मेसी सर्वकालीन महान् फुटबलर
प्रजित शाक्य | पोहेलाथ्व सप्तमी ११४३, पुस १४ बिहीवाः
क्रिस्टियानो रोनाल्डो व लियोनेल मेसी दथुइ सर्वश्रेष्ठ कासामिया प्रतिस्पर्धा विश्व फुटबलय् दकले तःधंगु चर्चाया विषय खः । वंगु १५ दँ न्ह्यःनिसें थुगु पुस्ताया निम्ह महान् फुटबलर मेसी व क्रिस्टियानो रोनाल्डो दथुइया प्रतिद्वन्दीता नं सुनां मस्यूगु मखु । थुपिं निम्हेसिया प्रतिद्वन्दीतां विश्व फुटबलया स्तर हे थकाःगु दु । यद्यपि थुपिं निम्हमध्ये सु सर्वश्रेष्ठ धइगु गबलें क्वमचाइगु बहस न्ह्यानाच्वनीगु खः तर, आः डेढ दशक न्ह्यःनिसेंया थुपिं निम्हमध्ये सु सर्वश्रेष्ठ धइगु बहस क्वचाःगु दु धाःसां पाइमखुत ।
वंगु वालय् क्वचाःगु कतार विश्वकप २०२२ अर्जेन्टिनां त्याकल । अर्जेन्टिनां विश्वकप त्याकल तर उकियात मेसीया विश्वकपया रुपं लुमंकेगु याइ । छाय्धाःसां उपाधि यात्राय् मेसीया कासा चमत्कारी जूगु खः । मेसीं कतार विश्वकपय् न्हय्गू गोल यात । स्वंगू गोललय् ग्वहालिमिया भूमिका म्हितल । थुकिं नं खकेफइ अर्जेन्टिनायात च्यामिपयन दय्केत मेसीया योगदान । फाइनलय् जक हे वय्कलं निगू गोल यात । मेसीं न्हापांगु खुसी विश्वकपया उपाधि त्याकूगु खः । थ्वयां न्ह्यः विश्वकप उपाधि मदयाः हे मेसी व रोनाल्डोयात महान् कासामिया धलखय् तय्त आनाकानी जुयाच्वंगु खः । विश्वकप उपाधिं थुपिं निम्हेसित डिएगो म्याराडोना थुज्वःम्ह सर्वकालीन महान् फुटबलरया समकक्षय् थ्यनेत पनाच्वंगु खः । तर आः म्ह्वतिं मेसी विश्वया सर्वाधिक महान कासामिया धलखय् लाःगु दु ।
सन् १९८६ इ डिएगो म्याराडोना अर्जेन्टिनायात थःगु थःगु दमय् विश्वकपया उपाधि बियाः फुटबल जगतय् अमर जूगु खः । थुगुसी मेसीं उकथंया हे कासा म्हिताः थःत सर्वकालीन महान् कासामिया धलखय् तल । विश्वकप उपाधियात करीब १८ दँ न्ह्यःनिसें पियाच्वंम्ह मेसीं हिम्मत त्वःतेमज्यू, विश्वकप फुटबल थुज्वःगु महान् धेंधें बल्लाः त्याकेत मुश्किल फय्माः अले ताः ई पीमाः धइगु हसना नं ब्यूगु दु । आः विश्वकप उपाधिलिसें मेसी निसन्देहः सर्वकालीन महान् फुटबल कासामिया रुपं अमर जुइगु पक्का जूगु दु ।
मेसीं थःगु कासा जीवनय् न्हय्क्वः विश्वया सर्वश्रेष्ठ फुटबलरयात बीगु बालन डि ओर नं त्याकूगु दु, गुगु कीर्तिमान खः । थुगुसी विश्वकप त्याकाः हाकनं छक्वः मेसी हे थुकिया प्रमुख दावेदारया रुपं दंगु दु । मेसीं प्यक्वः च्याम्पियन्स लिग नं त्याकूगु दु ।
खय्तला मेसीं सन् २०१४या विश्वकप फाइनल नं म्हितूगु खः । व इलय् वय्कलं हे धेंधें बल्लाःया सर्वश्रेष्ठ कासामियात बीगु गोल्डेन बल त्याकल । तर जर्मनीलिसे १–० गोलं बूबलय् उपाधिं वञ्चित जुइधुंकाः मेसीं उपाधीया नितिं अझ पीमाःगु खः । थ्व दथुइ बार्सिलोना व आःया क्लब पेरिस सेन्ट जर्मनया लागिं वय्कःया लय च्वय्क्वय् जुयाच्वन । तर ३५ दँया मेसीं थःगु सर्वश्रेष्ठ कासा थ्व हे विश्वकपया लागिं ल्यंकाः तयातल ।
