सरकारं जनयुद्धया शहीदपिन्त राष्ट्रिय शहीद घोषणा यायेगु तयारी याःगु दु। प्रधानमन्त्री पुष्पकमल दाहाल प्रचण्डं थुगु खँया जानकारी बिःगु दु।

आइतबाः जनयुद्धया शहीद नाप बेपत्ता योद्धाया परिवारपि नाप जूगु छगु अन्तरक्रियाय् प्रधानमन्त्री प्रचण्डं जनयुद्धया शहीदपिन्त राष्ट्रिय शहीद घोषणा यायेगु धका धयादीगु खः। नेपाःया राजनीतिक ह्यूपा हयेत तधःगु योगदानयापि जनयुद्धया शहीदपिन्त तधःगु सम्मान नाप राष्ट्रिय शहीद घोषणा यायेगु तयारी जुयच्वंगु दु धका धयादीगु खः।

आइतबाः जनयुद्धया झ्वलय् न्हापाम्ह बलिदान याम्ह शहीद दिलबहादुर रम्तेलया स्मृति दिवस न दुगु धयादीसे प्रचण्डं धाःगु दु, ‘वर्तमान सरकारं जनयुद्ध लगायत दक्को आन्दोलनया शहीदपिन्त राष्ट्रिय शहीद घोषणा यायेगु तयारी जुयाच्वंगु दु।’ २००७ सालया क्रान्तिनिसे झापा विद्रोह, जनआन्दोलन व जनयुद्धया शहीदपिन्त नेपाःया राष्ट्रिय गौरव जूगुलि उमित तधःगु सम्मान यायेमाः धइगु सरकार दु धका प्रधानमन्त्री प्रचण्डं धयादीगु खः।

Categorized in राष्ट्रिय