पोखरा दुर्घटना जुगु यती एयरलाइन्सया विमान आइतबाः सुथय् १०ः३२ बजे त्रिभुवन अन्तर्राष्ट्रिय विमानस्थलपाखे ब्बःगु खः।

क्याप्टेन कमल केसी नेतृत्वया चालक दलं ब्बकूगु उगु जहाज १०ः५० बजे लिपागु पटक पोखरा टावरनाप सम्पर्क याःगु खः। सेती खोँचपाखे याःगु सम्पर्कय छगु मिनेट दुने हे दुर्घटना जूगु धका विमानस्थल नागरिक उड्डयन कार्यालयं धाःगु दु।

कार्यालयया छम्ह अधिकारीया कथं क्याप्टेन केसीनाप सम्पर्कय् पोखरा टावरया एयर ट्राफिक कन्ट्रोलरं रनवे ३० य् ल्याण्ड यायेत इनाप याःगु खः। तर, केसीं मेगु रनवे फ्वःगु खः धका उम्ह अधिकारीं धाःगु दु।

‘रनवे थ्री जेरोमार्फत ल्याण्ड यायेत धाःगु खःसा क्याप्टेनं उगु मखु १२ पाखे वये धका मेगु रनवे माःगु खः’, उम्ह अधिकारीं धाःगु दु, ‘मेगु रनवेपाखे मिले यायेगु झ्वलय् हे दुर्घटना जुल।’ दुर्घटना छु जुया जुगु खः धका आःतक न सिइ मदुनि।

Categorized in राष्ट्रिय