बुरीत, अय् बुरित मधाय्, भचा ज्याथःपिं मिसात छपुचः मुनाः खँ ल्हानाच्वन । छम्ह मिसां धाल, ‘छु याय्, जिगु ला कर्म हे खोट्टा, न्हापा ब्याहा यानाः भौ जुयाः वया, माजु मभिंम्ह लात, सुख मदु । आः काय्या ब्याहा यानाः भौ दुतहयाः माजु जुयाबलय् भौ मभिंम्ह लानाः सुख मदु ।’ देय्या परिस्थिती नं थथे हे जुयाच्वंगु दु धाय्माल आः ।

छम्ह पत्रकार, अय् मखु मखु, छम्ह नेता थौंकन्हय् चर्चाय् दु । बिचरा नेता, न्हापा संचारकर्मी जुयाः मिडियाय् च्वनाः नेतात मभिं खन, नेतातय् ब्वः बी फक्व ब्वः बिल । आः थः हे नेता जुयाः वल, आः मिडिया मभिं खन, मिडियायात ब्वः बी फक्व ब्वः बियाच्वन । म्हिगः छगू संचार गृहलय् आवद्ध जुयाः व हे मनुखं नेतातय्गु ब्वः ब्यूगु सुनां मस्वःगु खः । व हे ब्वः बिब्युं ला रवि लामिछाने धयागु नां थुलि बय्बय् जुल । यदि मिडियां छगू पक्षया हे पक्षपोषण याःगु धाय्गु खःसा वय्कःयात अथे हे ब्वः बीत थाय् हे मबीगु खइ । उगु इलय् रवि लामिछानेया नितिं मिडिया छगू शक्ति जुयाबिल ।

व हे शक्तिया आडय् चुयाः वय्कलं थौं राजनीतिइ पलाः तल । थुलि यात्राया दुने वय्कःया नागरिकता, राहदानीया विषय पिहांमवःगु नं मखु । तर, वय्कलं वास्ता नं मयाः । अःखतं थःगु नागरिकताया खँ पिकाःपिन्त ब्वः बिल । आः राजनीतिइ पलाः तय्धुंकाः व हे पुलांगु विवादित विषय नागरिकताया हे कारणं पद त्वःतेमाःबलय् वय्कः थुलि हीमही चालकि म्हिगःतक्क थम्हं चुयावयागु व दबू, व हे मिडियायात थौं लाक्वपाक्व धयाः ब्वःबिल । अले धाय्माल मखुला, म्हिगः मिडियाय् दुबलय् नेता मभिं, आः थौं थः नेता जूबलय् मिडिया मभिं ।

उलि जक मखु, थः मिडियाय् च्वनाः नेतायात ब्वःबीबलय् दक्वं ठिक, थौं थःत मिडियां पतिं ल्ह्वन धाःसा दक्वं गलत । नागरिकताया खँ जुइमा, राहदानीया खँ अथवा वय्कःया परिवारया खँ, मिडियां ल्ह्वंगु गुगु खँ गलत जुल, व वय्कलं धाय्फुगु दुला ? व ला मदु । थम्हं अस्वीकार जक याःगु दु । यदि व खँ फटाहा खँ मखूगु खःसा प्रमाणित याय्माल, मखु धइगु खःसा थः छम्हेसित जक मिडियां छुं धाय्मदु थज्याःगु खँ ल्हाय् पाय्छि जुइला ? संचार कर्म यानावःम्ह, देय्या प्यंगूगु तःधंगु दलया सभापति, न्ह्यागु धाःसां देय्या गृहमन्त्री थुज्वःगु पदय् च्वनेधुंकूम्ह मनुखं सार्वजनिक रुपं सुयां नां हे कयाः उकथं न्ववाय्गु ज्यायात पाय्छि धाय् थाकु ।

थम्हं याःसा पाय्छि, मेपिन्सं याःसा गलत धाय्गु खःसा पुलांपिं व न्हूपिं दथुइ छु पात ? संचार क्षेत्र जक पूवंक शुद्ध धइगु नं मखु तर, तरीका धाःसा बिलकुल गलत हे खः । अपराधीया हे ला पहिचान सीदय्की मखु । थःगु व्यक्तिगत खँ व विषययात कयाः उकथं संयमता त्वःते मज्यू ।