२०७९ मङ्सिर २१, बुधबार

‘स्मार्ट शहरया योजनायात इन्कार यानाः स्मार्ट गां दय्केमाः–राजाराम तण्डुकार

लहनान्युज | कछलागा षष्ठी ११४३, कार्तिक २८ सोमवाः

अभियन्ता राजाराम तण्डुकार नं थुगुसी चुनावी धेंधें बल्लाखय् कुहांवःगु दु । अभियन्ता तण्डुकार यल क्षेत्र नं ३ पाखें प्रतिनिधिसभा सदस्यया लागिं तुतां (लौरो) चुनाव चिं कयाः चुनावी मैदानय् कुहांवःगु खः । सामाजिक सक्रियतां थःत राजनीतिक रुपं न्ह्यःने वनेत घ्वाःगु तण्डुकारया धापू दु । थःगु सामाजिक अभियानया मुद्दायात राजनीतिकस्तरय् न्ह्यःने यंकेत थम्हं उम्मेदवारी बियागु तण्डुकारं धयादिल । सामाजिक अभियानय् थःगु सक्रियताया अनुभव, थीथी मनूतय्पाखें कयागु ज्ञान व समग्र संघर्षयात संश्लेषण यानाः सक्रिय राजनीतिइ वयागु उम्मेदवार तण्डुकारया धापू दु ।
 
तण्डुकारं स्वनिगलय् थीथी इलय् जूगु गैरन्यायिक सडक विस्तार, फास्ट ट्रयाकं ख्वना व बुंगमतीया ऐतिहासिक बस्ती संकटय् लाइगु स्थिति खनेधुंकाः उकियात पुनर्रेखांकन याय्त माग तयाः जूगु आन्दोलन, बालाजु बाईपासया आन्दोलनलिसें थीथी अभियानय् सक्रिय भूमिका निर्वाह यानादीगु खः । उलि जक मखसें न्हूपुखू (रानीपोखरी), सप्तपाताल पुखू, पलेस्वां पुखू, चाबहिल दीप संरक्षण, समय् फल्चा पुनर्निर्माणलिसें सम्पदा बचाउ अभियानय् तण्डुकारया संलग्नतां स्थानीय संघर्षय् तःधंगु उर्जा ब्यूगु खः । आन्दोलनया मुद्दा, संघर्षबारे सामाजिक सञ्जालमार्फत थःगु बिचाः तयावःम्ह तण्डुकारयात सामाजिक सञ्जालय् फलो याइपिनिगु ल्याः यक्व हे दु ।
 
थःगु सामाजिक सक्रियताया अनुभव, बिचाःया यक्व विषययात तण्डुकारं चुनावी एजेण्डाया रुपं न्ह्यःने हयादीगु दु । ‘नेवाः समुदायया बाहुल्यता दुगु थुगु क्षेत्रय् जनताया चाहना, भावना व आकांक्षायात जिं बांलाक थुइकागु दुसा मेगु समुदायया जनताया चाहना व समस्यायात नं सकितं थुइकेगु ह्वःताः चूलाःगु दु । व हे लिधंसाय् एजेण्डा दयेकागु खः’ उम्मेदवार तण्डुकारं धयादिल । यल क्षेत्र नं ३य् यल महानगरपालिकाका १ निसें ५ वडा, १०, १३, १४, १५, १८ निसें २९ सम्मया वडात लाः । अथे हे, गोदावरी नगरपालिकाया वडा नं १२ व १४ लाः ।
 
स्वनिगःया अव्यवस्थित शहरीकरण व जनसख्ंयाया चापं हःगु समस्या, प्राकृृतिक स्रोत साधनया दोहन, वातावरण स्यनावनाच्वंगुलिइ चिन्ता प्वंकुसें उम्मेदवार तण्डुकारं धयादिल, ‘स्मार्ट शहरया योजनायात इन्कार यानाः स्मार्ट गां दय्केगु विषययात बः बियागु दु ।’ फास्ट ट्रयाकलिसेंया आयोजनां ख्वना व बुंगमतीया ऐतिहासिक बस्ती संकटय् लाइगु धासें वय्कलं फास्ट ट्रयाकया पुनर्रेखांकन याय्त नं थम्हं उम्मेदवारी बियागु धयादिल । मातृभाषा माध्यमं ब्वंकेगु व्यवस्था, हस्तकलाया विकास, पुलांगु बस्तीइ स्वबासी व भूमी सम्बन्धी समस्यायात समाधान याय्माःगु विषयस तण्डुकारं थःगु प्रतिबद्धता प्वंकादिल ।
 
चुनावी एजेण्डाया मुख्य बुँदागत शीर्षकय् भ्रष्टाचार न्यूनीकरण, सुशासन अले जनमुखी संसद्, भाषा, संस्कृति व सम्पदाया समृद्धि, स्थानीय सरोकारया सहजीकरण, ल्याय्म्ह खेलकूद व रोजगारी अले उद्यमशीलता, सिमान्तकृत पुचःया अधिकार व सामाजिक न्याय, जनमैत्री सन्तुलित विकास व वातावरण संरक्षण, कृषिया विकास व राष्ट्रिय सुरक्षाया विषय दु ।
 
अथे हे, थःगु प्रतिबद्धतापत्रय् संविधान पुनर्लेखन, समानुपातिक समावेशी, संघीयता कार्यान्वयनया एजेण्डा दुथ्याकूगुलिं नं मेगु पार्टीया उम्मेदवारलिसें तुतां चिं कयाः चुनाव मैदानय् कुहांवःपिनिगु दथुइ नं तण्डुकारयात फरक रुपं म्हसीकूगु दु । तण्डुकारं प्रतिबद्धतापत्रय् धयादीगु दु, ‘संघीय लोकतान्त्रिक, गणतन्त्रयात अझ सुदृढ, पहिचान व सामथ्र्यमा आधारित संघीयताया लागिं संघर्ष याय् ।’ संविधानया धारा ५७ या ५य् तयातःगु प्रावधान स्वायत क्षेत्र, संरक्षित क्षेत्र व विशेष संरक्षित क्षेत्रयात कानून दय्काः कार्यान्वयन याय्माःगुलिइ प्रतिबद्धतापत्रमार्फत बः बियादीगु दु । ‘स्थानीयया पीर, मर्का थुइकागु दु । थःगु एजेण्डा स्पष्ट रुपं तयागु दु । सामाजिक क्रियाशीलतां यक्वसिया विश्वास मुंकागु दु । थ्व हे जिगु चुनाव त्याकेगु मुख्य आधार खः’ उम्मेदवार तण्डुकारं धयादिल ।
Categorized in राजनीति