नेपालभाषा एकेदेमिं दान्यहिरा सिरपाः लःल्हाःगु दु ।

उगु ज्याझ्वलय् दान्यहिरा जीवंकाःछि सिरपाः, दान्यहिरा संगीत सिरपाः व दान्यहिरा विज्ञान प्रविधि सिरपाः लःल्हाःगु खः । एकेदेमिया चान्सलर यज्ञरत्न धाख्वाःया सभाध्यक्षताय् जूगु ज्याझ्वलय् मूपाहां कथं झायादीम्ह पुलांम्ह मन्त्रीलिसें बुद्धिराज वज्राचार्यं उगु सिरपाः लःल्हानादीगु खः ।

ज्याझ्वलय् मदुम्ह वाङमय शताब्दी पुरुष सत्यमोहन जोशीयात ‘दान्यहिरा जीवंकाःछि सिरपाः’ (लाइफटाइम एचिभेन्ट), नांजाःम्ह वरिष्ठ संगीतकार मनराजा नकःमियात ‘दान्यहिरा संगीत सिरपाः’ व डा. केशरीलक्ष्मी मानन्धरयात ‘दान्यहिरा विज्ञान प्रविधि सिरपाः’ लःल्हाःगु खः । वय्कःपिं स्वम्हेसितं न्यय्द्वः तका दां व दसिपौलिसें उगु सिरपाः लःल्हाःगु खः ।

सिरपाः एकेदेमिया चान्सलर धाख्वाः स्वनादीगु खः । एकेदेमिया सदस्य सचिव डा. पुष्पराज राजकर्णिकारं थःगु जीवन एकेदेमिया निंतिं पानादीगु नापं एकेदेमि दुने हे कलाकार अरनिको ग्यालरी, नेवाः एफएमया संचालन, नेवाः खँग्वः धुकूया प्रकाशन थेंज्याःगु ज्वःमदुगु योगदानया कदर यासें शताब्दी पुरुष जोशीयात जीवंकाःछि सिरपाः लःल्हानागु जानकारी बियादिल ।

अथे हे संगीतकार नकःमियात नेपालाभाषा संगीत ख्यलय् बियादीगु योगदान व डा. मानन्धरयात नेपालय् न्हापांखुसी म्हुकंचा खेती व न्हू न्हूगु प्रविधि दुत हयादीगुलिं सिरपाः लःल्हाःगु जानकारी बिउगु दु । शताब्दी पुरुष जोशीयात लःल्हाःगु सिरपाः वय्कःया कायपिं अनुराज जोशी, हेमन्त जोशी व म्ह्याय् गंगा मुल्मीं लःल्हाना कयादीगु खःसा डा.मानन्धरं थःत लःल्हाःगु सिरपाःया दां नेपालभाषा परिषदयात लःल्हानादीगु खः ।

नाष्टया प्राज्ञिक दुजः डा. दिनेशराज भुजुं लिसें थीथी व्यक्तित्वपिंसं नुगःखँ तयादीगु ज्याझ्वलय् मनराजा नकःमि, रत्नशोभा महर्जन, सरिता शाही लगायतं सांगीतिक प्रस्तुति न्ह्यब्वयादीगु खः ।

Categorized in राष्ट्रिय