सभामुखय् नेकपा एमालेया देवराज घिमिरे निर्वाचित जूगु दु।

प्रतिनिधिसभाय् थौं बिहीबाः एमालेया घिमिरेयात सभामुखय् निर्वाचित यायेत तःगु प्रस्तावय् पक्षय् १६७ व विपक्षय् १०० मत वंगु खः।

प्रतिनिधिसभाया २७५ मध्ये २६८ म्ह मतदानय् सहभागी जूगु खः। छम्ह जक सांसद तटस्थ च्वंगु खः। घिमिरेयात सभामुख दयकेगु निति पक्षय् नेकपा एमाले, नेकपा माओवादी केन्द्र, राष्ट्रिय स्वतन्त्र पार्टी, राष्ट्रिय प्रजातन्त्र पार्टी, जनता समाजवादी पार्टी, जनमत पार्टी, नागरिक उन्मुक्ति पार्टी व स्वतन्त्र सांसदपि अमरेशकुमार सिंह, प्रभु साह व योगेन्द्र मण्डलं मतदान याःगु खः।

सभामुखय् नेपाली कांग्रेसया ईश्वरी न्यौपाने न उम्मेदवारी बिःगु खः। तर न्हापा हे घिमिरेया उम्मेदवारीय् मतदान जुगुलि बहुमत वयेवं ईश्वरीया उम्मेदवारीइ छलफल हे मजुगु खः। वयकःयात नेपाली कांग्रेस, एकीकृत समाजवादी, लोकतान्त्रिक समाजवादी व राष्ट्रिय जनमोर्चां समर्थन याःगु खः। घिमिरे झापा–२ पाखे सांसदय् निर्वाचित जूगु खः।

Categorized in राष्ट्रिय