रजनी मिलाया ‘स्वस्वं तनावंगु सर्गः’ सफू विमोचन
लहनान्युज | चिल्लाथ्व चतुर्दशी ११४३, फागुन २२ सोमवाः
कवयित्री रजनी मिलाया चिनाखँ मुना ‘स्वस्वं तनावंगु सर्गः’ छगु ज्याझ्वः दथुइ विमोचन जूगु दु ।
नेपालभाषा एकेदेमिं पिथंगु सफू छगू ज्याझ्वःया दथुइ एकेदेमिया हलय् समालोचक, भाषाविद् ज्योतिप्रभा तुलाधरं विमोचन यानादीगु खः ।ए
केदेमिया भाइस चान्सलर मल्ल के सुन्दरया सभाध्यक्षताय् जूगु उगु ज्याझ्वलय् मूपाहाँ तुलाधर नापं पाहाँपिं वरिष्ठ समालोचक व भाषाविद् डा. सुन्दरकृष्ण जोशी, लुम्बिनी बौद्ध विश्वविद्यालयया डिन माणिकरत्न शाक्य, नेपाल प्रज्ञा प्रतिष्ठानया पुलांम्ह प्राज्ञ लक्ष्मी माली, कवयित्री प्रतिसरा साय्मिपिंसं विमोचित चिनाखँ मुनायात कयाः न्ववानादीगु खः ।
एकेदेमिया सदस्य सचिव डा. पुष्पराज राजकर्णिकारं लसकुस यानादीगु ज्याझ्वलय् प्रतिसरा साय्मि, विनिता वज्राचार्य, विना नेम्कुलपिंसं सफुलिइ दुथ्याःगु चिनाखँ नं ब्वनाः न्यंकूगु खः ।
Categorized in राष्ट्रिय