२०८० चैत्र १५, बिहिबार

लुँमधि अजिमा भद्रकालीया महिमा

प्रेममान डंगोल | सिल्लागा दशमी ११४३, फागुन ३ बुधवाः

तान्त्रिक विधि कथं पूजा यानावःम्ह लुँमधि अजिमा भद्रकाली देवीया ज्वः मदुगु महिमा दु । वसपोल भद्रकाली द्यःया नां लुँमधि अजिमा गुकथं च्वंवन धइगु सन्दर्भय् छगू किम्वदन्ति समाजय् प्रचलित दु ।
 
प्राचीन इलय् स्वनिगलय् वा पीगु इलय् छम्ह ज्यापुया वा पिनाच्वंगु इलय् छम्ह मिसा मचा बुँइ वयाः ख्वयाच्वंगु खन । उम्ह ज्यापु वनाः मचायात न्ह्याक्व ख्वय्मते धकाः ह्यय्कूसां सुम्क मच्वं । न्ह्याक्व ह्यय्कूसां सुम्क मच्वंबलय् ज्यापुं थः न्हिनय् नय्त धकाः हयातःगु मरि छपाः मचायात बिल । व मचा मरि खंबलय् ख्वय्गु त्वःताः न्हिलाहल व तत्काल हे अनं अन्तरध्यान जुल । थ्व लू खनाः व ज्यापु अजू चाल । मचायात बियागु थःगु ल्हातय् च्वंगु मरि स्वलं, व नं लुँयागु जुयाच्वंगु खंबलय् व झन अजू चाल । थ्व धुंकाः उम्ह ज्यापुं मचायात साक्षात देवी हे भाःपियाः लुँयागु मरि ब्यूम्ह जुयाः लुँमधि अजिमा धाल । थुकथं भद्रकालीयात लुँमधि अजिमा नं धाय्गु याःगु खः । 
 
ज्यापुं साक्षात देवी हे नालाकाःम्ह मचा अन्तरध्यान जूगु खँ जुजु गुणकामदेवयाथाय् तक्क हे थ्यन । जुजु गुणकामदेवं व थाय्यात द्यःया वासस्थान धकाः अन हे भद्रकाली पीठया स्थापना यात । व ज्यापु मचा रुपी देवीयात खनाः व थासय् गुम्ह गुम्ह द्यः अर्थात नवदुर्गाया स्तुति याःगु जुयाः भद्रकालीयात नवदुर्गामध्येया देवी कथं कयाः पूजा याय्गु यानावःगु दु । थुगु पीठय् सामान्य रुपया शिला छगलय भद्रकाली द्यः विराजमान जुयाच्वंगु दु । 
 
थ्व हे भद्रकालीयात चामुण्डाया रुपं नं पूजा यानावःगु दु । दुर्गा कवचय् धयातःकथं भगवतीया अनेक रुपमध्ये भद्रकाली नं छगू खः । देवी महात्म्य व दुर्गा सप्तशतीइ दुर्गायात झिंछगू नामं वन्दना यानातःगु दु । थः भक्तया भक्तिइ न्ह्याबलें लय्तायाच्वनीम्ह देवीया रुपं भद्रकालीयात पूजा याय्गु यानाच्वंगु दु । तान्त्रिक विधि कथं नित्य पूजा याय्माःम्ह थुम्ह देवीया देगलय् नवरात्रीइ भक्तजनत म्वःम्वः हे थ्यनेगु याः । थ्व इलय् विशेष रुपं थीथी विधिं तान्त्रिक पूजा याइगु जूगुलिं थन विशेष कथं हे झःझः धाइ ।
 
थः भक्तयात भद्र सुख व मंगल प्रदान याइम्ह भद्रकाली देवीयात सप्तशती देवी महात्म्य चण्डी पाठय् दुर्गायात थुकथंया झिंछगू नामं वन्दना याय्गु याइः
१) जयन्ती
२) मंगला
३) काली
४) भद्रकाली
५) कपालिनी
६) दुर्गा
७) क्षमा
८) शिवा
९) धात्री
१०) स्वहा
११) सुधा
 
