२०७९ माघ २०, शुक्रबार

प्रचण्डयात विश्वासया मत बिया गल्ती याःगु दु –कांग्रेस नेता शेखर कोइराला

लहनान्युज | सिल्लाथ्व पारु ११४३, माघ ८ आईतवाः

नेपाली कांग्रेसया नेता शेखर कोइरालां प्रधानमन्त्री पुष्पकमल दाहाल प्रचण्डयात विश्वासया मत बिया गल्ती याःगु दु धका धाःगु दु।

संस्थापनइतर पक्षया नेतापिनिगु जुयाच्वंगु बैठकय् सम्बोधन यायेगु झ्वलय् नेता कोइरालां विश्वासया मत बिया पार्टी बिया गल्ती याःगु दु धका धाःगु खः । थम्हेसिया तटस्थ च्वनेगु धका तयाःगु प्रस्तावय् सुनुवाइ मयास्ये बहुमतं निर्णय यासे प्रधानमन्त्रीयात विश्वासया मत बिःगु धका धाःगु खः। ‘प्रधानमन्त्रीयात विश्वासया मत बिइ मजुगु खः। बिया गल्ती याःगु दु।

तटस्थ च्वने धका जिं प्रस्ताव तयागु खः’, कोइरालां धाःगु दु, ‘कार्य सम्पादन समितिइ जि प्रस्ताव तयाःगुलि सुनुवाइ मजु। बहुमतं विश्वासया मत बिइगु निर्णय यायेवं उकियात माने यायेगु बाध्यता खः।’ सभापति शेरबहादुर देउवाया प्रस्तावय् कांग्रेस केन्द्रीय कार्यसमिति बैठकं प्रधानमन्त्री प्रचण्डयात विश्वासया मत बिइगु निर्णय याःगु खः।

कांग्रेसया महामन्त्रीपि विश्वप्रकाश शर्मा व गगन थापानाप प्यम्ह नेतापिन्स निर्णय असहमति प्वकूगु खः। लिपागु राष्ट्रिय राजनीतिइ पार्टी दुने आन्तरिक विषय छलफल यायेत कोइरालापक्षपिनिगु बैठक बत्तीसपुतलीइ जुयाच्वंगु दु।

Categorized in राजनीति