नेपालभाषा स्टार म्यूजिक भिडियो अवार्ड
बिराजकाजी राजोपाध्याय | सिल्लागा तृतीया ११४३, माघ २५ बुधवाः
वइगु माघ २९ गते नेपालभाषाया म्यूजिक भिडियो ख्यःया नितिं छगू विशेष दिन जुइ । नेपालभाषाया म्यूजिक भिडियो ख्यलय् सक्रिय कलाकःमिलिसें कलाह्यमित सकलें छथाय् मुनाः थुगु दिनयात हनीगु जुइ । थुगु दिनय् येँया कमलादीस्थित प्रज्ञा भवनया दबुलिइ नेपालभाषा स्टार म्यूजिक भिडियो अवार्डया निगूगु संस्करण जुइत्यंगु दु।
अय्जुयाः थ्व दिन झीगु नितिं, नेवाः कलाकःमि व कलाह्यमितय् नितिं विशेष खः । म्ये, म्यूजिक भिडियो, संकिपाया दथुइ अवार्ड बीगु ज्या जुयाच्वनी । गुलिसिया नितिं थ्व साधारण खँ जुइफु । दर्ता, दर्ता जूगु म्येया दथुइ नोमिनेसन, नोमिनेसनय् लाःपिनि दथुइ छम्हेसित पुरस्कृत याय्गु कथं अवार्ड जुइ, थुकी छु विशेष धकाः मेपिन्सं धाय्फु ।
तर आर्थिक रुपं छुं नं आशा मतःसे थःगु मातृभाषाप्रतिया भावना व प्रेम जक तयाः नेवाः कला ख्यलय् सक्रिय जुयाच्वंपिनिगु नितिं थज्याःगु अवार्ड छगू तःधंगु हःपाः खः । उकिया नापं थ्व अवार्ड झीगु नितिं विशेष मेगु छगू कारणं नं खः । नेपालभाषाया संकिपा व म्यूजिक भिडियो ख्यलय् दकले ताःहाकःगु व तःधंगु धयातःगु थ्व अवार्ड हलिमय् हे दकले ताःहाकःगु व तःधंगु अवार्ड कथं वल्र्ड रेकर्ड हे नं दाबी यानातःगु दु । यदि दाबी कथं रेकर्ड हे जुल धाःसा हलिमय् दकले तःधंगु अवार्ड कथं नेवाः म्यूजिक भिडियो अवार्डया नामं ‘नेपालभाषा स्टार म्यूजिक भिडियो अवार्ड’ या नां च्वंवनी ।
हलिमय् थीथी ख्यःया आपालं अवार्डत जुयाच्वंगु दु । उकीमध्ये छुं छुं अवार्ड हलिंया कुंकुलामय् तसकं नांजाः । व अवार्ड त्याकेगु जक मखु, नोमिनेसनय् लाय्गु तक नं तसक गौरवया विषय कथं काः । अवार्ड अथवा सिरपाःया खँ ल्हाय्बलय् नोबेल प्राइज हलिमय् दकले प्रतिष्ठित सिरपाः कथं काइ । व हे कथं संकिपा ख्यलय् आस्कर अवार्ड नं प्रतिष्ठित अवार्ड खः ।
अथे हे, एकेडमि अवार्ड, पुलिट्जर अवार्ड, फिल्ड्स अवार्ड नं नांजाः । संगीत ख्यलय् ग्रामी अवार्ड, बिलबर्ड म्यूजिक अवार्ड नं नांजाःगु अवार्ड कथं काः । जःलाखला देय् भारतय् स्वय्गु खःसा फिल्मफेयर अवार्ड संकिपाया ख्यःया बांलाःगु अवार्ड कथं काः । अथे हे, जि सिनेमाया जी सिने अवार्ड नं नांजाःसा आइफा अवार्डयात भारतया दकले तःधंगु संकिपा अवार्ड कथं न्ह्यःने यंकेत स्वयाच्वंगु दु । नेपालय् नं थीथी अवार्डत जुयाच्वं । कामना पत्रिकां कामना अवार्ड यानाच्वंगु दु । अथे हे, डि सिने अवार्ड छगू इलय् बय्बय् जूगु अवार्ड खः । संगीत ख्यलय् हिट्स एफ एमया हिट्स अवार्ड, इमेज च्यानलया ईमेज अवार्ड आदि नं जुयाच्वंगु दु । छगू प्रतिष्ठित वा गौरवया विषय जुइफुगु कथं नेपालय् छुं अवार्डया नां काय्गु मदुसां आपालं अवार्डत जुयाच्वंगु धाःसा दु ।
