येँ महानगरपालिकाया उपप्रमुख सुनिता डंगोलं वडास्तरय् दुगु मेलमिलाप केन्द्रया स्थलगत अनुगमन व निरीक्षण यानादीगु दु ।

वडास्तरय् दुगु केन्द्रया अवस्था बारे जानकारी कायेगु ल्याखं वय्कलं सक्रिय रुपं अनुगमन व निरीक्षण यानादीगु खः । वय्कलं ११, १३, १४, १५, १६ व २६ वडाय् च्वंगु केन्द्रया निरीक्षण यानादीगु खःसा १६ वडाय् मेलमिलाप कक्षया उलेज्या नं यानादीगु खः । निरीक्षण लिपा महानगर उपप्रमुख डंगोलं सम्भव दत्तले वडा ज्याकुथिइ हे मदुसा मेगु गुगुं थासय् बालं कयाः जूसां मेलमिलाप कक्ष तयार यायेत इनाप यानादिल ।उजुरीयात निर्णय प्रक्रियाय् यंकेबलय् विवाद निष्कर्षय् पिहां मवइगु, निर्णय जूसां छगू पक्ष असन्तुष्ट जुइगु तर मेलमिलाप दिगो जुइगुलिं थुकियात प्राथमिकता बिया वयाच्वनागु वय्कलं कनादिल ।

केन्द्रयात प्रभावकारी यायेत उपप्रमुख डंगोलं वडाअध्यक्ष, वडासदस्य लगायतया जनप्रतिनिधिलिसें महिला संजालया संयोजक, वडा सचिवलिसें सहलह यानादीगु खः । त्वालय् वनाः विवाद निरुपण यानागु अनुभव कनादिसें १५ वडाअध्यक्ष ईश्वरमान डंगोलं सैद्धान्तिक ज्ञानयात व्यवहारिक सीपपाखें कार्यान्वयन यायेमाः धासें जनप्रतिनिधि व कर्मचारीया क्षमता विकास जुल धाःसा जक अपेक्षित लिच्वः बी फइ धयादिल ।

थ्व झ्वलय् ११ वडाअध्यक्ष हिरालाल तण्डुकारं दर्ता मयासे नं उजुरीया सुनुवाई यानाः क्वचायेकागु अनुभव कनादिसें थाय्या अभाव जूगुलिं आः लिक्कं बालं कयाः कक्ष संचालन यायेगु योजना दुगु खँ कनादिल । १४ वडाअध्यक्ष सुमन श्रेष्ठं अदालतय् वनेबलय् ध्यबा दुम्हं मुद्दा त्याकी धइगु मानसिकता दयाच्वंगु व थुकथां केन्द्र संचालन लिपा निगुलिं पक्ष त्याइगु जुइ । विवादया निरुपण त्वालय् हे वनाः समाधान यायेगु कुतः याये धयादिल ।

थीथी न्हय्गू चरणय् जुइगु मेलमिलापय् गुगुं नं उजुरी वा मुद्दायात मेलमिलाप यायेत पक्ष वा विपक्ष थःपिंसं हे मेलमिलापकर्ता ल्यये दइगु व्यवस्था दुुसा थुकथं छम्हेसिनं ल्यःम्ह मेलमिलापकर्तायात मेम्हेसिनं सहमति प्वंकेमाःगु जुइ । यदि अथे जुइ मफुत धाःसा स्रम्बन्धित अधिकारीं क्वःछिउम्ह मेलामिलापकर्ता विवाद निरुपण यायेगु ज्या याइ ।

Categorized in राष्ट्रिय