श्री भाष्करदेव संस्कारित केशचन्द्रकृत पारावत महाविहार संरक्षण समाज, इतुंबहाःया झिंन्हय्क्वःगु साधारण सभा जुगु दु।

समाजया सल्लाहकार प्रा. स्वस्तिरत्न शाक्यया सभाध्यक्षताय् जूगु उगु ज्याझ्वलय् येँ क्षेत्र नं ८ या प्रतिनिधिसभा सदस्य विराजभक्त श्रेष्ठ मूपाहांकथं झायादीगु खः ।साधारणसभाय् समाजया नायः प्रज्ञारत्न शाक्यं वार्षिक प्रगति विवरण न्ह्यब्वयादीगु खःसा दांभरिं रुपकुमार शाक्यं आर्थिक विवरण न्ह्यब्वयादीगु खः ।

महाविहारया चक्रेश्वर, मूथाय्पा, थाय्पापिनिगु विशेष उपस्थितिइ जूगु ज्याझ्वलय् मूपाहां संघीय सांसद श्रेष्ठ व विशेष पाहां बागमति प्रदेशसभा सदस्य शैलेन्द्रमान वज्राचार्यं इतुंबहालय् महाविहारं न्ह्याका वयाच्वंगु व न्ह्यनाच्वंगु आवश्यक ज्याखँया निंतिं थःपिंसं फूचाःगु ग्वाहालि यायेगु जुइ धयादिल । झी नेवाःतय्गु कला, संस्कृति, सम्पदा, सभ्यता ल्यंका तयेत झी थः हे न्ह्याज्यायेमाःगु नापं झीगु थाय्बाय्या अस्तित्व नं ल्यंका तयेगु दायित्व झीगु हे जूगु वय्कःपिंसं धयादीगु दु ।

थौंकन्हय् थःगु त्वाः, थाय्बाय्, बहाः बही त्वःताः पिने च्वं वनेगु प्रवृत्तिं यानाः झीगु थासय् पिनेच्वंपिंसं हाली मुहाली यानाच्वंगु खँय् चिउताः प्वंकादिसें अज्याःगु थाय्बाय्यात नं पुस्तान्तरण याना वनेमाःगु खँय् वय्कःपिंसं बः बियादीगु दु ।

येँ मनपा २४ वडाध्यक्ष विनोदकुमार राजभण्डारीं भिंतुना न्वचु बियादीगु ज्याझ्वलय् महाविहारया चक्रेश्वर ओमरत्न वज्राचार्य, मूथायपा मणिरत्न शाक्य, थायपाजुपिं अमीररत्न शाक्य, बोधिरत्न शाक्य, सानुबावु शाक्य, विजेन्द्र शाक्य, रवि शाक्य, तेजरत्न शाक्यया नं उपस्थिति दुगु खः । साधारण सभां समाजया विधानया छुं छुं दफा संशोधनया निंतिं प्रस्ताव नं पारित याःगु खःसा थीथी व्यक्तिपिंसं आवश्यक सुझाव नं बियादीगु खः ।

Categorized in राष्ट्रिय