थज्याःगु अवस्थाय् नेपालभाषाया कला ख्यलय् ला अवार्ड झन हे कम । हलिमय् नोबेल प्राइज धाय्थें न्हापा नेपालभाषाया साहित्य ख्यलय् श्रेष्ठ सिरपाः गौरवया विषय जुइगु खः । थ्व सिरपाः थौंकन्हय् निरन्तर जुइफयाच्वंगु मदु । संगीत ख्यलय् न्हापा न्यू ट्यालेन्ट धइगु संस्था न्यू ट्यालेन्ट नेपालभाषा म्ये अवार्ड ज्याझ्वः याःगु खः । लिपा नांया खँय् आन्तरिक विवाद जूबलय् थुकिया निगूगु संस्करण कथं दि ट्यालेन्ट नेपालभाषा म्ये अवार्ड नं यात । वयां लिपा थ्व निरन्तर जुइमफुत । ईमेज च्यानलया ईमेज अवार्डय् नं न्हापा नेपालभाषा म्येया छगू क्याटगरीइ अवार्ड बीगु यानाच्वंगु खः । तर लिपा वनाः थ्व क्याटगरी हे चीकाछ्वल ।
नेपालभाषाया रंगीन बाःछिपौ पेजथ्रीपाखें प्यदँय् छक्वः पेजथ्री नेपालभाषा पिपुल्स च्वाइस अवार्ड यानावःगु दु । उकी नेपालभाषाया संगीत, म्यूजिक भिडियो व संकिपा स्वंगुलिं ख्यःयात कःघानाः अवार्ड बीगु यानाच्वंगु दु । थ्व अवार्डया प्यंगू संस्करणतक्क जुइधुंकूगु दु । आः संसार क्रिएसन्सपाखें नेपालभाषा स्टार म्यूजिक अवार्ड यानावःगु दु । करीब स्वदँ न्ह्यः थुगु अवार्डया न्हापांगु संस्करण जूगु खःसा आः वइगु माघ २९ गते निगूगु संस्करण नं जुइत्यंगु दु ।
थुगु अवार्ड याय्गु नितिं विशेष यानाः संसार क्रिएसन्सया क्रिएटिभ डाईरेक्टर, नेपालभाषा कला ख्यःया कलाकःमि स्वतन्त्र संसार महर्जनया सक्रियता दु । वय्कःया कुतलं थ्व अवार्ड जूगु वा जुयाच्वंगु खः धाय्माः । थ्व अवार्डयात हलिंया हे दकले ताःहाकःगु व तःधंगु अवार्ड कथं वल्र्ड रेकर्ड दय्केगु स्वतन्त्रया बिचाः दु । ज्याझ्वःया घोषणानिसें कयाः ज्याझ्वःलिसे स्वाःगु सहायक ज्याझ्वःत यायां ताः ई ज्याझ्वः निरन्तर जुयाच्वनीगु ताःहाकःगु ज्याझ्वः अले म्यूजिक भिडियोलिसे सम्वन्धित दक्व धइथें बिधात दुथ्याकाः दकले अप्वः विधाय् अवार्ड बीगु दकले तःधंगु ज्याझ्वः याय्गु बिचाः स्वतन्त्रया खः ।
‘थ्व रेकर्ड नेवाः म्यूजिक भिडियो व संकिपा ख्यःया नितिं खः । नेवाः कला ख्यः व कलाकारतय्त अन्तर्राष्ट्रिय स्तरय् पहिचान बीत जिं थ्व रेकर्ड तय्त स्वयागु खः’ स्वतन्त्रं धयादिल, ‘न्हापा अवार्डया न्हापांगु संस्करणय् कोरोना महामारी व लकडाउनया हुनिं योजना पूवनेमफुत । थुगु पालय् लक्ष्य हासिल जुइगुलिइ आशावादी दु ।’
थ्व अवार्डया घोषणानिसें कयाः आःतक्कया खँ ल्हाय्बलय् अवार्डया नितिं म्ये दर्ता व वयां लिपा सहभागी सकलसित दसिपौ वितरण, नोमिनेसन घोषणा, नोमिनेसनय् लाय्त ताःलाःपिन्त दसिपौ व मेडल वितरण, अवार्डया प्रचारात्मक ज्याझ्वः कथं संसार अवार्ड कप फुटबल आदि ज्याझ्वःत जुइधुंकल । आः माघ २९ गते अवार्ड वितरणया मू ज्याझ्वः जुइत्यंगु जुल । थुकथं घोषणानिसें मू ज्याझ्वःतक्क थ्यंबलय् करीब खुला ई बीधुंकल । मू ज्याझ्वः धुंकाः नं मेगु छुं ज्याझ्वः जुइगु खःनिला धइगु खँ नं दनि । ईया ल्याखं थुकथं दकले ताःहाकःगु अवार्ड ज्याझ्वः दय्केगु कुतलय् ग्वसाः खलः दुगु जुल ।
