सक्वया पत्रकार पवनलाल श्रेष्ठ
श्रीकृष्ण महर्जन नेवाः | चौलाथ्व चौंथी ११४३, चैत्र ११ शनिवाः
गबले गबले जि सक्वय् वना, अबले अबले लुमंकाः फत धाःसा नापलाना । मखुसा कम से कम टेलिफोनं जूसां स्वापू तय्गु याना वयाच्वनाम्ह स्याःन्याःम्ह पासा खः पवनलाल श्रेष्ठ । सक्वय् नादि खुसिइ मेला जुइगु माधव नारायणया अपसं च्वनेगु ज्या दच्छिया छकः जुइबलय् लुमंकेगु यानावयाच्वनाम्ह पासा खः पत्रकार पवनलाल श्रेष्ठ । तत्कालीन अवस्थाय् नगरपालिकाया नांया सन्दर्भनिसें सक्वया छुं नं कथंया घटना जुइवं उकिया जानकारी दुम्ह धकाः ताय्काः जिं फोन याय्गु याना वयाच्वनाम्ह पत्रकार पवनलाल श्रेष्ठ खः ।
वय्कःयात स्वापू तयाः सक्वया यक्व कथंया सुचं मुंकेगु याना वयाच्वनागु खः । अथे हे सक्वयाबारे समाचार च्वय्त न्यनेमाल धाःसां बाय् सक्वया बारे अन्तर्वार्ता काय्माल धाःसां दकले न्हापां ख्वाः लुमना वइ पत्रकार पवनलाल श्रेष्ठया । पत्रकार पवनलाल श्रेष्ठ, मात्र पत्रकार जुया लुमंकेगु याना वयाच्वनागु धाःसा पक्कां मखु । वय्कः छम्ह स्थानीय सशक्त पत्रकार नाप नापं नेवाः पत्रकारतय्गु राष्ट्रिय संगठन नेवाः पत्रकार राष्ट्रिय दबूया सक्रिय दुजः नं खः । सूचनाया नितिं जक मखु, संगठनया ल्याखं नं वय्कःयात लुमंकेगु याना वयाच्वनागु खः ।
२०७९ फागनु २४ गते बुधवाः बहनी जब सक्वया पत्रकार पासा पवनलाल श्रेष्ठ दुर्घटनाय् लानाः मन्त धकाः सामाजिक संजालय् खन, जि झसंग वन । पवनलालया ख्वाः लुमन । क्यातुसे च्वंगु, तुयूगु, सलक मिंगु ख्वाः अले भचा भचा चीसःगु वय्कःया सः लुमन । वय्कःलिसे खँ ल्हानागु, वय्कःलिसे सक्वया बारे खँ ल्हानागु, समाचारया बारे खँ ल्हानागु, नादि खुसिया मेलाया बारे न्यनागु खँ लुमन । आः पवनलाल श्रेष्ठ मदय्वं सक्वया सुचं थीथी संचार माध्यमय् गुकथं वइ धकाः नुगलय् खँ वात ।
पवनलाल श्रेष्ठ गथे जुयाः दुर्घटनाय् लात धकाः नुगलय् न्ह्यसः ब्वलन । वय्कः मन्त धकाः सुचं वय्वं जिं वय्कःया फेसबुक पेजय् दुहां वनाः स्वया । वय्कलं छुं घण्टा न्ह्यः जक इहिपाःया छगू भ्वय्या लाइभ यानातःगु खना । उकिं पासा पवनलाल मन्त धाःगु खँ अझ नं पत्याः याय्त थाकुल । अले सक्वया पासापिन्त बहनी जूसां फोन याना । पासापिन्सं मदुगु खः धकाः स्पष्ट धाय् धुनेवं जिं नं सामाजिक सञ्जालय् वय्कःया बारे च्वयाः बिचाः हाय्केगु ज्या याना । दुःखं कःपिं छेँजःपिन्त धैर्य धारण याय्फय्मा धकाः कामना याना । अले पवनलाल श्रेष्ठया किपा मालाः थुगु कथं सामाजिक सञ्जाल फेसबुकय् च्वया–
‘सक्रिय युवा पत्रकार पवन मन्त
अतिकं मिलनसार, सरल स्वभाव व अत्यन्त सक्रियम्ह सक्वया पत्रकार पासा पवन लाल श्रेष्ठ थौं बुधवाः बहनी सक्वय् दुर्घटनाय् लानाः दुःखद निधन जूगु खवरं अत्यन्त पीडा महसुस याकाब्यूगु दु । सक्वं पिहांवइगु लावण्य सन्देश साप्ताहिकया सम्पादक नापं नेवाः पत्रकार राष्ट्रिय दबूया दुजः वय्कः दुर्घटनाय् लानाः मदुगु खः । उगु दुर्घटना याःम्ह ट्रीपर चालकयात कडा स्वयां कडा कार्वाहिया माग यासें मदुम्ह पासायात सुखावति भुवनसं वासया कामना याना च्वना ।’
