२०८१ आषाढ ३१, सोमबार

अष्ट्रेलियां त्याकल खुक्वःगु महिला टी–२० विश्वकप उपाधि

राम डंगोल | चिल्लाथ्व अष्टमी ११४३, फागुन १५ सोमवाः

अष्ट्रेलियां खुक्वःगु पटक आईसीसी महिला टी–२० विश्वकपया उपाधि त्याकूगु दु। केपटाउनय् म्हिगः जूगु फाइनलय् अष्ट्रेलियां घरेलु टोली दक्षिण अफ्रिकायात १९ रनं पराजितयासे च्याम्पियन जूगु दु।

लगातार न्ह्यक्वःगु संस्करणया फाइनल कासाय् अष्ट्रेलियां खुक्वःगु पटक उपाधि त्याकां निक्वःतकया उपाधिइ ह्याट्रिक याःगु खः। सन् २००९ य् न्हापागु संस्करण फाइनलय् मथ्यःगु खःसा अष्ट्रेलियां २०१०, २०१२ व २०१४ य् लगातार त्याका उपाधिइ ह्याट्रिक याःगु खः। २०१६ या फाइनलय् धासा अष्ट्रेलिया वेष्ट इन्डिजनाप पराजित जूगु खः। वयालिपा २०१८, २०२० व २०२३ य् उपाधि त्याका हाकन अष्ट्रेलियां हाकन ह्याट्रिक याःगु खः।

अष्ट्रेलियां बिःगु १५७ रनया लक्ष्य ज्वना घरेलु टोली दक्षिण अफ्रिका २० ओभरय् खुगु विकेट गुमे याना १३७ रन जक दयके फुगु खः। दक्षिण अफ्रिकाया लागि ओपनर लोरा वालभाल्टं दकलय् अप्पो ६१ रन दयकूगु खःसा ४८ बल म्हिता न्यागू चौका व स्वगू छक्का प्रहार याःगु खः। क्लोए ट्रायोनं २५ रन दयकूगु खः। अष्ट्रेलियाया लागि मेगन सुट, एश गार्डनर, डार्सी ब्राउन व जीस जोनासेनं छगु छगु विकेट काःगु खः।

टस त्याका न्हापां ब्याटिङयासे अष्ट्रेलियां ओपनर बेथ मुन्नीया ७४ रनया ग्वाहालि खुगु विकेट गुमे याना १५६ रन दयकूगु खः।अथे हे मुनीं ५३ बल म्हिता गुगू चौका छगु छक्काया ग्वाहालि अविजित ७४ रन दयकूगु खः। एश गार्डनरं २९ व एलिसा हिलीं १८ रन दयकूगु खः दक्षिण अफ्रिकाया लागि शबनिम स्माइल व मरिजान कापं निगु निगु विकेट काःगु खः।

फाइनलय् अलराउण्ड प्रदर्शनयाम्ह अष्ट्रेलियाया एश गार्डर प्लेअर अफ दि सिरिज घोषित जूगु खः एशं ११० रन दयकूगु खःसा झीगु विकेट काःगु खः।

Categorized in कासा