उकिया नापं दकले तःधंगु अवार्ड ज्याझ्वः धकाः नं दाबी यानातःगु दु । थुगु अवार्डय् ३२ ला क्याटगरी हे दुगु जुल । मेमेगु अवार्डय् छगू क्याटगरीइ साधारणतया न्याम्ह नोमिनिज दइ । थुकी छगू क्याटगरीइ झिम्ह÷झिम्ह नोमिनेसनय् तःगु दु । उकी दुने गायक, गायिका, संगीतकार, रचनाकार, संगीत संयोजकनिसें कयाः रेकर्डिङ स्टुडियो अले म्यूजिक भिडियोया कलाकार, निर्देशक, प्राविधिकनिसें प्रोडक्सन हाउसयात तकं दुथ्याकातःगु दु । धार्मिक तथा देशभक्ति म्ये विधाया क्याटगरीइ धाःसा झिंन्याम्ह नोमिनेसनय् तःगु दु । अथे हे, अवार्डया निगूगु संस्करणय् ख्यालि जुजु मदनकृष्ण श्रेष्ठयात लाइफटाइम अचिभमेन्ट अवार्ड बीगु जूगु दुसा न्हय्म्ह वरिष्ठ कलाकःमियात बीगु संसार सप्तरंगी कला सम्मान थुगुसी नं बीगु जूगु दु । वहे कथं थुगुसी संसार तेज स्मारक कला सम्मान थप जूगु दु । थुकी न्याम्हेसित सम्मान याय्त्यंगु दु ।
थुगु सम्मानपाखें कलाकःमिलिसें नेवाः कला ख्यःया प्रचारय् ग्वहालि ब्यूगु धासें पत्रकार श्याम स्मृत व लहना मिडियायात नं सम्मान याय्त्यंगु दु । उलि जक मखु, थौंकन्हय् दकले चर्चित म्ये सालुगु गाचाया पुचःयात संसार खोकना प्रतिभा कला सम्मानपाखें सम्मानित याइगु जूगु दु । खँ थुलिं जक नं सीधइमखुनि । अवार्डय् दुथ्याःगु म्येया दुने दकले अप्वः म्ये निर्देशन व कोरीयोग्राफी याःम्ह आराध्यालक्ष्मी खड्गी, युट्युबय् दकले अप्वः स्वःगु म्ये राजमति कुमति (फिमेल भर्सन) व दकले अप्वः म्ये अपलोड जूगु युट्युब च्यानल ज्योति म्यूजिक नं विशेष सम्मानं सम्मानित जुइगु जूगु दु । थुकथं म्यूजिक व म्यूजिक भिडियो ख्यःया छुं नं क्षेत्रयात मत्वःतूसे दकले तःधंगु अवार्ड ज्याझ्वः दय्केगु कुतः नं जूगु दु ।
छगू कुतः न्ह्याःवंगु दु, पलाः न्ह्याःगु दु । पलाः आज्जुतक्क थ्यनी वा मथ्यनी, अथवा आज्जुया गुलि न्ह्यःनेतक्क थ्यनी धइगु खँ ला भविष्यं कनी । तर आःयात धाःसा झीसं फक्व तिबः बीगु खः । ज्या याइबलय् गनं छुं द्वने नं फु । अज्याःगु द्वंगु थाय् गनं दत धाःसा नं उकियात भिंकावनेत छ्याता बियाः फक्व व खँक्व कथं तिबः बियाः न्ह्याःवनेमाः । मेगु छुं हे याय्मफुसां टिकट न्यानाः प्रज्ञाभवनय् वनाः ज्याझ्वः स्वःवनेगु हे नं तःधंगु तिबः जुइफु । यदि थ्व वल्र्ड रेकर्ड च्वनेफत धाःसा थ्व रेकर्ड झी नेवाः कलाकःमि, कलाह्यःमि सकलसिगु रेकर्ड जुइ । थ्व झी सकलसिगु गौरवया विषय जुइ ।
