अनमिनको प्रमाणीकरण याःगु इलय् अयोग्ययापि माओवादी लडाकुपिन्त निगु लखं राहत बिइत थौं बुधबाःनिसे प्रक्रिया न्ह्याकिइगु धका गृह मन्त्रालयं धाःगु दु।

मन्त्रिपरिषदं वःगु सोमबाःया बैठकं माओवादीया अयोग्य लडाकुपिन्त कार्यविधि दयका राहत बिइगु निर्णय याःगु खः। कार्यविधि दयकेगु प्रक्रिया बुधबाःनिसे सुरु जुइ धका गृह मन्त्रालयया सचिव विनोद प्रकाश सिंहं धाःगु दु ।

सचिव सिंहया कथं फयाफतिं थ्व हे चालू आर्थिक वर्षनिसे राहत वितरण यायेगु जुइ व. वितरण यायेगु ज्या चरणबद्ध याइ। राहत रकम वितरणया ज्या जिल्ला प्रशासन कार्यालयपाखे जुइ। २०६३ मंसिर ५ गते या विस्तृत शान्ति सम्झौतालिपा माओवादी लडाकू व हतियार व्यवस्थापनया लागि संयुक्त राष्ट्रयसंघीय मिसन (अनमिन) नेपाल वःगु खः।

अनमिनं १९ हजार ६०२ म्ह लडाकूपिन्थ प्रमाणीकरण याःगु खः। ४ हजार ९ म्ह ‘मापदण्डय् मलागु’ धका अलग तःगु खः। अयोग्य धाःपि व हे लडाकुपिन्त आः सरकारं राहत बिइगु निर्णय याःगु खः। माओवादीया १ हजार ४ सय म्ह लडाकुपि नेपाली सेनाय् थीथी पदय् समायोजन याःगु खः।

ल्यः दुपि लडाकुपिन्स स्वेच्छिक अवकाश ल्यःगु खः। स्वेच्छिक अवकाश काःपिन्त नगद राहत वितरण याःगु ख। माओवादी शान्ति प्रक्रियाय् वनेवं २०६३ सालनिसे २०६८ सालतक राज्यकोषपाखे करिव २० अर्ब रुपैयाँ खर्च याःगु अनुमान यानातःगु दु।

Categorized in राष्ट्रिय