‘वागमती प्रदेशय् नेपालभाषा व तामाङ भाषायात कामकाजी भाषा दय्क’ राजेश शाक्य
लहनान्युज | कछलाथ्व चतुर्दशी ११४३, कार्तिक २१ सोमवाः
२०७२ साल वैशाख १२ गतेया तःभुखाचं येँया म्हसीका जुयाच्वंगु ऐतिहासिक, धार्मिक, सांस्कृतिक सम्पदा मरुसतः अर्थात काष्ठमण्डपयात नं पाःताः दय्काबिल । न्ह्याथाय् स्वःसां मात्र धरहराया खँ जुइगु, राज्यं नं धरहरा पुनर्निर्माणया जक खँ जुइगु । मरुसतःया सुनां हे च्यूताः मकाःगु थें खनेदयाच्वगु अवस्थाय् सम्पदा प्रेमीतय् चिन्ता अप्वइगु ला स्वाभाविक हे जुल ।
व इलय् काष्ठमण्डप दय्केत न्ह्यःने वःम्ह व्यक्ति खः, तत्कालीन बागमती प्रदेशया सभासद् राजेश शाक्य । भाषा आन्दोलन व नेपाल सम्वतया आन्दोलनय् नं ताः ई न्ह्यःनिसें सक्रिय जुयाच्वंम्ह राजेश शाक्य थुगुसीया संसदीय निर्वाचनय् नं येँ क्षेत्र नम्बर ८ (क) पाखें प्रदेश सभा सदस्यया नितिं उम्मेदवारी बियादीगु दु । न्हय्गूगु शताब्दीया संरचना काष्ठमण्डप हाकनं धस्वाकेत जनकपुर, धनुषाय् सिँ मालेत चान्हि मधाःसे ब्वाँय्जूम्ह शाक्यं थुगुसी नं वागमती प्रदेशसभा सदस्यया लागिं नेकपा (एमाले) पाखें उम्मेदवारी बियादीगु दु ।
]शाक्यया थ्वयां न्ह्यः सांसद जूबलय्या अप्वःथे ई काष्ठमण्डप पुनर्निर्माणय् हे बित । उकिं यानाः शाक्यं नाम वलकि हे मनूतय्सं मरुसतः लुमंकीगु स्थिति जूगु दु । खला, प्रदेशसभाया न्हापांगु निर्वाचनया इलय् शाक्य) मरुसतः पुनर्निर्माणयात थःगु प्रतिबद्धताया न्हापांगु ल्याखय् तयादीगु खः । मरुसतःया पुनर्निर्माण सरकारी प्राथमिकताय् मलानाच्वंबलय् काष्ठमण्डप पुनःनिर्माण समितिइ च्वनाः नेतृत्व हे कयाः ज्या याय्गु खँ धाःसा थःगु कल्पनां पिनेया खँ जुयाच्वन । प्रदेश सांसद जुइधुंकाः शाक्ययात परिस्थितिं पुनर्निर्माण समितिया नायः जुइगु स्थितिइ थ्यंकूगु खः ।
न्ह्यः निक्वः निक्वः उपभोक्ता समितिमार्फत समुदायस्तरं मरुसतः पुनर्निर्माण याय्गु कुतः याःसां निगुलिं समिति आन्तरिक विवादय् हे तक्यनाच्वन । उकिं पाठ सय्काः स्वक्वःगु खुसी शाक्यया अध्यक्षताय् पुनर्निर्माण समिति गठन याःगु खः । व उगु समितिं ज्या न्ह्यःने यंकाः आः मरुसतःया उलेज्या तकं जुइधुंकल । उगु इलय् महानगरपालिकाया आर्थिक अनुदान व शाक्य नेतृत्वया समितिया क्रियाशीलताया हुनिं भुखाचं थुनाब्यूगु करिब न्हय्दँ लिपा बल्ल मरुसतःया पुनर्निर्माण जूगु खः । मरुसतः पुनर्निर्माण जुइधुंकाः उकिया अवलोकन याय्गु झ्वलय् राष्ट्रपति विद्यादेवी भण्डारीनिसें तत्कालीन प्रधानमन्त्री केपी शर्मा ओलीलिसें नं सम्पदा क्षेत्रय् गौरव याय्बहःगु ज्या धकाः न्ववाःगु खः । ठेक्काय् दय्केत स्वःबलय् अनुमानित लागत १९ करोड तका धाःगुलिइ ११ करोड तक जक पुनर्निर्माणय् खर्च जूगु खः ।
न्हापाया निर्वाचनय् थःगु १३ प्रतिबद्धता मध्ये पूरा मजूगु छगू थुगुसी पूवंकेत थः न्ह्यज्याय्गु शाक्यं धयादिल । भाषा आयोगया सिफारिस कथं वागमती प्रदेशय् नेपालभाषा व तामाङ भाषायात कामकाजी भाषा दय्केगु थःगु न्हापाया प्रतिबद्धता थुगुसी पूवंकेगु वय्कःया योजना दु । वलिसें वय्कलं हनुमानढोका दरबार संरक्षण क्षेत्रया गुरुयोजना तयार यानाः कार्यान्वयन याय्गु, सम्पदाया संरक्षण, संस्कृतियात आर्थिक विकासलिसे स्वाय्गु, मेलम्ची खानेपानीयात फक्व याकनं येँय् हय्गु, प्रदेश सरकारया लेटर प्याडय् नेपाल संवत् व रञ्जना लिपि छ्यय्केबीगु, स्वनिगःया वस्तुस्थिति कथंष गुठी विधयेक हय्गु, युवा रोजगारी व मनमती खुसि करिडोर विकास याय्गुलिसेंया प्रतिबद्धता नं वय्कलं न्ह्यःने हयादीगु दु ।
सामाजिक ज्या यायां राजनीतिइ वःम्ह शाक्य पार्टीया क्वय्या कमिटीनिसें ज्या यानावःम्ह नेता खः । जनतालिसे बांलाक भ्यलय्पुंम्ह शाक्यं थ्वयां न्ह्यः संविधानसभा सदस्य जुइधुंकूम्ह राज्यलक्ष्मी श्रेष्ठलिसे १७सः मतान्तरं निर्वाचनय् त्याःगु खः । शाक्यया आः धेंधें बल्लाः नेपाली कांग्रेसया राजुराज जोशीलिसे जुइगु खनेदु । थुगुसीया थःगु उम्मेदवारी मुख्यमन्त्री जुइगु लागिं खःवगु दाबी यासें उम्मेदवार शाक्यं धयादिल – ‘सरकारया नेतृत्वदायी भूमिका निर्वाह याय्त आः उम्मेदवारी बियागु खः ।’
Categorized in राजनीति
