२०८१ आषाढ ३१, सोमबार

मोरक्को नकाआउट चरणय्

राम डंगोल | थिंलाथ्व नवमी ११४३, मंसीर १६ शुक्रवाः

क्यानडायात ३–१ गोलं पराजितयासे मोरक्को समूह एफया विजेता जूया कतारय् जुयाच्वंगु फिफा विश्वकपया नकाआउट चरणय् थ्यःगु दु।

साविक उपविजेता क्रोएसिया, बेल्जियम दुथ्याःगु टिम दथुइ समूह एफय् अपराजित जूसे मोरक्को न ७ अंक काःगु खः। अल थुमामा रंगशालय् जुगु कासाय् मोरक्कोया लागि हाकिम जिउचं कासाया ४ मिनेटय् गोल याःगु खःसा युसुफ एन नेस्रीं २३ गु मिनेटय् गोल याःगु खः।

मोरक्कोया नाएफ अगुएर्ड न ४० गु मिनेटय् छगु आत्मघाती गोल याःगु खः । आः जुयाच्वंगु विश्वकपय् थ्व हे न्हापागु आत्मघाती गोल जूगु दु। अथेहे थुगु विश्वकपया सच्छिगु गोल न थ्व हे गोलपाखे पूरा जूगु दु।

मोरक्को ३६ दँ लिपा विश्वकप फुटबलया नकआउट चरणय् प्रवेश याःगु खः।

Categorized in कासा