२०७९ माघ २०, शुक्रबार

कांग्रेसं प्रमुख विपक्षी दल थःपिनिगु दाबियासे पौं लःल्हात

लहनान्युज | सिल्लाथ्व पारु ११४३, माघ ८ आईतवाः

नेपाली कांग्रेसं प्रमुख विपक्षी दलयात वइगु सेवा सुविधा मागयासे संघीय संसद सचिवालयय् निवेदन बिःगु दु। संघीय संसद सचिवालयया अधिकारी कथं प्रमुख विपक्षी दल व विपक्षी दलया नेता कथं दइगु सेवा सुविधाया लागि कांग्रेसं सांसद सुविधा व्यवस्थापन महाशाखाय् निवेदन बिःगु खः।

निवेदनय् कांग्रेसं थःपि हे प्रमुख विपक्षी दल धका दाबी याःगु दु। प्रधानमन्त्री पुष्पकमल दाहाल प्रचण्डयात विश्वासया मत बिगुलि कांग्रेस प्रमुख विपक्षी दल खः कि मखु धइगु न्ह्यसः वयाच्वंगु खः। तर, प्रधानमन्त्रीयात विश्वासया मत बिगु पार्टी विपक्षी दल जुइ फइमखु धका नेपाल मजदुर किसान पार्टी न विपक्षी दलय् मान्यताया लागि सभामुखयात निवेदन बिइ धुकुगु दु।

प्रमुख विपक्षी दलया नेतायात पारिश्रमिक बाहेक विशेष भत्ता, बैठक भत्ता, सञ्चार सुविधा अन्तर्गत टेलिफोन, इन्टरनेट व पत्रपत्रिकाया लागि मासिक रकम, आवास सुविधा बापत्त मासिक २५ हजार ६०८, फर्निचर खर्च, निजी सचिवालय बन्दोबस्त खर्च, गार्ड छेँ, सवारीया लागि इन्धन सुविधा, मोविल, मत व लःया खर्च, दैनिक भ्रमण भत्ता, यात्रा बिमा लगायतया सुविधा दइ।

विपक्षी दलया नेतायात स्वकीय सचिव, कम्युटर अप्रेटर, कार्यालय सहयोगी व सवारी चालक निम्ह÷निम्ह, सैनिक प्रहरी जवान सिपाही १० म्ह, विल्लादार गार्ड व अंग रक्षक छम्ह÷छम्ह दइगु ब्यवस्था दु। अतिथि सत्कार खर्च, कार्यालयय् कम्युटर नाप निगु साइकल सुविधा न विपक्षी दलया नेतायात दइ।

Categorized in राजनीति