नेपालभाषाया मनोरन्जन ख्यलय् अवार्ड म्ह्वः हे जुइगु याः । गुलिखे न्हापा जूगु अवार्ड ज्याझ्वः निरन्तर जुइमफयाः दिनावनेधुंकल । निरन्तर न्ह्यानाच्वंगु अवार्डया नां काःसा ल्याः खाय्गु नितिं छपा ल्हाःया पतिं अप्वइ । थुकथं निरन्तर जुयाच्वंगु म्ह्वः अवार्डमध्ये छगू धकाः नां काय्माःसा नेपालभाषा स्टार म्यूजिक भिडियो अवार्ड नं जूगु दु ।

संसार क्रिएसनं नेपालभाषाया म्यूजिक भिडियो ख्यलय् सक्रियपिं स्रष्टा व श्रृजनायात सम्मानित याय्गु आज्जुं न्ह्याकूगु नेपालभाषा स्टार म्यूजिक भिडियो अवार्डया निक्वःगु संस्करण येँय् क्वचाःगु दु । अवार्डया निक्वःगु संस्करणया खँ ल्हाय्बलय् निरन्तरताया नितिं जक मखु, श्रष्टा, श्रृजनाया भव्य सम्मानया नितिं नं अवार्डया निक्वःगु संस्करण जूगु धाय्फइगु कथं झःझः धाय्क, भव्य रुपं ज्याझ्वः जूगु दु ।