येँ महानगरपालिकाया जनप्रतिनिधिपिन्स संघीय व प्रदेश ऐन अखः थःपिनिगु सेवा सुविधा थःपिन्स हे थकाःगु दु।

महानगरं जनप्रतिनिधिया सुविधा सम्बन्धी ऐन–२०७९ हया मेयर, उपमेयरनाप जनप्रतिनिधिपिनिगु प्रदेशं क्वछिगु स्वया अप्पो न्हुगु शीर्षकय् सेवा सुविधा बिइगु व्यवस्था याःगु दु। सेवा सुविधायात व्यवस्थित, न्यायोचित, उपयुक्त व पारदर्शी दयेका स्थानीय सरकारया ज्या प्रभावकारिता यायेगु निति थुगु ऐन हयाःगु दु महानगरं धाःगु दु।

बागमती प्रदेश सभापाखे जारी याःगु स्थानीय तहया पदाधिकारी नाप सदस्यपिनिगु सुविधासम्बन्धी ऐन, २०७५ या दफा १२ व स्थानीय सरकार सञ्चालन ऐन, २०७४ या दफा १०२ या आधारय् थुगु ऐन हयागु धका महानगरं दाबी याःगु दु । स्थानीय सरकार सञ्चालन ऐन २०७४ या दफा १०२ य् गाउँपालिका व नगरपालिकां थःगु अधिकारक्षेत्र दुनेया विषय ऐन दयकेगु व्यवस्था दु ।

तर, स्थानीय तहया जनप्रतिनिधिपिनिगु सेवा सुविधा तोके यायेगु अधिकार नगर नाप गाउँसभाय् मदु। अथे हे बागमती प्रदेश सभापाखे जारी जूगु स्थानीय तहया पदाधिकारी नाप सदस्यया सुविधासम्बन्धी ऐन, २०७५ या दफा १२ य् सुविधा निर्धारण यायेगु इलय् तोकि यानाबिःगु स्वया अप्पो सुविधा सम्बन्धित सभां थःगु अधिकारक्षेत्र दुने आर्थिक स्रोत नाप क्षमताया आधारय् निर्धारण याये फइ धका धाःगु दु।

येँ महानगरया जनप्रतिनिधिपिन्स उगु सीमा छ्यःगु मदु। तर न्हुगु शीर्षक हया थःपिनिगु सेवा सुविधा अप्पोकूगु खः। स्थानीय तहया पदाधिकारी नाप सदस्यया सुविधासम्बन्धी ऐनय् जनप्रतिनिधिया लागि आवास सुविधा तोके यानातःगु मदु। तर महानगरं मेयर व उपमेयरयात आवास सुविधा बिइगु व्यवस्था याःगु दु।

आः मेयर व उपमेयरपिन्त आवासया लागि महानगरया थःगु हे आवासीय भवन मदु। ऐनय् थुकियात न सम्बोधन याःगु दु। निवासया लागि थःगु छेँ मदु  बालं कायेमाःगुलि कार्यपालिकां क्वछिगु कथं रकम उपलब्ध यायेगु ऐनय् उल्लेख दु । अज्यागु छेय् मर्मत–सम्भार खर्च न महानगरं याइगु व सूचु कूचुया निति न कार्यपालिकां क्वछिगु कथं रकम बिइगु जुइ।

थुगु सुविधा प्रमुख व उपप्रमुखपिनिगु पदावधि सिधःगु तिथिं न्ह्यन्हु तक बिइगु ऐनय् उल्लेख दु । थुगु सुबिधा तत्कालीन मेयर विद्यासुन्दर शाक्य व उपमेयर हरिप्रभा खड्गीं आवास सुविधा काःगु मदु।

अथे हे मेमेगु न सुविधा थपे याःगु दु। प्रदेश कानुनय् मदुगु छात्रवृत्ति, स्वास्थ्य बीमा, पोशाक भत्ता लगायतया सुविधा न थपे  याःगु दु। महानगरया जनप्रतिनिधि ज्याया झ्वलय् विदेश व स्वदेश भ्रमण यायेत १० लाख रुपैंयाया बिमा दइ व उडान करबापत लगे जुइगु खर्च न महानगरं हे बिइ।

थ्व स्वया न्ह्यःया जनप्रतिनिधिपिगु पोशाकया कार्यकालय् दच्छि १२ हजार रुपैयाँ पोशाक भत्ता वितरण याःगु खःसा उगु रकम महालेखा परीक्षकया कार्यालयं बेरुजु क्यना जनप्रतिनिधिपिन्स लित बिःगु खः।

Categorized in राष्ट्रिय