देय्या नीति निर्माण तहलय् थ्यंकेत जिगु उम्मेदवारी खः –अमृत खड्का
नृपेन्दलाल श्रेष्ठ | कछलागा सप्तमी ११४३, कार्तिक २९ मंगलवाः
ल्याय्म्ह अवस्थाय् हे यलया सैबु गाउँ विकास समिति अध्यक्षया जिम्मेवारी कःघाःम्ह अमृत खड्का आसन्न आम निर्वाचनय् यलया क्षेत्र नं ३ या उम्मेदवार जुयादीगु दु । वय्कःलिसे जूगु खँल्हाबल्हाया सम्पादित ब्वः
छिगु उम्मेदवारी छाय् ?
जि २०४५ सालनिसें अनेरास्ववियुइ संगठित जुयाः २०४६ सालया जनआन्दोलनमा होमे जुयाम्ह व उगु हे इलय् घाःपाः जूम्ह मनू खः । राजनीतिक जीवनयात न्ह्यःने यंकेगु झ्वलय् जिं २३ दँया उमेरय् २०५४ सालय् सैंबु भैंसेपाटी गाउँ विकास समितिया अध्यक्षया भूमिका निर्वाह याना । सामाजिक जीवनया अनेक क्षेत्रय् निरन्तर क्रियाशील जुयाच्वनागु दु । आः पार्टीया वागमती प्रदेश कमिटी सदस्यया रूपं जिम्मेवारी निर्वाह यानाच्वनागु दु । आः देय्या नीति निर्माण तहलय् थ्यंकेत जिगु उम्मेदवारी खः ।
छि ला छम्ह उद्यमी, छाय् राजनीतिइ आकर्षित जूगु खः ?
जि आः नेपाल निर्यात व्यवसायी महासंघया मू छ्यान्जे दु । अथे ला जि चीधिकःबलय्निसें राजनीतिइ दु । २०४६ सालय् हे जिं तत्कालीन नेकपा मालेया पार्टीया सदस्यता कयागु खः । अथे मजूगु खःसा २०५४ सालय् गाविस अध्यक्ष जुइमखूगु जुइ । नापं जि ज्याय् विश्वास याइम्ह मनू खः । सायद अय्जुयाः उद्यमीया रूपं नं थःगु परिचय दय्केफुगु खः । तर, उद्यमी जुयाः, उकिया बलय् राजनीतिइ वयागु धाःसा पटक्क हे मखु । थुकिया लागिं ला जिगु विगतया पृष्ठभूमि स्वःसां गाः ।
छिं यानादियागु न्ह्यथनेबहःगु ज्यात धाय्माःसा छु छु दु ?
जि सैंबु गाविसया अध्यक्ष जुयागु हे इलय् जिमिसंसैंबु आवास आयोजना सफल दय्का । आः थ्व आवास योजना थुगु क्षेत्रया जनताया गर्व याय्बहःगु जूगु दु । आवास दुने संघीय मन्त्री, प्रदेश मुख्यमन्त्री व प्रदेश प्रमुखया निवासया निर्माण लिपांगु चरणय् थ्यंगु दु ।
ल्याय्म्हतय्त नेपालय् हे लजगाः बीमाः दय्माः धइगु आज्जुं सलंसः ल्याय्म्हतय्त व्यवसाय याय्त प्रेरित यानागु दु । देय्या थीथी भागय् वनाः कृषि, जडीबुटी, वन पैदावार व खानीया क्षेत्रय् गुकथं ज्या याय्फइ, उकियात गुकथं आय–आर्जनलिसे स्वाय्फइ धकाः समुदायलिसे जानाः ज्या यानागु दु । देय्या अर्थतन्त्रया परनिर्भरता न्हंकेत उत्पादन व निर्यात थकाय्त छु छु याय्फइ धइगु विषयस दुग्यंगु अध्ययन यानागु दु, मेखे सामाजिक ज्याय् नं दुथ्यानाच्वनागु दु । थःगु थासं फक्व ग्वहालि यानागु दु ।
देय्या अर्थतन्त्र सुधारया नितिं छु याय्फइ ?
नेपालय् दय्कूगु कयौं उत्पादन नीति अभावया हुनिं विश्व बजारय् थ्यंकेमफयाः अथें लोप जुइगु अवस्थाय् दु । देय्या मौलिक उत्पादनयात थप प्रोत्साहित याय्गु नीति निर्माण व निर्यात वृद्धिया लकस दय्के आवश्यक दु । झीसं चीधंगु मानसिकता दय्काच्वन धाःसा न्ह्याबलें आयातं जक झीगु अर्थतन्त्र फय् फइमखु । उकिया लागिं निर्यातय् हे बः बीमाः । हाकनं राजनीतिइ
सुधार मयाःसे, देय्या विकासया स्पष्ट सोच दुपिं नापनापं न्ह्याःमवंकं परिवर्तन सम्भव मदु । थुकिया लागिं नं जिगु उम्मेदवारी खः ।
चुनावी प्रचारय् जुयाच्वनाबलय् मुख्य कथं छु छु विषय न्ह्यःने हयादियागु दु ? थुगु क्षेत्रया विकासया लागिं एजेन्डा छु खः ?
