ (युएनड्रिप) यात कार्यान्वयन यायेगु प्रतिबद्धता प्वंकेमाःगु ।
Categorized in राष्ट्रिय