धर्मादित्य व मातृभाषा पत्रकारिताय् प्रेस काउन्सिलं बिचाः यायेमाः
लहनान्युज | चिल्लाथ्व द्धादशी ११४३, फागुन २० शनिवाः
नेवाः पत्रकार राष्ट्रिय दबूया समन्वय व प्रेस काउन्सिल नेपालया आयोजनाय् अन्तर्राष्ट्रिय मातृभाषा दिवसया लसता लाकाः ‘धर्मादित्य धर्माचार्य व मातृभाषा पत्रकारिता’ विषयस अन्तक्र्रिया ज्याझ्वः जूगु दु । प्रेस काउन्सिलया हल संचारग्राम गौशालाय् शुक्रबाः जूगु ज्याझ्वःया वक्तातय्सं मातृभाषा पत्रकारिता विकासया लागि प्रेस काउन्सिल, नेपाल आदिवासी पत्रकार महासंघलिसें मातृभाषी पत्रकारतय् संघसंस्थात छधी जुयाः न्ह्याःनेमाःगुलिइ बः ब्यूगु खः । ज्याझ्वः न्हापांम्ह मातृभाषा पत्रकार धर्मादित्य धर्माचार्य व नेपाल पत्रकार महासंघया संस्थापक अध्यक्ष सत्यनारायण बहादुर श्रेष्ठया तस्बीरय् स्वांमाः क्वखाय्काः न्ह्याकूगु खः ।
ज्याझ्वलय् मू वक्ता कथं न्ववासें वरिष्ठ पत्रकार सुरेश मानन्धरं भाषा संरक्षणया लागिं मातृभाषा पत्रकारिता व सञ्चार माध्यमया विशेष भूमिका दइगु धासें मातृभाषा पत्रकारिका विकासया लागिं राज्यस्तरं ग्वहालि मुंकेत काउन्सिलं भूमिका म्हितेमाःगु धयादिल । अथे हे, वय्कलं काउन्सिलं मातृभाषी सञ्चार माध्यमयात जक स्वय्त बिस्कं हे विभाग दय्काः ज्या याय्माःगु छ्याता नं बियादिल । वय्कलं छगू भाय् सीगु धइगु वलिसें छगू इतिहास, संस्कृति, परम्परा, सम्पदा नं सीगु बिचाः तसें धयादिल, ‘मनू सीसा दक्व त्वःताः वनी, तर छगू भाय् सितकि वं दक्वं त्वःताः वनीगु मखु, यक्व खँ ज्वना वनी । छगू भाय् न्हनकि उकिं छगू इतिहास, व भाय्या दुने दुगु संस्कृति, परम्परा, सम्पदा दक्वं यंकी । अय्जुयाः भाय्यात म्वाकातय्गु राज्यया हे कर्तव्य खः ।’
प्रेस काउन्सिल नेपालया अध्यक्ष बालकृष्ण बस्नेतं मातृभाषा पत्रकारिता विकासया लागिं सहजीकरण याय्त काउन्सिल तयार दुगु धयादिल । ‘छुं छगू भाषाय् जक ज्या यानाः काउन्सिलया दायित्व पूवनीमखु, दक्वं भाषाभाषीया पत्रकारितायात माः हनाः काउन्सिल न्ह्याःवनी’ अध्यक्ष बस्नेतं धयादिल । वय्कलं मातृभाषाया न्हापांम्ह पत्रकार धर्मादित्य धर्माचार्ययात राज्यस्तरं हे मान्यता बीकेत व सत्यनारायण बहादुर श्रेष्ठयात नेपाल पत्रकार महासंघया संस्थापक कथं मान्यता बीकेत नं प्रेस काउन्सिलं सहजीकरण याय्गु धयादिल ।
नेपाल आदिबासी जनजाति पत्रकार महासंघया उपाध्यक्ष अमरध्वज लामां मातृभाषायात राष्ट्रियता, राष्ट्रिय गौरब, ब्यापार, स्वास्थ्यलिसे स्वानाः संविधानं हे मातृभाषीया हक अधिकारबारे सम्बोधन याःगुलिं राज्यं संविधान जक कार्यान्वयन याःसां मातृभाषा विकासय् महत्वपूर्ण योगदान जुइगु बिचाः तयादिल । अथे हे, मधेसी पत्रकार समाजया अध्यक्ष मोहन सिंहं मातृभाषां पत्रकारिता याय्गु धइगु नँया बजि न्ह्यय् थें जुइगु धासें थ्व क्षेत्रय् ज्या यानाच्वंपिं भाषाप्रेमीतय् संकल्पं जक आःतक्क मातृभाषा पत्रकारिता म्वानाच्वंगु धयादिल । ‘प्रेस काउन्सिल, सरोकारवाला संस्थातय् सहकार्य जूसा राज्यस्तरं माःकथं ग्वहालि काय्फइ ।’ सिंहं धयादिल ।
अथे हे, सार्क पत्रकार समाजया अध्यक्ष राजु लामां प्रेस काउन्सिल, नेपाल आदिवासी पत्रकार महासंघ व समाजया सहकार्यय् अन्तर्राष्ट्रिय मातृभाषा पत्रकार सम्मेलन याय्गु प्रस्ताव तयादिल । व हे कथं, बिचार गोष्ठीया कजि तेजनारायण महर्जनं न्हापांम्ह मातृभाषी पत्रकार धर्मादित्य धर्माचार्यं मातृभाषाया पत्रकारिता न्ह्याकूगु सच्छि दँ पूवनेत्यनं नं मातृभाषा पत्रकारिताया विकास जुइमफूगु धासें थुकिया लागिं सरोकारवाला संस्था, प्रेस काउन्सिलं म्हिनेमाःगु भूमिकाबारे सहलह याय्त ज्याझ्वःया ग्वसाः ग्वयागु धयादिल ।
काउन्सिलया सदस्य शरद अधिकारीं ज्याझ्वलय् लसकुस यासें थीथी भाषाभाषीया पत्रकारिता विकासया लागिं काउन्सिलले यानावःगु ज्यायाबारे जानकारी बियादीगु खःसा पत्रकार राष्ट्रिय दबूया महासचिव केके मानन्धरं धर्मादित्य धर्माचार्ययात न्हापांम्ह मातृभाषी पत्रकारया मान्यता बीकेत व सत्यनारायण बहादुर श्रेष्ठयात नेपाल पत्रकार महासंघया संस्थापक अध्यक्ष कथं मान्यता बीकेत लिसें मातृभाषी पत्रकार, पत्रकारिताया विकासया लागिं दबुलिं यानावःगु ज्यायाबारे जानकारी तयादीगु खः ।
ज्याझ्वलय् पत्रकार दबूया केन्द्रीय अध्यक्ष नृपेन्द्रलाल श्रेष्ठं धर्मादित्य धर्माचार्ययात राज्यस्तरं मान्यता बीकेत हुलाक टिकट पिथनेत, वय्कःया झ्वाता तय्त, वय्कःया हे नामय् मातृभाषी सञ्चार प्रतिष्ठान दय्केत काउन्सिलं पहल यानाबीत ध्यानाकर्षण पत्र काउन्सिलया अध्यक्ष बस्नेतयात लःल्हानादीगु खः । दबूया अध्यक्ष श्रेष्ठया सभापतित्वय् जूगु ज्याझ्वः दबूया सहसचिव सुनिता महर्जनं न्ह्याकादीगु खः ।
