२०७९ मङ्सिर २१, बुधबार

‘देय्या विकास व आर्थिक समृद्धिइ योगदान बीत जि राजनीतिइ वयागु खः’

लहनान्युज | कछलागा पारु ११४३, कार्तिक २३ बुधवाः

पूर्व प्रहरी महानिरिक्षक सर्वेन्द्र खनालं  आसन्न आम निर्वाचनय् येँ क्षेत्र नम्बर ६ य् नेकपा (एमाले) पाखें प्रतिनिधि सभा सदस्य पदया नितिं नितिं प्रत्यक्ष उम्मेदवारी बियादीगु दु । नेपाल प्रहरीइ च्वंबलय् अपराध अनुसन्धान महाशाखा प्रमुख, ट्राफिक प्रहरी प्रमुखलिसें थीथी पदय् च्वनाः ज्या यानाः महानिरिक्षक पदय् च्वनाः ज्या यायां वय्कलं निदँत्या धइथें न्ह्यः प्रहरीया सेवा अवकाश कयादिल । प्रहरीया सेवां अवकाश काःगु निदँत्या लिपा वय्कः नेकपा (एमाले) प्रवेश यानादिल सा आः चुनावी मैदानय् हे कुहांझाःगु दु । थ्व हे सन्दर्भय् वय्कःलिसे जूगु खँल्हाबल्हा न्ह्यब्वयाच्वना । (सं)
 
छि ला पूर्व प्रहरी महानिरिक्षक, नेपाल प्रहरीइ ज्या यानाः अवकाश धुंकाः राजनीतिइ दुहांझाल । न्हापा हे योजना दुगु खः वा छुं परिस्थिती विशेषं राजनीतिइ छिः सालाहल ?
 
प्रहरीं अवकाश काय्धुंकाः जिं निदँत्या धइथें छम्ह आम नागरिकया रुपं समुदायलय् च्वनाः सामाजिक जीवन हना । व ई दुने जिं बिचाः यानाबलय् जिगु न्हापाया अनुभव, जिं सय्कागु ज्ञान, जिगु कार्यकौशल दक्वंयात लनाः स्वय्बलय् आः राजनीतिइ हे न्ह्याःवनेमाः व देशया विकास याय्गुपाखे, आर्थिक समृद्धिया लँपुइ न्ह्यज्याकेगु नितिं जिं फक्व योगदान बीमाः धइगु जितः अनुभूत जुल । लिसें सुरक्षा क्षेत्रय् ज्या यानाच्वनाबलय् समाज व राष्ट्रया सुरक्षाया नितिं जि छगू दृढ संकल्पलिसें समर्पित जुया, आः राजनीतिक क्षेत्रपाखें नं उकथं हे न्ह्याःवनेमाः धइगु जितः ताल । देश व जनतायात केन्द्रय् मतःसे स्वार्थया राजनीति जुयाच्वंगु खनाबलय् आः जि थुकी न्ह्याःवनाः स्वच्छ राजनीतिया लकस दय्केत नं भूमिका म्हितेमाः धकाः नं जि राजनीतिक क्षेत्रय् दुहांवयागु खः ।
 
छिं प्रतिनिधि सभा सदस्यया नितिं उम्मेदवारी बियादीगु दु ? छि त्यात धाःसा प्राथमिकताया आधारय् छिं छु ज्या न्ह्यःने यंकादी ?
जिगु वंगु ३० दँया अनुभवं जिगु ज्ञान, अनुभव धयागु सुरक्षा क्षेत्र खः । थ्व राष्ट्र, देय् गुकथं सुरक्षित जुइ धइगु खँ दु । राष्ट्रिय सुरक्षाया विषयस जिके ३० दँया अनुभव, ज्ञान व कार्यकुशलता दु । उकियात प्राथमिकताय् तयाः योजनावद्ध ढंगं न्ह्याःवनेगु जुइ । नापनापं आः दुगु सान्दर्भिक कानूनयात कार्यान्वयनपाखे यंकेगु खँ दुसा असान्दर्भिक खनेदुगु कानूनयात नं संशोधन याय्गुपाखे भूमिका म्हिते । लिसें व्यवहारिक रुपं थाकूगु पक्षयात चीकाः झीगु नितिं ल्वःगु लकस दय्कावनेगु खँ दनि । नेपाली जनतां सामाजिक न्यायया, सुरक्षाया व दक्वं कथंया अधिकारया सुनिश्चितता जुइगु कथं छु छु कानून दय्केफइ धइगु खँय् नं जिगु अनुभवं तिबः बी । 
 