नेवाः पत्रकार राष्ट्रिय दबूया दुजः जुयाः पत्रकारिता ख्यलय् ज्या यायां हे मदुपिं मध्ये पवनलाल श्रेष्ठ नं छम्ह जुल । वय्कःसिबें न्ह्यः सानुकाजि महर्जन, नविन महर्जन, पुष्पदास स्याउला, अमृतलाल श्रेष्ठ व याम प्रधान नं मदय् धुंकल । नेवाः पत्रकार राष्ट्रिय दबूया दुजः जुयाः पत्रकारिताय् सक्रिय जुजुं मदुपिं मध्ये खुम्हम्ह पत्रकार जुयाब्यूगु दु सक्वया पवनलाल श्रेष्ठ । पवनलाल श्रेष्ठं सक्वया समाचार थः प्रकाशक व सम्पादक जुयाच्वनादीगु लावण्य सन्देश वाःपतिइ जक पिकयादीगु मखुकि मेमेगु संचार माध्यमया नितिं नं छ्वयाबीगु यानाच्वनादीगु खः । थीथी राष्ट्रिय संचार माध्यमनिसें एफ.एम. अले थीथी संचार माध्यमया पत्रकारतय्पाखें सक्वया नितिं खँ ल्हाय्माःसा दकले न्हापां पवनलालयात हे स्वापू तय्गु याना वयाच्वंगु खःसा आः धाःसा समस्या ब्वलनीगु अवस्था वःगु दु ।
सक्वया नेवाःतय्सं सक्वया पलिस्था दिवस हना वयाच्वंगु दु । ३३सः व २३क्वःगु सक्व स्थापना दिवस हनेगु ज्या न्हापांगु खुसी याःगु खः । अनंलिपा मदिक्क सक्व स्थापना दिवस हनावःगु दुसा थुगुसी नेपाल संवत ११४३स प्यक्वःगु खुसी सक्व स्थापना दिवस हन । कलिगत सम्वंत १८०१ फागुन शुक्ल तृतियाया दिनय् शंखरापुर शहर अर्थात सक्व देय् दय्कल धकाः उल्लेख जुयाच्वंगु दु धइगु अर्थ थुइकाः हे सक्वया बुदिं हनेगु याना वयाच्वंगु खः ।
न्हय्गू गां धइगु गागल, नागाचा, च्ववहि, गुल्मा, पावना, मुदेख्वा गां मिलेयाना शाशं अर्थात सक्व दय्कूगु खः धाइ । थुगु ल्याखं हे सक्वया बुदिं हना वयाच्वंगु खः । सक्वया पलिस्था दिवस हनेगु ज्यायात स्थानीय रुपं प्रचार प्रसार याय्गु ज्याय् नं पवनलाल श्रेष्ठं ज्वःमदुगु योगदान बियादीगु दु । ३३सः व २१क्वःगु सक्व दिवस हंगु इलय् सक्वयात सांस्कृतिक संरक्षित क्षेत्र घोषणा याय्गु, सक्वय् स्थानीय मांभासं स्थानीय विषय ब्वंकेगु व्यवस्था याय्गु व सक्वया थाय्बाय्या नां पुलांगु हे तय्गु धकाः तकं घोषणा याःगु खः । सक्व देय्या पुलांगु नां शंखरापुर खः । शंखरापुर नगरपालिकाया नितिं थुगु कथंया घोषणा यानाः आः कार्यान्वयनया चरणय् दुसा उकियात साकार रुप बीगु नितिं सक्वया सशक्त पत्रकार पनलाल श्रेष्ठया विशेष भूमिका दु ।
जिं म्हस्यूम्ह सक्वया पत्रकार पवनलाल श्रेष्ठ मन्त धकाः थौं तक नं पत्या याय् थाकुनि । पत्रकार श्रेष्ठ मदुगुलिं नेवाः पत्रकारिता ख्यलय् तःधंगु क्षती जूगु दु । सक्वया नितिं नं क्षती जूगु दु । उकिं पत्रकार पवनलाल श्रेष्ठं बियादीगु योगदान न्ह्याबलें लुमनाच्वनी । पवनलाल श्रेष्ठया योगदानया ल्यंका तय्गु नितिं आः लावण्य सन्देश वाःपौयात निरन्तरता बियातय्माःगु आवश्यकता दु ।
