युवा बौद्ध समूह, येँ व लुम्बिनी नेपलीज बुद्ध धर्म सोसाइटी, युकया मंकाः ग्वसालय् जुगु  ‘मानसिक स्वास्थ्यया लागि बुद्ध शिक्षा’ विषयक निबन्ध प्रतियोगिताय् त्याःपि च्वमिपिन्त छगु ज्याझ्वःयासे सिरपाः लःल्हागु दु।

झींप्यम्ह च्वमिपि दुगु उगु कासाय् पुष्प रत्न तुलाधर न्हाप, दीना कंसाकार ल्यु व जमुना गोसाइ ल्युयाल्यु जुगु खः। अथेहे हपाः सिरपाः सरोज कुमार बज्राचार्ययात लःल्हागु खः। सिरपाःया राशि न्हापयात च्याद्धः, ल्युयात खुद्धः, ल्युयाल्युयात प्यद्धः व हपाःयात निद्धः तका लःल्हागु खः।

उगु ज्याझ्वलय् बुद्ध विहार प्रमुख भिक्षु कोडण्य महास्थविरं निरोगी जुइत भगवान् बुद्धं इन्द्रिय संयम, भोजन मात्रा ज्ञान व जागरुकतायात बःबियादीगु धका धयादीगु खः। वयकलं धयादीगु दु बुद्ध शिक्षाया सार हे जीवन म्वायेगु कला खः।

युवा बौद्ध समूहया सल्लाहकार डा. त्रिरत्न मानन्धरं ल्याय्म्हपिन्त च्वयेगु कला विकास यायेगु कथं  बेलायतया धर्मानुरागी पासापिनिगु ग्वाहालि निदँय् छकः जीवनोपयोगी विषय बिया निबन्ध प्रतियोगिता सञ्चालन यायेगु जानकारी बियादीगु खः।

सोसाइटीया संस्थापक अध्यक्ष अमृत रत्न स्थापितं हरेक मनू तयेगु मानसिक समस्या दुगु तथ्ययात ध्यानय् तया आः पश्चिमा देशं न विपश्यना ध्यानयात उपचारय् छगु विधिया रुपय् मान्यता बिइ धुकुगु दु धका धयादीगु खः।

Categorized in राष्ट्रिय