छिगु क्षेत्रया दकले तःधंगु समस्या वा चुनौती छु खंकादिया ?
६ नम्बर क्षेत्रया खँ ल्हाय्बलय् देशया राजनीतिया अवस्था धात्थें हे बांलाः धाय्मछिं । विजोग हे धाय्माः, दयनीय हे जुयाच्वंगु दु । थज्याःगु अवस्थाय् स्वनिगःयात बांलाकेगु नितिं स्वइगु प्रतिनिधित्व महसूस याय्गु अवस्था खनेमदु । अय्जूगुलिं ६ नम्बर क्षेत्र विशेष कथं बागबजार, असं, थँबहिनिसें कयाः लैनचौर स्वय्गु खःसा येँया नुगःचु हे खः । थज्याःगु नुगःचुइ न विकास निर्माणया ज्या जूगु दु, न छुं पूर्वाधार हे बांलाःगु खनेदु । पर्यटकिय क्षेत्रया रुपय् म्हसियाच्वंगु थँबहि क्षेत्रया अवस्था नं दयनीय जुइधुंकल । थँबहिलिइ व्यवस्थित दय्केमाःगु, विकास याय्माःगु यक्व खँ दु । प्राय दक्वथाय् धइथें लःया हे समस्या, धःया समस्या, सडकया समस्या, ट्राफिक व्यवस्थापनया समस्या, बजार व्यवस्थापन मदु, समस्यै समस्या दु । सरोकारवाला संस्थात नं दु । अज्याःगु संस्थातलिसे नं समन्वय यानाः न्ह्याःवनेगु, छगू गुरुयोजनालिसें न्ह्याःवनाः थज्याःगु समस्यायात चीकाछ्वय्माःगु दु ।
 
मूलभूत रुपं थनया पर्यटकिय स्थलयात नं बांलाकेगु योजना नं दु । खुसिया सरसफाइ यानाः ल्याय्म्हलिसें ज्येष्ठ नागरिक वनेगु च्वनेगु कथंया पार्क दय्केगु, खुसि सिथय् सडक मदुथाय् दय्केछिंथाय् सडक दय्केगु, दुगु सडकया अवस्था भिंकेगु, थनया सामुदायिक स्कूलय् गुणस्तरीय शिक्षा बीकेगु, व्यवहारय् आधारित शिक्षाया अभ्यास, शिपमूलक तालीम काय्गु थाय् विकास याय्गु, शिक्षा नं बीगु तालीम नं बीगु कथंया ज्या याय्माःगु अवस्था नं दु । 
स्वनिगःया म्हसीका धयागु हे थनया सम्पदा खः । थुकथंया सम्पदाया संरक्षण, प्रवद्र्धनपाखे छुं योजना दु ला ?
 
थनया सांस्कृतिक धरोहरया रुपय् दयाच्वंगु संस्कृति ल्यंकेगु, गुथिया संरक्षण याय्गु, थनया बहाःबहि बांलाकेगु, हितियात माःगु मर्मत सम्भार यानाः लः हाय्केगु व थनया संस्कृति, सभ्यताया संरक्षण यानाः न्ह्याकायंकेगुपाखे जिगु योजना दु । झीगु म्हसीका धयागु थ्व हे खः । अय्जूगुलिं नेपाल व नेपालीया पहिचान, उकीसनं थनया आदिवासीया पहिचानयात संरक्षण याय्गु जिगु व सकलसिगु दायित्व नं खः धइगु जितः ताः । व थःवगु दायित्व निर्वाह याय्त खँय् जि न्हापा नं गबलें लिचिलागु मदु, आः दत्तचित्त जुयाः थुकी न्ह्याःवने ।
 
देशय् दुने अवसर मदयाः ल्याय्म्हत धमाधम देशं पिहांवनाच्वंगु अवस्था दु । थ्व अवस्थायात कयाः छिगु छु योजना दु ?
 
