२०७९ मङ्सिर २१, बुधबार

सांस्कृतिक, स्वास्थ्य व शिक्षायात सर्वसुलभ दय्केकमाःगु एजेण्डा दु : जितेन्द्रकुमार मलेकू

लहनान्युज | कछलाथ्व चतुर्दशी ११४३, कार्तिक २१ सोमवाः

चुनावय् उम्मेदवारी छाय् बियादियागु खः ? थ्व नेपाली काँग्रेस यलया सभापति जितेन्द्र मलेकू श्रेष्ठयात नापलाइपिं अक्सर कार्यकतां तइगु न्हापांगु न्ह्यसः खः । ५७ दँया श्रेष्ठ वाग्मती प्रदेशसभा सदस्यया लागिं ललितपुर क्षेत्र नं ३ (ख) पाखें गठबन्धनया मंकाः उम्मेदवार खः । वंगु असोज २३ गते उम्मेदवार मनोनयन याःगु दिननिसें श्रेष्ठयात कयौं कार्यकर्तां थ्व न्ह्यसः तय्धुंकूगु दु । 
 
दछि न्ह्यः श्रेष्ठया खँ न्यंपिं न्ह्याम्हेसिनं नं थ्व न्ह्यसः न्यंगुयात श्रेष्ठं स्वभाविक कयादीगु दु । वंगु मंसिर १२ गते आईतबाः श्रेष्ठ जिल्ला सभापतिइ निर्वाचित जुयाकथं कार्यकतातय्त धयादीगु खः ‘आः न्यादँतक्क पाटीया संगठन बल्लाकेत दतचित्त जुयाः न्ह्याःवने । चुनावय् उम्मेदवार जुइमखु । बरु पार्टीया उम्मेदवार त्याकेत दत्तचित्त जुयाः जाय्, थ्व जिगु प्रतिबद्धता खः ।’
 
झन्डै दछि न्ह्यःया थःगु हे प्रतिबद्धतां लिचिलेमाःगु कारण छु खः धइगु श्रेष्ठं धयादिल ‘खः, जिं दछि न्ह्यः न्यादँतक्क छुं हे चुनावय् ब्वति काय्मखु व चुनावय् काँग्रेसयात त्याके धयागु खः । थ्व जिं स्वीकार याय् ।’ श्रेष्ठया हे सक्रियतां वंगु बैशाख ३० गते जूगु स्थानीय तह निर्वाचनय् काँग्रेस न्ह्यःया स्थानीय तहया तुलनाय् अप्वः स्थानीय तह व वडाय् त्याःगु खः । तर आः परिस्थितिवश चुनावय् उम्मेदवारी बीमाःगु श्रेष्ठं धयादिल । ‘असोज २३ गते उम्मेदवारया मनोनयन दर्ता याके निन्हु न्ह्यः अचानक सुथय् हे जितः बालुवाटार सःतल, जि वना । अन प्रधानमन्त्री शेरबहादुर देउवानिसें मेपिं केन्द्रीय नेतातय्सं चुनावय् दने हे माः धकाः धाल’ श्रेष्ठं कनायंकल । 
 
पार्टी सभापतिनिसें दक्वं धइथें केन्द्रीय नेतातय्सं थःत उम्मेदवार जुइत बः ब्यूगुलिइ निताजि कारणं अप्वः भूमिका म्हितूगु श्रेष्ठया धापू दु । ‘न्हापांगु कारण, सत्ता गठबन्धनं यानाः खः । गठबन्धन यानाः चुनावय् वनेगु निर्णय जूगुलिसें यल क्षेत्र नं ३ य् सत्ता गठबन्धनपाखें प्रतिनिधिसभाया लागिं माओवादी नेतृ लिसें उर्जा, जलस्रोत तथा सिंचाईमन्त्री पम्फा भुसाल उम्मेदवार जुइगु सुनिश्चित हे दुगु खः । नेतृ भुसालं २०६४ व २०७४य् थ्व हे क्षेत्रय् त्याकूगु खः । भुसाल स्वक्वःगु खुसी उम्मेदवारी बीगु तयारीइ दुगु खः । थुकिं यानाः गठबन्धनया सफल व प्रभावकारीता सिद्ध याय्माःगु छगू महत्वपूर्ण निर्वाचन क्षेत्र यल ३ जूवन’ श्रेष्ठं धयादिल । थज्याःगु स्थितिइ जिल्ला सभापतियात उम्मेदवार दय्केबलय् गठबन्धनया मर्म कथं कार्यकर्ता परिचालन, मेगु निर्णयया ज्या न्ह्यःने यंकेत अःपुइगु पार्टीया शीर्षस्थ नेतातय्गु बिचाः दुगु श्रेष्ठया धापू खः ।
 
'पार्टीया केन्द्रीय नेतातय्सं शुरुइ श्रेष्ठया नां प्रदेशसभा दुजःया लागिं समानुपातिकय् प्रस्ताव याःगु खः, व नं निगूगु ल्याखय् हे । ‘समानुपातिक उम्मेदवारया बन्द धलः बीगु इलय् दक्वं नेतातय्सं ‘जिल्ला सभापति जुयाच्वंम्ह मनू प्रत्यक्षय् चुनाव ल्वा’ धका बः बियाहल । व धुंकाः समानुपातिक धलखं जिगु नां चीकाः मेम्हेसिया नां तःगु खः । लिपा शीर्षस्थ नेतातय्सं जितः चुनावय् दँ धकाः बः बीगु शुरु यानाहल’ श्रेष्ठं धयादिल ।
 
श्रेष्ठं सांस्कृतिक व पर्यावरणमैत्री विकासलिसें स्वास्थ्य व शिक्षायात सर्वसुलभ दय्केकमाःगु एजेण्डा न्ह्यःने हयादीगु दु । ‘जिगु क्षेत्रय् ख्वना, बुङ्गनिसें यलया थीथी वडातलिसें भैसैपाटी, सैबुया न्हूगु बस्तीत नं लाः । थन भाय्, तजिलजि, सम्पदायात संरक्षण यानाः
उकियात अर्थतन्त्रलिसे स्वाय्माःगु दु । न्हूगु बस्तीइ आवश्यक पूर्वाधार दय्केमानि’ वय्कलं धयादिल । ‘जिमिगु एजेण्डा, राजनीति, गठबन्धनया ग्वहालि व आम मतदाताया विश्वास हे जिगु चुनाव त्याकेगु आधार खः’ उम्मेदवार श्रेष्ठं धयादिल ‘मनूया पारिवारिक जीवन व व्यवसायलय् सफल जुइधुंकाः जक जनहित व इमान्दारीया राजनीति याय्फइ, थ्व हे मान्यतां राजनीतिक जीवन न्ह्याकाच्वनागु दु ।’
 
Categorized in राजनीति