नेपालभाषां समाचार मवगुलि मन्त्रीयात ध्यानाकर्षण याकल
लहनान्युज | चिल्लाथ्व द्धादशी ११४३, फागुन २० शनिवाः
नेवाः पत्रकार राष्ट्रिय दबुलिंसंचार व सूचना प्रबिधि मन्त्री रेखा शर्मायात सिहदरबारय् नापलानाः मातृभाषा पत्रकारिताया अवस्था व नेपाल टेलिभिजनय् नेपालभाषं न समाचार तय्गु बिषय ध्यानाकर्षण याकूगु दु।
दबूया अध्यक्ष नृपेन्द्रलाल श्रेष्ठया नेतृत्वय् वंगु दबूया टोलीं मन्त्री शर्मायात ध्यानाकर्षण पौ लःल्हाःगु खः। ध्यानाकर्षण पत्रमार्फत मातृभाषाया पत्रकारिता क्षेत्रया विकास व विस्तारया लागि राज्यं थप सहुलियत, सुविधायात नीतिगत रुपं सम्बोधन याय्गु नितिं संचार व सूचना प्रबिधि मन्त्रालयं प्रभावकारी भूमिका निर्वाह याय्माःगु माग याःगु खः। व झ्वलय् अध्यक्ष श्रेष्ठं नेपाल संवत् १०४५ य् धर्मादित्य धर्माचार्र्य बुद्धधर्म पत्रिका पिथनाः मातृभाषा पत्रकारिताया सुरुवात यानादीगु व थःपिन्सं आदिवासी जनजाति पत्रकार महासंघया समन्वयस दँय्दसं मातृभाषा पत्रकारिता दिवस हनावयागुलिइ आः मातृभाषा पत्रकारिताया शतवार्षिकी समारोह याय्गु तयारीइ थःपिं दुगु जानकारी बियादीगु खः।
शतवार्षिकीया लसताय् न्हापांम्ह मातृभाषाया पत्रकार धर्मादित्य धमाचार्यया जीवनी प्रकाशन याय्गु, वय्कःया कृतित्व व व्यक्तित्व चर्चा, शालिक अनावरण, हुलाक टिकट प्रकाशन, मातृभाषा पत्रकारिताबारे स्थानीयलिसें सार्क स्तरीय थीथी गोष्ठी, सभा, प्यानल सहलह याय्गु योजना नं न्यंकादिल । सरकारी सञ्चारमाध्यम नेपाल टेलिभिजनय् छुं ई न्ह्यः जक तामाङ व लिम्बु भाषाय् समाचार प्रसारण शुरु याःगुलिइ सुभाय् नं ब्यूगु खः।
मन्त्री शर्मालिसे खँल्हाबल्हाया झ्वलय् मातृभाषा पत्रकारिता यानाच्वंपिन्त राज्यं बियाच्वंगु लोककल्याणकारी विज्ञापन, झिंन्यादँनिसे पत्रकारिता यानाच्वंपिन्त बिशेष भत्ता व मेमेगु अनुदान वितरण याय्गु इलय् समानुपातिक समावेशीतायात प्राथमिकता बीत नापं सञ्चार सम्बन्धी आः अस्तित्वय् दुगु व भविष्यय् गठन जुइगु दक्व निकाययात पूर्ण समावेशी याय्माःगु माग नं दबुलिं याःगु दु।
९ बुँदे ध्यानाकर्षण पौ लःल्हानाकासें मन्त्री शर्मां नेवाः पत्रकारतय्गु योगदानया प्रशंशा यानादिल । नेपाल टेलिभिजनय् छुं दिं लिपा हे नेपालभाषाया समाचार नापं मेमेगु भाषाया नं समाचार प्रशारण जुइगु बचं मन्त्री शर्मां बियादिल । वय्कलं नेपाःया न्हापांम्ह मातृभाषी पत्रकार धर्मादित्य धर्माचार्य प्रतिष्ठान दय्केगु खँय् थः सकारात्मक दुगु धासें छगू समिति गठन यानाः उकिया अन्तर्गत दक्व माग सम्वोधन याय्गु नितिं कुतः याय्गु प्रतिवद्धता प्वंकादिल।अथे हे दबूया टोलिं नेपाल टेलिभिजनया महाप्रवन्धक फुलमान बलयात नं नापलानाः नेपाल टेलिभिजनय् नेपालभाषां नं समाचार तय्त माग यासें ध्यानाकर्षण पौ लःल्हागु खः।