दुर्गा कवचय् न्ह्यथनातःकथं भगवतीया अनेक रुपमध्ये भद्रकाली नं छगू खः । थुकियात लुँमधि स्थान नं धाय्गु याः । वंशावली कथं कलिगत सम्वत ३८२४य् येँ नगर दय्कूबलय् जुजु गुणकामदेवं देय्या रक्षा याय्गु नितिं नगरया प्यखेरं लुँमधि अजिमा (भद्रकाली), कङ्ग अजिमा (कंकेश्वरी), म्हय्पि अजिमा (ज्ञानेश्वरी), मय्ति अजिमा (मैतीदेवी), तखति अजिमा (नीलवाराही), ङतमरु अजिमा (नरदेवी), बछला अजिमा (बछलेश्वरी), लुँति अजिमा (इन्द्रायणी) स्थापना यानाः खः जात्रा न्ह्याकूगु खँ न्ह्यथनातःगु दु ।
 
भद्रकालीयात भारतय् तकं तःधंगु महत्व बियाः पूजा यानावःगु खनेदु । भारतया केरलाय् नाराणतु भ्रांतन (वँय्) या बाखं तसकं चर्चित जू । व बररुचिया काय् खः । वयाके अद्भुत शक्ति नं दु । तर व न्ह्याबलें वँय् थें भेष दय्काः जुयाच्वनी । भिक्षा फ्वनाः थःगु प्वाः थनाच्वनीम्ह खः । बहनी गन छु ध्वदुत व हे नइ, गन न्ह्यां अन हे द्यनी । तजाःगु पहाडं ल्वहँ कुर्केगु वयात तसकं यः । गनं नं पहाडय् ल्वहँ खनकि वं कुर्का हे छ्वइ । अक्सर मनूतय्सं वयात वँय् धकाः व हे कथंया व्यवहार याइ । तर व सांसारिक मायाजालं तापाः, अर्थात मुक्त जुयाच्वंम्ह खः ।
 
छक्वः चान्हसिया इलय् व मसानघाटय् थ्यन । व मनमौजीम्ह, वयात छु गां, छु मसां । वं व हे मसानय् मि च्याकाः जा थुल । छुं ई धुंकाः अन हे भद्रकाली मां बिज्यात । भद्रकाली अन मसानय् वयाः प्याखं ल्हुइगु यानाच्वनीगु खः । व मनूयात खनाः भद्रकालीं धाल, ‘हे मनू, छ थन चिलाहुँ, जि प्याखं ल्हुइमाल ।’ नाराणतुं याउँक प्याखं हु, थन यक्व चकंगु थाय् दु धकाः जा थुइगुलिइ हे व्यस्त जुयाच्वन । भद्रकालीं छ्यं संकु संकुं धाल, ‘मखु, जि प्याखं हुलेबलय् सुनां नं स्वय्मज्यू, अय्जुयाः छ थनं वने हे माः ।’
 
नाराणतु धाःसा थःगु हे धुनय् मग्न जुयाच्वन । वयागु पहः खनाः भद्रकालीं धाल, ‘सुं नं मनुखं जितः खन धाःसा वयात कि त जिं आशिर्वाद बीमाः या श्राप । का धा, छन्त जिं छु बी ।’
नाराणतुं मिइ द्यछुनातःगु जा ल्ह्वनाकाल अले धाल, ‘जितः शान्तिसाथ जा नय्ब्यु, जितः छुं नं म्वाः ।’ लिसलय् दृढ सलय् भद्रकालीं छं न्ह्यागुसां वरदान फ्वने हे माः धकाः धाल । नाराणतुं धाल, ‘अथेखःसा जिगु निर्धारित आयुइ छन्हु अप्वय्काब्यु ।’ भद्रकालीं व ला थम्हं याय्मफूगु धाल । ‘का ठिक जू, अय्सा जिगु कुल आयुइ छन्हु क्वकयाब्यु सा’ नाराणतुं धाल । देवीं थ्व खँ नं थःगु वशय् मदुगु धाल ।
 
‘उफ, अय्सा जितः याकःचा त्वःताब्यु, जितः छुं हे म्वाः’ थथे धाधां नाराणतुं ल्हाः निपां प्यपुंकल । तर भद्रकाली अनं टसमस नं मजू । हानं नाराणतुं न्हिलाः धाल, ‘का, जिगु जव तुतिया घाः देपा तुतिइ तयाब्यु ।’ भद्रकालीं अथे हे यानाबिल व थःगु लोकय् लिहांवन । नाराणतुया प्वाः जाय्क जा नल अले तुति झ्वलंकाः अन हे द्यनाछ्वत । 
भारतय् नवरात्री न्ह्यानाकथं भगवती मातायात देशय् दक्वथाय् तःजिक झःझः धाय्क छाय्पियाः उत्सव न्याय्की । हरियाणाया कुरुक्षेत्रय् छगू जक भद्रकाली पीठय् झःझः धाय्क छाय्पी । नवरात्रीइ द्यःगःयात प्यखेरं देशी विदेशी स्वानं छाय्पी, झिलिमिलि मत च्याकी । पीठया पीठाधिस सतपाल शर्माया कथं कलश स्थापनाया झ्वलय् थन ५१सः कलशया शोभायात्रा पिकाइ । थ्व हे देगलय् कृष्ण द्यःया मुण्डन याःगु धयातःगु दु । 
 
