नेवाः पत्रकार राष्ट्रिय दबूया समन्वय नाप  प्रेस काउन्सिल नेपालया ग्वसालय् अन्तर्राष्ट्रिय मातृभाषा दिवसया लसताय् ‘धर्मादित्य धर्माचार्य व मातृभाषा पत्रकारिता’ विषय अन्तक्र्रिया ज्यभाm्वः जुगु दु।

प्रेस काउन्सिलया हलय् शुक्रबाः क्वचाःगु ज्याझ्वलय् मातृभाषा पत्रकारिता विकासया लागि प्रेस काउन्सिल, नेपाल आदिवासी पत्रकार महासंघया नापनापं मातृभाषी पत्रकारपिनिगु संघसंस्था छप्प जुया वनेमाः धका धाःगु दु।  उगु ज्याझ्वलय् नेपाःया न्हापाम्ह मातृभाषा पत्रकार धर्मादित्य धर्माचार्य व नेपाल पत्रकार महासंघया संस्थापक अध्यक्ष सत्यनारायण बहादुर श्रेष्ठया किपाताय् स्वामां देछाना ज्याझ्वः न्ह्यागू खः।

उगु ज्याझ्वलय वरिष्ठ पत्रकार सुरेश मानन्धरं भाषा संरक्षणया लागि मातृभाषा पत्रकारिता व  सञ्चार माध्यमया विशेष भूमिका दु धका धयादीसे मातृभाषा पत्रकारिका विकासया लागि राज्यस्तरपाखे ग्वाहालि यायेगु निति काउन्सिलपाखे भूमिका म्हितेमाः धका धयादीगु खः। अथेहे वयकलं काउन्सिलं मातृभाषी सञ्चार माध्यमयात स्वयेगु अलग्ग हे विभाग दयकेमाः धका धयादीगु खः। वयकलं छगु भाषा सीतकि छगु इतिहास, संस्कृति, परम्परा, सम्पदा न सी धका धयादीसे, ‘मनू सीतककि दक्को त्वःता वनिइ, तर छगु भाषा सीतकि त्वःता वनिइ मखु, यक्को खँ यकिइ। छगू भाषा नाश जुलकि उकिइ छगू इतिहास, व नाप भाषा दुने दुगु संस्कृति, परम्परा, सम्पदा दक्को थः नाप यकिइ। उकिइ भाषायात बचे यायेगु राज्यया हे कर्तव्य खः।’ प्रेस काउन्सिल नेपालया अध्यक्ष बालकृष्ण बस्नेतं मातृभाषा पत्रकारिता विकासया लागि सहजीकरण यायेत काउन्सिल तयार दु धका धयादीसे ।

अन्तक्र्रियाया मूपाहाँ बस्नेतं धयादीगु दु, ‘छगु भाषाय् जक ज्यायाना काउन्सिलया दायित्व पूरा जुइमखु, दक्को भाषाभाषीया पत्रकारितायात छगु हे स्वामां थे हना काउन्सिल न्ह्यावनेगु जुइ।’  ज्याझ्वलय् न्ववानादीसे वयकलं मातृभाषाया न्हापाम्ह पत्रकार धर्मादित्य धर्माचार्ययात राज्यस्तरपाखे मान्यता बिइकेगु नाप सत्यनारायण बहादुर श्रेष्ठयार्त नेपाल पत्रकार महासंघया संस्थापक कथं मान्यता बिइकेगु लागि प्रेस काउन्सिलं सहजीकरण यायेगु धका धयादीगु खः।

नेपाल आदिबासी जनजाति पत्रकार महासंघया  उपाध्यक्ष अमरध्वज लामां मातृभाषायात राष्ट्रियता, राष्ट्रिय गौरब, ब्यापार, स्वास्थ्यनाप स्वाना संविधानपाखे हे मातृभाषीया हक अधिकारबारे सम्बोधन यागु दु धका धयादीसे राज्यं संविधान जक कार्यान्वयन यायेत स्वल धाःसां मातृभाषा विकासय् महत्वपूर्ण योगदान जुइ धका धयादीगु खः।

अथेहे मधेसी पत्रकार समाजया अध्यक्ष मोहन सिंह मातृभाषापाखे पत्रकारिता यायेगु नः या बजि न्ह्ययेगु थे जुइ धका धयादीसे वयकलं धयादीगु दु थ्व नाप ज्या यानाच्वपि भाषाप्रेमीपिनिगु संकल्पं जक आःतक मातृभाषाया पत्रकारिता म्वानाच्वंगु दु धका बिचाः तयादीगु खः। वयकलं धयादीगु दु, ‘प्रेस काउन्सिल, सरोकारवाला संस्थापि नाप सहकार्य जुल धासा राज्यस्तरपाखे माःगु ग्वाहालि जुइफु।’

ज्याझ्वलय् सार्क पत्रकार समाजया अध्यक्ष राजु लामां प्रेस काउन्सिल, नेपाल आदिवासी पत्रकार महासंघ व समाजपि नाप सहकार्यं अन्तर्राष्ट्रिय मातृभाषा पत्रकार सम्मेलन यायेगु प्रस्ताव तयादीगु खः।

ज्याझ्वःया कजि तेजनारायण महर्जनं न्हापाम्ह मातृभाषी पत्रकार धर्मादित्य धर्माचार्यं मातृभाषाया पत्रकारिता सुरु यानादीगु सँच्छि दँ दयेधुकुगु दु सा न मातृभाषा पत्रकारिताया विकास जुइ मफुगु धका धयादीसे थुकिया लागि सरोकारवाला संस्था, प्रेस काउन्सिलं म्हित्ये माःगु भूमिका बारे छलफल यायेगु निति हे थुगु ज्याझ्वः यानागु खः धका धयादीगु खः।

काउन्सिलया दुजः शरद अधिकारीं लसकुस यानादीसे विविध भाषाभाषीया पत्रकारिता विकासया लागि काउन्सिलं यानावयाच्वंगु ज्याझ्वःया जानकारि बियादीगु खः। पत्रकार दबूया महासचिव केके मानन्धरं धर्मादित्य धर्माचार्ययात न्हापाम्ह मातृभाषी पत्रकारया मान्यता बिइकेगु निति व सत्यनारायण बहादुर श्रेष्ठयात नेपाल पत्रकार महासंघया संस्थापक अध्यक्षया रुपमा मान्यता बिइकेगु निति दबू न यानाच्वनागु ज्या व मातृभाषी पत्रकार नाप पत्रकारिताया विकासया लागि याना वयाच्वनागु गतिविधी बारे जानकारी बियादीगु खः।

दबूक.या सहसचिव सुनिता महर्जनं न्ह्याकादिगु उगु ज्याझ्वलय् सभानायः नेवाः पत्रकार राष्ट्रिय दबूया अध्यक्ष नृपेन्द्रलाल श्रेष्ठं धर्मादित्य धर्माचार्ययात राज्यस्तरपाखे मान्यता बिइकेगु निति हुलाक टिकट प्रकाशन यायेगु, वयकःया शालिक तयेगु, धर्मादित्यया नामय् मातृभाषी सञ्चार प्रतिष्ठान दयकेगु निति काउन्सिलं कुतः यायेमाः धका ध्यानकार्षण पौं काउन्सिलया अध्यक्ष स्नेतयात लःल्हानादीगु खः।

Categorized in राष्ट्रिय