चिनाखया ख्यलय् पलाः न्ह्याकावया च्वंपिं नेवाः मिस्त दथुइ “सृजनात्मक च्वज्या व कविता लेखन” यात कया शनिवाः छगू कार्यशाला जूगु दु ।

किपूया हिलसाइड होटेल एण्ड रिसोर्ट्स जूगु उगु मुंज्या नेपालभाषा एकेडेमीया साहित्य कवःया ग्वसालय् जूगु खः । भाषाह्यःमि डा ज्योतिप्रभा तुलाधरया संयोजन व सहजीकरण यानादीगु उगु मुंज्याय् ग्वसाखलःया साहित्य कवः कजि त्रिरत्न शाक्यं लसकुसयासे देशया शासन प्रणाली हिले धुंकल धइगु अनुभूति खस भाषायापिं छथ्वः त्वता नेवाः भाय् लगायत मेमेगु भाय्या साहित्य सृजनाख्यलय् अनुभुत मजूनि धका धयादिलसा नेपालभाषा एकेडेमीं थज्यागु लकसय् छुं नं ज्याय् थाकुया च्वन धका धयादिल ।

ज्याझ्वलय् मुंज्या संयोजक तुलाधरं नेपालभाषा एकेडेमी थेंज्यागु नेवाः तयेगु गौरवशालि प्राज्ञिक संस्थां छुं ज्या यायेत स्रोतं साधन मगाना च्वंगु दु धका न्यना नुगः मछिन धका धासे एकेडेमीया ग्वसालय् थुकथं न्हूपिं पुलांपिं मिसा चिनाखँमि मुंका कार्यशाला जूगु यात च्वछाया दिल ।

सहसंयोजन कवि रजनीमिलां यानादीगु खःसा मुंज्याय् कवियत्री प्रतिसरा सायमिं मिसा छम्ह साहित्यकारया जीवनय् वइगु हाथ्या व च्वज्याय् निरन्तरताया बारे खँ तयादिल। मुंज्याया लिपांगु चरणय् नांजाम्ह चिनाखँमि व संचाःकःमि सुरेशकिरण मानन्धरं आधुनिक चिनाखंया विषयवस्तु व प्रस्तुतिकरण व नांजाम्ह साहित्यविद् व संचाःरकःमि रमेशकाजी स्थापितं चिनाखंय् ध्वनि, छन्द व लय् बारे खँ कनादिल ।

न्हूपि व पुलांपिं मिसा चिनाखँमि पिनिगु ब्वति दूगु उगु मुंज्याय् शोभा महर्जन, रश्मी नापित, हिसिलिना शाक्य, शिमला शर्मा, मिनर्वा शर्मापिन्स ब्वति काःगु खः । न्हापांगु चरणया ज्याझ्वलय् एकेडेमीया भाइस चान्सलर मल्ल के सुन्दर, सदस्य सचिव डा पुष्पराज राजकर्णिकार लगायत एकेडेमीया कार्य समिति दुजःपिनिगु नं विशेष ब्वति दूगु खः । आः थ्व मुंज्या मेगु ब्व कथं याकनं हे मिसा च्वमिपिनिगु चिनाखं ब्वज्या जुइगु खँ नं उगु मुंज्यां क्वछिउगु दु।

Categorized in राष्ट्रिय