यल महानगरपालिका १६ वडा कलाकार समितिं ससुपूजाया लसताय् श्रीपञ्चमी शास्त्रीय नखःया ग्वसा ग्वःगु दु ।

थ्व हे वइगु विहिवाः यलया मंगःया दरवार क्षेत्रया कात्ति दबुलिइ थुगु ज्याझ्वः जुइत्यःगु खः। ज्याझ्वलय् लोकंह्वाःगु सांगीतिक पुचः प्रोजेक्ट बाजा नेपाल, प्लेयिङ फर चेञ्ज नेपाल व वाद्यशिरोमणी संगीत घरानां शास्त्रीय संगीतया थीथी सृजना न्ह्यब्वइसा १६ वडा कलाकार समितिया हे ग्वसालय् जूगु हुलाप्याखं कासाया सिरपा त्याकामि विशाखा शाक्यं मञ्जुश्री चचाप्याखं न्ह्यब्वयादी ।

सनिलया ५ बजे न्ह्याकेगु धयातःगु थुगु ज्याझ्वलय् नवनिर्वाचित नेवाः पत्रकार राष्ट्रिय दबू केन्द्रीय समिति व नेवाः देय् दबू यल कचायात भिंतुना देछायेगु ज्याझ्वः नं दुगु ग्वसाः खलः समितिया कजिं सुरजवीर बज्राचार्यं लहनान्युजयात कनादिगु दु । १६ वडाया अध्यक्ष निर्मलरत्न शाक्यया नायःसुइ जुइत्यःगु खः।

कलाया विकास व कलाकारपिन्त हःपाःया नितिं निदँ न्ह्यः यल महानगरपालिका १६ वडां कलाकार समिति नीस्वंगु खःसा थुकिं अनलाईन म्ये व हुलाप्याखं कासा, येँया पुन्हीया लसताय् सांस्कृतिक ज्याझ्वः, होलीया मेला, न्हूदँ हना सांस्कृतिक ज्याझ्वः, न्ह्याकाः वयाच्वंगु दुसा १६ वडाया कलाकारपिन्त कला प्रशिक्षणया नितिं कला स्यनाकुथि (पाठशाला) नं न्ह्याकाः वयाच्वंगु दु ।

Categorized in मनोरन्जन