२०८१ आषाढ ५, बुधबार

क्यनेगु ज्या जक मजुइमा, धात्थें ह्यूपाः हय्फय्मा

लहनान्युज | चौलाथ्व चौंथी ११४३, चैत्र ११ शनिवाः

देय्या स्वम्हम्ह राष्ट्रपति कथं रामचन्द्र पौडेल निर्वाचित जुइधुंकूगु दु । अथेहे, रामसहाय प्रसाद यादव स्वम्हम्ह उपराष्ट्रपति जुइत ताःलात । 
 
देशय् गणतन्त्र वल, जनतां ल्यःम्ह जनप्रतिनिधि देय्या सर्वोच्च संस्थाया प्रमुख जुयाः वन । थ्व सकतां जूगु वःदँ मछि दय्धुंकलं नं जनतां ह्यूपाःया अनुभूति धाःसा याय् मखनाच्वंगु खः । गथे न्हापा जनतां दुःख सियाच्वंगु खः, सत्तां जनतायात शासन हे यानाच्वंगु खः व हे कथं गणतन्त्रय् नं दुःख हे सियाच्वंगु, शासकपाखें शासित हे जुयाच्वंगु महसूस याय् मालाच्वंगु खः । अझ ला जनतां न्हापा स्वयां आः झन दुःख सीमाल धाइपिं नं अप्वयावःगु खनेदु ।
 
न्हापा स्वयां आः अप्वः कम ला मस्यू, तर न्हापा दुःख सिल धकाः धाय् हे मदुगु, ज्यू धन सरकार हे याय्माःगु अवस्थायात झीसं हाकुतिनागु खः । आः नं हाकनं व हे कथं ज्यू धन सरकार हे याय्माल धाःसा छु पात धइगु हे जनताया न्ह्यसः खः । व हे कथं सवारी जुलकि लँय् मनूतय् न्यासिवने तक हे मबीगु, लँ दक्व बन्द हे यानाः राष्ट्राध्यक्षया सवारी यंकेगु प्रवृत्तिं जनता आजित जूगु खः । झन छुं दिं न्ह्यः तत्कालीन राष्ट्रपति विद्या भण्डारीया सवारीया इलय् लँय् न्यासि वन धकाः चिकित्सकयात तकं छ्यं हे तज्याक दायाब्यूबलय् जनता तसकं आक्रोशित जूगु खः ।
 
थुकथंया अवस्थाया दथुइ तत्कालीन इलय् नेपाली काँग्रेसपाखें राष्ट्रपतिया उम्मेदवार रामचन्द्र पौडेलं थः राष्ट्रपतिइ निर्वाचित जुल धाःसा थःगु गाडी लँय् वइबलय् लँ बन्द मयाय्गु प्रतिवद्धता प्वंकूगु खः । राष्ट्रपतिइ निर्वाचित जुयाकथं पौडेल पशुपतिनाथ दर्शन याय्त वंबलय् ला न्हापा धाःथे जुइमफुत । उगु इलय् जनतां व हे मुलु, व हे सुका धकाः आलोचना नं याःगु खः । तर, छुं दिं न्ह्यः तिनि राष्ट्रपति रामचन्द्र पौडेल कुमारीया दर्शन याय्त झाःबलय् लँ बन्द मयाः । लँ बन्द हे मयाःसे राष्ट्रपतिया गाडी वसन्तपुरय् थ्यंकःवल । थ्व धाःसा बांलाःगु हे ज्या जुल धाय्माली । 
 
जनतां हे शासन याय्मा, जनता हे देय्या शासक जुइमा धकाः जनतां हे देशय् गणतन्त्र हःगु खः । पुलांगु हे शासकीय प्रवृत्ती ज्वनाच्वनेगु खःसा थन शासक व शासित हे जक दयाच्वनी, जनताया शासन गबलें वइमखु, जनता शासक गबलें जुइमखु । सत्ताय् थ्यनीपिन्सं थःत शासन ताय्केगु त्वःते हे माः । थः जनप्रतिनिधि जक खः, जनताया सेवा याय्त वयाम्ह जनसेवक खः धकाः थुइकेमाः । राष्ट्रपतिया सवारीइ लँ बन्द मयाःबलय् नवनिर्वाचित राष्ट्रपति रामचन्द्र पौडेलं व हे कथं बिचाः याःगु खःला धकाः आशा ला ब्वलंकूगु दु । तर थ्व ज्या क्यनेगु नितिं जक मजुइमा, धात्थें जनताया हे शासन स्थापित याय्गु स्वच्छ बिचाःलिसें वय्कः न्ह्याःवने फय्मा ।