नेवाः व तामाङपिन्स माग याना वयाच्वंगु बागमती प्रदेश सरकारं वइगु बैशाख महिनाय् भाषा विधेयक पेश याइगु जूगु दु ।

भाषा आयोगया सिफारिस कथं नेवाः व तामाङ भाय् प्रदेशया सरकारी कामकाजी भाषाया रुपय् मान्यता बिइगु नितिं विधयेक यंकाः कानुन दयेकेमाःगु अवस्था दु । नेवाः देय् दबू स्वनिगः विशेष प्रदेश समितिपाखें थनि दच्छि न्ह्यवंनिसें हे भाषा विधयेक संसदय् यंकाः पारित याना भाय् व तामाङ भाय् प्रदेशया कामकाजि भाषाया रुपय् मान्यता बिइमाः धकाः माग याना थीथी कथंया अभियान न्ह्याका वयाच्वंगु खः ।

उगु अभियानय् देय् दबू बाग्मती प्रदेश समिति व नेपाल तामाङ घेदुङया बाग्मती प्रदेश समितिपाखें नं ग्वहालियाना वयाच्वंगु खः । देय् दबू स्वनिगः विशेष प्रदेशया नायः श्रीकृष्ण महर्जनं आः चैत्र महिनाया दुने बागमती प्रदेशया नितिं भाषा विधेयक दयेकेगु ज्या याइगु नापं बैशाख महिनाय् संसदय् पेश याना ऐनया रुपय् कार्यान्वयन हइगु खँय् थःपिं विश्वस्ष्ट जुया च्वनागु दु धकाः धयादीगु दु ।

वागमती प्रदेशया सामाजिक विकास मन्त्री नापं भाषा सम्वन्धी कार्यदलया कजि कुमारी मोक्तानं प्रस्तावित विधेयक दयेकेगु भाला कार्यदलया नितिं नियुक्ति जूपिं निम्ह भाषाविदयात भाला बियादीगु दु धकाः तकं मन्त्री मोक्तानया धापू उल्लेखयासें स्वनिगः विशेष प्रदेशया नायः महर्जनं कनादीगु दु । वंगु छुं दिं न्ह्यः जक भाषा सम्वन्धि कार्यदलया न्हाापांगु मुँज्या च्वना उगु कथंया निर्णय याःगु खः ।

थ्यं मथ्यं लच्छि न्ह्यः बाग्मती प्रदेश सरकारं सामाजिक विकास मन्त्री मोक्ताङया कजिसुइ सम्वन्धीत मन्त्रालयया सचिव हे सदस्य सचिव जुइगु कथं प्रदेशया पर्यटन उद्योग सहकारी मन्त्री डम्बर तामाङ व श्रम तथा रोजगार मन्त्री एकलाल श्रेष्ठयात दुजः कथं नियुक्ति याःगु खः । लच्छि लिपा जक भाषा विज्ञत नियुक्ति यायेगु ज्या जूगु दु ।

तामाङ भाषा विज्ञ कथं अमृत योञ्जन तामाङ व नेपालभाषा विज्ञया विज्ञ कथं डा. ओमकारेश्वर श्रेष्ठयात दुजः कथं नियुक्ति याःगु खःसा अनं लिपा हे कार्यदलया मुँज्या च्वंगु खः ।

Categorized in राष्ट्रिय