स्वांछपु बालाचः¥हे खलःपाखें नेपालभाषा दबू प्याखं ख्यःया नांजाःम्ह निर्देशक नाप कलाकार गणेश साय्मियात हनेज्या याःगु दु ।

खलःपाखें बालाचः¥हे नखःया झ्वलय् लाकाः वय्कःयात हनेज्या याःगु खः। खलःया नायःलिसें पुलांम्ह १७ वडाअध्यक्ष विजयबहादुर मालीया सभाध्यक्षताय् जुगु उगु ज्याझ्वलय् मूपाहांकथं येँ महानगर १७ वडाअध्यक्ष नविन मानन्धरं गणेश साय्मियात स्वांमाः क्वखायेकाः हनापौ देछानादीगु खः ।

खलःया दुजः योगेन्द्रमान श्रेष्ठं सम्मानित व्यक्तिया जीवनी व हनापौ ब्वनाः न्यंकादीगु खःसा सिद्धार्थ मालीं खलःयात न्याद्वः तका दां आर्थिक ग्वाहालि यानादीगु खः ।

समाजसेवा नापं त्वाःबहाःयापिनिगु हरेक ज्याखँय् उसिं मचासे थौं ७७ दँया ज्याथःगु वैंशय् नं उतिकं ग्वाहालि यायेत न्ह्यचिला च्वनादीगुलिं वय्कःयात उकथं हनेज्या यानागु खलकं जानकारी बिउगु दु ।

सम्मानित व्यक्तित्व साय्मि, वडाअध्यक्ष मानन्धरं नुगःखँ तयादीगु ज्याझ्वलय् खलःया संरक्षक नारायणभक्त श्रेष्ठलिसें ज्यासना पुचःया दुजःपिं व त्वाःबहाःयापिनिगु उपस्थिति दुगु खः ।

Categorized in राष्ट्रिय