पुराणया कथं भद्रकालीया कुरुक्षेत्रय् परम शक्तिपीठ धाम दु । थुगु महाशक्ति पीठय् विशेष उत्सवया रुपं चैत्र व आश्विन महिनाय् नवरात्री न्याय्की । नवरात्रीइ माताया उपासना श्रेष्ठतम नाली । शक्तिपीठय् माता भद्रकालीया विशेष महत्व दु । शक्तिपीठ मां सतीया यःगु निवास खः, गन मांया शक्ति प्रकट जुइ । हिन्दु धर्मग्रन्थय् थज्याःगु ५२ शक्तिपीठया वर्णन दु । व मध्ये छगू हरियाणाया कुरुक्षेत्रय् श्री देवीकूप भद्रकालीया देगः दु ।
 
भद्रकाली शक्तिपीठय् देवी सतीया जव तुतिया पुलिं क्वय्या भाग कुतुंवंगु खः । यसको महत्व उबले अझ अप्वइ, गबले थुकी श्रीकृष्णया प्रसङ्ग नं स्वाइ । धाय्गु याः कि भद्रकाली शक्तिपीठय् श्रीकृष्ण व बलरामया मुण्डन जूगु खः अथे धयागु सँ खाःगु खः । पीठाधिस सतपाल शर्माया कथं भद्रकालीया देगः माता देवी कालीयात समर्पित जुयाच्वंगु दु । भद्रकाली देगलय् देवी कालीया प्रतिमा स्थापित यानातःगु दुसा देगलय् दुहांवनाकथं तःधंक पलेस्वां दय्कातःगु दु । थुकी मां सतीदेवीया जव तुतिया पुलि क्वय्या भाग तुयूगु संगमरमरं दय्काः स्थापित यानातःगु दु । 
 
पौराणिक बाखं कथं सतीदेवीं थः अबु दक्ष प्रजापतिं याःगु यज्ञय् कुब्वानाः थःगु प्राण त्याग यात । व इलय् महाद्यवं रूद्र रुप धारण यानाः सतीदेवीया म्ह कुबियाः ब्रह्माण्ड चाःहिला जुल । भगवान विष्णुं सुदर्शन चक्रं सतीदेवीया शरीरयात ५२ कुचा यानाबिल । उगु इलय् सतीदेवीया जव तुतिया पुलिं क्वय्या भाग थन हे कुवाय् कुतुंवन । अय्जुयाः थ्व देगःयात श्रीदेवी कूप देगः नं धाइ । थ्व थाय् थानेश्वरय् दु ।
 
महाभारत कालय् श्रीकृष्ण पाण्डवलिसें थुगु देगलय् वःगु खः । उमिसं युद्धय् विजयया लागिं मांयात भाकल यात । अय्जुयाः युद्ध त्याकेधुंकाः पाण्डवतय्सं थन वयाः सल दान याःगु खः । व हे इलंनिसें थन थ्व प्रथा न्ह्यानावःगु धाइ । सुं थन वयाः वहःया वा लुँया सल छाःवइ धाःसा आम जनतां चाया सल छाय्गु याः । थन प्रणव मुखर्जी, देवी प्रतिभा पाटिल सिंहलिसें कयौं
राष्ट्रपतित व अतिविशिष्ट मनूत वयाः पूजा याय्गु याः ।
 
नेपालय् धाःसा भद्रकालीया जात्रा यानावःगु दु । येँया भद्रकालीया जात्रा पाहाँचः¥हेबलय् याइ । अथे हे, पलाँतिइ नं दँय्दसं भद्रकालीया जात्रा यानावःगु दु । अथे हे, लुभुइ नं भद्रकालीया जात्रा याय्गु याः । नेपालय् थीथी थासय् दुपिं भद्रकालीया जात्रा थीथी इलय् जुयावःगु दु । माता भद्रकाली सकसिया कल्याण याय्माः ।