ऐतिहासिक, धार्मिक,  कृतिक सम्पदा मरुसतः अर्थात काष्ठमण्डप दय्केत न्ह्यःने वःम्ह व्यक्ति तत्कालीन बागमती प्रदेशया सभासद् राजेश शाक्य खः ।

भाषा आन्दोलन व नेपाल सम्वतया आन्दोलनय् नं ताः ई न्ह्यःनिसें सक्रिय जुयाच्वंम्ह राजेश शाक्य थुगुसीया संसदीय निर्वाचनय् नं येँ क्षेत्र नम्बर ८ (१) पाखें प्रदेश सभा सदस्यया नितिं उम्मेदवारी बियादीगु दु । शाक्यया थ्वयां न्ह्यः सांसद जूबलय्या अप्वःथे ई काष्ठमण्डप पुनर्निर्माणय् हे बित ।

उकिं यानाः शाक्यं नाम वलकि हे मनूतय्सं मरुसतः लुमंनी। खला, प्रदेशसभाया न्हापांगु निर्वाचनया इलय् शाक्यं मरुसतः पुनर्निर्माणयात थःगु प्रतिबद्धताया न्हापांगु ल्याखय् तयादीगु खः । मरुसतःया पुनर्निर्माण सरकारी प्राथमिकताय् मलानाच्वंबलय् काष्ठमण्डप पुनःनिर्माण समितिइ च्वनाः नेतृत्व हे कयाः ज्या याय्गु खँ धाःसा थःगु कल्पनां पिनेया खँ जुयाच्वन । प्रदेश सांसद जुइधुंकाः शाक्ययात परिस्थितिं पुनर्निर्माण समितिया नायः जुइगु स्थितिइ थ्यंकूगु खः । उगु इलय् महानगरपालिकाया आर्थिक अनुदान व शाक्य नेतृत्वया समितिया क्रियाशीलताया हुनिं भुखाचं थुनाब्यूगु करिब न्हय्दँ लिपा बल्ल मरुसतःया पुनर्निर्माण जूगु खः ।

मरुसतः पुनर्निर्माण जुइधुंकाः उकिया अवलोकन याय्गु झ्वलय् राष्ट्रपति विद्यादेवी भण्डारीनिसें तत्कालीन प्रधानमन्त्री केपी शर्मा ओलीलिसें नं सम्पदा क्षेत्रय् गौरव याय्बहःगु ज्या धकाः न्ववाःगु खः । ठेक्काय् दय्केत स्वःबलय् अनुमानित लागत १९ करोड तका धाःगुलिइ ११ करोड तक जक पुनर्निर्माणय् खर्च जूगु खः ।

न्हापाया निर्वाचनय् थःगु १३ प्रतिबद्धता मध्ये पूरा मजूगु छगू थुगुसी पूवंकेत थः न्ह्यज्याय्गु शाक्यं धयादिल । भाषा आयोगया सिफारिस कथं वागमती प्रदेशय् नेपालभाषा व तामाङ भाषायात कामकाजी भाषा दय्केगु थःगु न्हापाया प्रतिबद्धता थुगुसी पूवंकेगु वय्कःया योजना दु । प्रदेश सरकारया लेटर प्याडय् नेपाल संवत् व रञ्जना लिपि छ्यय्केबीगु, स्वनिगःया वस्तुस्थिति कथंष गुठी विधयेक हय्गु, युवा रोजगारी व मनमती खुसि करिडोर विकास याय्गुलिसेंया प्रतिबद्धता नं वय्कलं न्ह्यःने हयादीगु दु ।

Categorized in राजनीति