न्हापांगु खँ ल्हा जिं थुगु क्षेत्रया समस्यायात दुग्यंक अध्ययन यानागु दु । व उकिया समाधानया लागिं आधार तयार यानागु दु । पूर्वाधार विकासनिसें, सामाजिक सुरक्षातक्कया विषयस जिके स्पष्ट योजना दु । जनसंख्या व भूगोलया अनुपातयात लिधंसा दय्काः शहरी क्षेत्रया विकास याय्गु व गुणस्तरीय सेवा बीगु अवस्था दय्केगु जिगु प्राथमिकता खः । मेखे स्वास्थ्य सेवाया
सहज पहुँच स्थापित याय्गु व उकियात सर्वसुलभ दय्केगु जिगु बिचाः खः ।
धातुकला, काष्ठकला, मूर्तिकला, प्रस्तरकला, थाङ्का यलया थःगु हे विशिष्ट म्हसीका खः । थन ति मौलिक शैली मेथाय् मदु । थ्व कला झीगु म्हसीका जक मखु, हलिमय् झीत म्हसीकेगु माध्यम तकं खः । झीगु परिश्रमी ल्हातं दय्कूगु थुगु मौलिक धातुकला, काष्ठकला, मूर्तिकला, प्रस्तरकला, थाङ्का विश्व बजारय् छ्वय्त अनलाइन रिटेल सेन्टर चाय्केमाः । थ्व अःपुक जुइगु ज्या मखु ।
थ्व क्षेत्रय् अथाह सम्पदा, मौलिक कला संस्कृति दु । थ्व कला, संस्कृतिया उपयोग यानाः आर्थिक उपार्जन व लजगाः सिर्जना मेगु प्राथमिकता खः । अथे हे, यलया बुङ्गमती, ख्वना, थेचो, थैब, हरसिद्धि, सुनाकोठी, पिम्बहाः थुज्वःगु सम्पदा स्थलयात पर्यटकीय हबया रूपं विकास यानाः पर्यटकया बसाईँ ताःहाकय्केफइ । ख्वना, थेचो व बाँडेगामय् उत्पादन जुइगु चिकंयात अन्तर्राष्ट्रियस्तरया मापदण्ड अनुरूपया दय्केफइ । अथे हे, थनया मौलिक बाजं, यल महानगर दुने दकले अ प्वः न्ववाइगु नेपाल भाषाया संरक्षण, दक्वं जातजातिया गुथि, दाफाखलःयात आत्मनिर्भर दय्केफइ ।
मेखे, भुखाचं ध्वस्त जूगु सम्पदाया पुनर्निर्माणयात तच्वःगु गतिइ न्ह्यःने यंकेगु, मौलिक संस्कृतिया संरक्षण व विकासय् उल्लेख्य ज्या याय्फइ । नेपालय् गुलिखे जडीबुटी लोप जुइगु अवस्थाय् थ्यंगु दु । थ्व चिन्ताया विषय खः । जिमिसं जडीबुटी उत्पादन, बजारीकरण, निर्यातय् आधारित रोजगारी सिर्जना याय्फइ ।
छिगु चुनावया आधारत छु छु खः ?
छम्ह कुशल नेता धयाम्ह हे म्ह्वः न्ववाय्गु व यक्व ज्या याय्गु खः । नेतां न्ववाःगु खँयात पूवंके मफुत धाःसा उकिया छुं हे अर्थ मदु । छुं नं विषयस प्रभावकारी ज्या याय्त जनताया समस्यायात न्यनाः अनुसन्धनात्मक रूपं समाधान याय्त न्ह्यज्याय्मा । ततःसलं देय्या लागिं थय् याय्माः, अय् याय्माः धकाः भाषण याय्गु तर उकियात व्यवहारय् कार्यान्वयन मयाय्गु परिपाटी न्हंकेमाः । जि भाषण यानाः जुइगु स्वयां देय्या आवश्यकता म्हसीकाः ज्याया माध्यमं थःत प्रमाणित याय्यःम्ह खः ।
जि थनया हे चाय् बुयाः ब्वलंम्ह खः । जनतां छु गज्याःगु माग अले अपेक्षा याइ धइगु थुइकाः ज्या याय्गु जिगु न्हापांगु दायित्व जुइ । जि राजनीतिकर्मी लिसें छम्ह उद्यमी व समाजसेवी नं जूगुलिं अनुसन्धान यानाः हे ज्याया निर्णय याय् । जिगु विगत व भविष्यया योजनाबारे आम मतदातां बांलाक थू । वय्कःपिन्सं पाय्छि निर्णय यानादी धइगुलिइ जि विश्वस्त दु । आम मतदाताया विश्वास हे जिगु जितया आधार खः ।
