थ्व हे पुस २३ गत पोहेलागा पारु  शनिबार कुन्हु नेवाः पत्रकार राष्ट्रिय दबूया प्यक्वःगु महाधिवेशन जुइत्यःगु दु। उगु महाधिबेसनया लागि निर्वाचनया ज्याझ्वः न्ह्यायेत्यःगु दु।

अधिवक्ता किरण शाक्यया संयोजकत्वय् निर्वाचन समिति गठन जुगु खः। उगु समितिइ वरिष्ठ पत्रकार सुरेशकिरण मानन्धर व ईश्वरकुमार जोशी दुजः कथं च्वनादीगु खः।

समितिं लेखा समितिया लागि स्वम्ह नाप ३१ म्ह केन्द्रीय समितिया लागि निर्वाचन जुइत्यःगु दु । समितिें निर्वाचन कार्यतालिका कथं मतदाता नामावली म्हिगः आईतबाः मतदाता नामावली प्रकाशित याये धुकुगु दु। २८ जिल्लाया महाधिवेशन प्रतिनिधिपिनिगु नां सार्वजनिक याये धुकुगु दु। मतदाता नामावलीइ दाबी विरोधया लागि थौं सोमबाः ११ बजे तक ई बियागु दु धका संयोजक शाक्यं जानकारी बियादीगु दु।

वयालिपा मतदातापिनिगु अन्तिम नामावली प्रकाशित जुइ धका समितिं धाःगु दु। अथेहे उम्मेदवारया दर्ताया निति थ्व हे पुस १५ गते शुक्रबाः याइगु जुगु दु। उम्मेदवारपिनिगु नां दाबी विरोध, नां लितः कायेगु प्रक्रिया उगु हे दिं बहनि ६ः३० बजे अन्तिम नामावली प्रकाशित यायेगु धका समितिं धाःगु दु।

अथेहे समितिं महाधिवेशनया लागि दक्को तयारी न्ह्या वनाच्वंगु जानकारी बियादीसे महाधिवेशनया उलेज्याय् थीथी विधाय् क्रियाशील पत्रकारपिन्त सिरपाः लःल्हाइगु व संस्था संस्थापकपिन्त हने ज्या दु धका पत्रकार दबूया अध्यक्ष सुरजवीर बज्राचार्य न लहनान्युजयात धयादीगु दु। पत्रकार दबूया महाधिवेशन लोगो न प्रकाशित याये धुकुगु दु।

Categorized in राष्ट्रिय