मिसा साहित्यकार मुना पुचःया ग्वसालय् वाङ्गमय शताब्दि पुरुष सत्यमोहन जोशीयात लुमंका सत्यमोहन लुमंका साहित्यिक ज्याझ्वः जूगु दु ।

उगु ज्याझ्वः यलया बखुम्बहालय् च्वंगु शताब्दी पुरुष जोशीया छेँय् निस्वनातःगु सत्यमोहन लोक साहित्य भवनया प्राङ्गनय् जूगु खः ।

मिसा साहित्यकार मुनाया नायः अन्जना ताम्राकारया सभाध्यक्षताय् जूगु उगु ज्याझ्वलय् प्रा डा सुन्दर कृष्ण जोशी मूपाहाँ कथं झायादीगु खः ।

ज्याझ्वलय् दिव्या ताम्राकारं शताब्दीपुरुष जोशीया जीवनी व मिसा साहित्यकार मुनायाबारे म्हसीका न्ह्यब्वयादीगु खः । अथेहे लोक साहित्य परिषदया नायः राजित बहादुर श्रेष्ठ, लुम्बिनि बौद्ध विश्वविद्यालयया डिन प्रा मानिक रत्न शाक्य, साहित्यकार प्रतिसरा सायमि व लोककवि राजभाई जकःमिपिन्सं नुगः खँ तयादीगु खः ।

मीना बज्राचार्य, बद्रि बेदना, दिलबहादुर चित्रकार तुयु पुं, निजिरोस श्रेष्ठ, रिता महर्जन, सुरेश प्रधान यल, दिब्या बज्राचार्य, रामेश्वर मिश्र जलन लगायतया साहित्यकारपिन्सं थःथःगु रचना ब्वना न्यंकादीगु खः।

Categorized in राष्ट्रिय