नेवाः पुचः नारायणगढं नेवाः मिसा मचातय् इहि ज्याझ्वः याइगु जूूगु दु ।
नेवाः पुचः नारायणगढं नेवाः समुदायया हे गुरु पुरोहित द्यःबाज्यापिनिगु पाखें मंकाः कय्ता पूजा व इहि याय्त्यंगु खः । पुचलं शनिबाः नारायणगढय् पुचःया ज्याकुथिइ  पत्रकार सम्मेलन यासें मंकाः इहि व कय्तापूजा ज्याझ्वः याय्त्यनागु जानकारी ब्यूगु दु।

फागुन २५ गते मंकाः ब्रतबन्ध व फागुन २८ र २९ गते इहि ज्याझ्वः याय्त्यनागु पुचःया नायः शुक्रकुमार श्रेष्ठं जानकारी बियादिल । ‘नेवाः कर्मकाण्ड याकीपिं द्यः बाज्यापिनिगुपाखें हे संस्कार याकेमाः धकाः येँय्नं हे द्यःबाज्यापिं सःताः विधिपूर्वक मंकाः कय्तापूजा व इहि ज्याझ्वः याय्त्यनागु खः’ नायः श्रेष्ठं धयादिल ।

मंकाः इहि ज्याझ्वःया कजि सुष्मा पियां न्यादँ, न्हय्दँ, गुदँ व ११दँया नेवाः मिसा मचातय् इहि याय्त्यनागु जानकारी बियादिल ।

Categorized in राष्ट्रिय