प्रतिनिधि सभा सदस्य उपनिर्वाचनया लागि थौंनिसे दल दर्ता प्रक्रिया सुरु जूगु दु। वइगु वैशाख १० गतेया लागि जुइत्यःगु उपनिर्वाचनया लागि निर्वाचन आयोगं थौंनिसे दल दर्ता यायेत्यःगु खः।

थ्व हे चैतया १२ गतेतक दल दर्ता यायेमाःगु धका आयोगं सूचं जारी याःगु दु। वया लिपा मेगु प्रक्रिया सुरु जुइ धका आयोगं धाःगु दु। थीथी कारणं खाली जुगु स्वगू प्रतिनिधि सभा सदस्य पदया लागि वैशाख १० य् उपनिर्वाचन जुइत्यःगु खः।

तनहुँ–१, बारा–२ व चितवन–२ य् प्रतिनिधि सभा सदस्यया लागि उपनिर्वाचन जुइत्यःगु खः। तनहुँ–१ य् प्रतिनिधि सभा सदस्य रामचन्द्र पौडेल राष्ट्रपति व बारा–२ य् रामसहायप्रसाद यादव उपराष्ट्रपति निर्वाचित जुगुलि उपनिर्वाचन जुइत्यःगु खः।

अथे हे, चितवन–२ पाखे निर्वाचित प्रतिनिधि सभा सदस्य रवि लामिछाने नागरिकता विवादय् दोषी जुइवं पदमुक्त जुगुलि उपनिर्वाचन जुइत्यःगु खः।

Categorized in राष्ट्रिय