थहांवनाच्वंगु उमेरय् आः मेसी ९० मिनेट हे कासाय् दबाब दय्काः म्हिते फइमखु । अथेसां वय्कः जादुमय कासा, पास व गोलं आः नं कासाया निर्णय याय्गु याः । कतारय् वय्कलं न्हय्गू गोल यात । तर वय्कःया एसिस्ट अझ लुमंकेबहःजू । नेदरल्यान्ड्सविरुद्धया क्वाटरफाइनलय् नाहुला मोलिनां याःगु गोलया लागिं वय्कलं मिले याःगु पास अकल्पनीय खः ।क्रोएसियाविरुद्ध युलियन अल्भाराजें याःगु गोल नं मेसीं डिबक्सय् क्यंगु शानदार ड्रिब्लिङं सम्भव जूगु खः ।
विश्वकपय् मेसीं १३ गोल यानाः सर्वाधिक गोलकर्ताया धलाय् थःत प्यंगूगु थासय् थंगु दु । आः वय्कः जस्ट फन्टाइनलिसे ज्वलिंज्वलय् थ्यंगु दु । वय्कः स्वयां न्ह्यः जर्मनीया मिरोस्लाभ क्लोज (१६ गोल), ब्राजिलया रोनाल्डो (१५ गोल) व पश्चिम जर्मनीया गर्ड मुलुर (१४ गोल) दु । मेसी अन्तर्राष्ट्रिय गोलया शतकं नं निगू गोल जक तापाःनि । वय्कलं १७२ खेलय् ९८ गोल याःगु दु । सर्वाधिक अन्तर्राष्ट्रिय गोलकर्ताया धलखय् नं वय्कः स्वंगूगु थासय् लाःवःगु दु । पोर्चुगलया रोनाल्डो (११८ गोल) व इरानया अली दाईं (१०९ गोल) जक मेसीं स्वयां अप्वः गोल याःगु दु ।
मेसी गरीब परिवारं विश्व प्रशिद्ध जूम्ह कासामि खः । मजदुर अबु व सफाइ कर्मचारी मांया सन्तानं बांलाःम्ह फुटबल प्रशिक्षणया म्ह्वः हे जक चूलाकेफइ । तर मेसी भाग्यमानी खः । न्यादँया उमेरय् हे वय्कलं अबु जोर्जया प्रशिक्षणय् दुगु स्थानीय क्लब ग्रान्डोलीया लागिं फुटबल म्हितेगु न्ह्याकेधुंकूगु खः, गुगु उमेरय् मेपिं बांलाक ब्वाँय् नं वनेफइमखु । मेसीया अबु जोर्ज मेसी फ्याक्टरी कामदार जूसां फुटबलया शौखिन खः । मेसीयाके फुटबल म्हितेगु प्रकृतिपदत गुण दुगु खः, गुकिं चीधंगु उमेरय् हे तःगू हे शीर्ष क्लबया मिखा वय्कःयाके जूवन । यद्यपि ११ दँया उमेरय् वय्कःयात ‘ग्रोथ हार्मोनी डिफिसियन्सी’ नांया ल्वचं ज्वन गुकिं मेसीया फुटबल म्हितेगु सम्भावना हे म्ह्वः जूगु खः ।
थ्व ल्वचं ज्वनेधुंकाः शरीर थहांवनेत माःगु हार्मोनया उत्पादन माक् ल्याखय् जुइमखु । व हे इलय् नं अर्जेन्टिनाया प्रिमियर लिग क्लब रिभर प्लेटं मेसीयात क्लबय् हय्त स्वःगु खः । तर क्लबं मेसीया वासः याय्त तुइगु लय् गुसः डलर पुलेगु साहस मक्यन । अज्याःगु इलय् बार्सिलोनाया कासा निर्देशक चाल्र्स रेक्साख देवदुत जुयाः वल । वय्कलं बार्सिलोनाय् मेसीया ‘ट्रायल’या व्यवस्था ताःलाकाबिल । बार्सिलोनां ट्रायल धुंकाः तुरुन्त हे मेसीयात थःगु एकेडेमीइ भर्ना यात तरm बार्सिलोनां वय्कःया परिवार स्पेनय् स्थानान्तर जुइगु जूसा जक मेसीयात वासः याय्गु खर्च पुलेगु शर्त तल ।व इलंनिसें मेसी व वय्कःया परिवार युरोपय् स्थानान्तर जुलसा मेसीं बार्सिलोनाया ल्याय्म्ह टिमया लागिं म्हितेगु न्ह्याकल ।
मेसीया म्हितेगु क्षमता अर्जेन्टिनाय् मखु, स्पेनय् विकास जुल । यद्यपि मेसीं उपाधिया खुसिबाः वय्काः बार्सिलोनाया गुण पुला बीधुंकल धाःसां ज्यू । मेसीं सन् २००५य् स्पेनया नागरिकता नं काःगु खः । यद्यपि वय्कः राष्ट्रिय टिमया लागिं फुटबल म्हितीबलय् न्ह्याबलें थः बूगु देय् अर्जेन्टिनाया जर्सीइ हे म्हिती । वंगु वालय् ला वय्कलं अर्जेन्टिनायात विश्वकप विजेता नं दय्काबिल ।
