निर्वाचन आयोगं राष्ट्रपति रामचन्द्र पौडेलयात चैत ३ गते क्वचाःगु उपराष्ट्रपति निर्वाचनया प्रतिवेदन लःल्हाःगु दु।

राष्ट्रपति भवन शीतलनिवासय् छगु ज्याझ्वः दथुइ आयोगया प्रमुख आयुक्त दिनेश थपलियां राष्ट्रपति पौडेलयात प्रतिवेदन लःल्हाःगु खः।

उगु झ्वलय् राष्ट्रपति पौडेलं स्थानीय तहनिसे राष्ट्रपति÷उपराष्ट्रपतिया निर्वाचन क्वचाये धुकुगुलि लोकतान्त्रिक अभ्यास परिपक्व जुयावःगु दु धका धाःगु खः।

वयकलं दक्को निर्वाचन निर्वाध, निष्पक्ष व शान्तिपूर्णं क्वचाःगु धका धासे आयोग व सरोकारवाला निकाय सकसित सुभाय् बिःगु दु। प्रमुख आयुक्त थपलियां थुगु दँय् आयोगया लागि निर्वाचन दँ जुगु धका धयादीसे उपराष्ट्रपति निर्वाचनया बारेय् विस्तृत जानकारी बियादीगु खः।

उगु भल्वलय् प्रमुख आयुक्त थपलिया, आयुक्तपि रामप्रसाद भण्डारी, जानकीकुमारी तुलाधर, सगुनशम्सेर जबरा नाप आयोगया सचिव गोकर्णमणि दुवाडीपिनिगु न सहभागिता दुगु खः धका राष्ट्रपति कार्यालयं धाःगु दु।

Categorized in राष्ट्रिय