ल्याय्म्हतय्त देशय् दुने तयाः उमिगु सीप व ज्ञानया सदुपयोग याकेबीमाः धयागु खँय् जि न्हापानिसें हे सचेत । नेपाल प्रहरीइ दुबलय् नं ल्याय्म्हतय्त कुलत, कुसंगतय् मलाय्मा, उमिसं थःगु ज्ञान, सीपयात सहि ढङ्गं छ्यलाः देय्यात छुं लबः बीमा धयागु कथं न्ह्यज्याकेत कुतः यानागु दु । आः ला झन थ्व पक्षयात बेवास्ता याय्गु पक्कां जुइमखु ।
 
थन च्वंपिं ल्याय्म्हतय् सृजनशीलता सित्तिं मवनीगु लकस नं दय्केमानि । उकिया नापं ल्याय्म्हतय् थन हे रोजगार दइगु, थन हे च्वनाः स्वरोजगार जुइगु लकस नं दय्केमानि । लिसें विज्ञान व प्रविधि आधारित जनशक्ति व क्षमतायात थन हे च्वनाः विश्व बजारय् धेंधें बल्लाः याय्फइगु कथं दक्ष जनशक्ति उत्पादन याय्गुपाखे जिं बिचाः यानातयागु दु । 
 
छखे देय्या अर्थतन्त्र बांमलाःगु स्थितीइ दु धइगु खँ वयाच्वंगु दुसा मेखे आर्थिक समृद्धिया नारा थ्वय्काच्वंगु अवस्था दु । देय्या अर्थतन्त्र सुधार याय्त, आर्थिक समृद्धिया नितिं छिं छु गुकथंया ज्या यानादी ?
 
थौंकन्ह्या ई धयागु ला सूचना प्रविधिया बः कयाः थनया स्थानीय बजारयात अन्तर्राष्ट्रियकरण याय्फइगु अवस्था दु । झीगु जःलाखला देय्या आर्थिक अवस्था स्वल धाःसां उपिं गनं गन थ्यनेधुंकल । समुद्रय् दुने रेल ब्वाकेधुंकल । अज्याःगु देय्लिसे स्वानाच्वनापिं झीसं अनं नं यक्व लबः कायेफइ । उद्योग, व्यवसायया खँ ल्हाय्मा, पर्यटनया खँ ल्हाय्मा, स्थानीय उत्पादनया खँय् हे जुइमा, झीसं थन याय्फुगु यक्व ज्या दु । झीगु अवस्था आयातमुखी जुयाच्वंगु दु, निर्यातयात थकाय्माल । 
झीगु दकले बल्लाःगु आधार धइगु थनया स्थानीय श्रोतसाधन हे खः । थनया आदिवासी उत्पादन, स्थानीय जडिबुटी आदि कथंया स्थानीय श्रोतयात भरपूर सदुपयोग यानाः देशयात फाइदा बीफइ । थ्व क्षेत्रय् न्हापा नं गुलिखे संस्थां ज्या न्ह्याकूगु खनेदु तर, व निरन्तर मजुल । दुगु बजेटतक हे सदुपयोग मजुल । थनथाय् सक्षम संयोजनकारी भूमिकाया नं अभाव खनेदत । थज्याःगु दक्व अवस्थायात ध्यानय् तयाः दिगो अर्थतन्त्र विकास याय्गु नितिं जिगु भूमिका दइ । 
 
दकले लिपा लहनाया पाठक, थः मतदातापिन्त छु हसना बियादी ?
 
पार्टीं घोषणा पत्र जारी याय्धुंकूगु दु । व घोषणा पत्र धयागु मतदातायात ह्ययेकाः मात्र मत काय्गु नितिं जक मखु, कार्यान्वयनय् वनेगु नितिं खः । पार्टीया घोषणा पत्रया कार्यान्वयनय् जाय्गु बचं जिमिसं बीधुन, थःगु बचं पूवंकेगु जुइ । मतदाता सकलें सचेत दु, सकसिनं थू । देश विकासया नितिं, आर्थिक समृद्धिया नितिं थःगु विवेकशील मतदान यानादिसँ । परिवर्तनया नितिं धकाः न्ह्याःवयापिं जिपिं सकलसित साथ बियादिसँ । सुभाय् ।